ރައްޔިތުންގެ މަޖިލީހަށް މިހާރު ހުށަހަޅާފައި އޮތް މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަންގެ ބިލަކީ ރާއްޖޭގެ ނޫސްވެރިކަމުގެ މިނިވަން ކަމަށް އޮތް ނުރައްކަލެއް ކަމަށް އިންޓަނޭޝަނަލް ފެޑެރޭޝަން އޮފް ޖާނަލިސްޓްސް (އައިއެފްޖޭ) އިން ބުނެފިއެވެ.

އައިއެފްޖޭއާއި ރާއްޖޭގައި އެ ޔުނިއަން ތަމްސީލުކުރާ ޖަމިއްޔާ ކަމަށްވާ، މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އިން ނެރުނު ޖޮއިންޓް ސްޓޭޓްމަންޓެއްގައި ބުނީ މަޖިލީހަށް ހުށަހަޅާފައިވާ މި ބިލަކީ ސަރުކާރުތަކުގެ ނުފޫޒު މީޑިއާއަށް ކުރިމަތިވާނެ، މީޑިއާގެ މިނިވަން ކަމަށާއި މީޑިއާ ރެގިއުލޭޝަނަށް އޮތް ބިރެއް ކަމަށެވެ.

ސަރުކާރު މެމްބަރުންގެ ރުހުމާއިއެކު މަޖިލީހަށް މިހާރު ބަލައިގަނެފައިވާ މީޑިއާ ކޮމިޝަންގެ ބިލު ފަރުމާކޮށްފައި ވަނީ، އަލަށް އުފައްދާ މީޑިއާ ކޮމިޝަނުން ނޫސްވެރިންނާއި މީޑިއާތައް ބޮޑެތި އަދަދުތަކުން ޖޫރިމަނާ ކުރެވޭނެ ގޮތަށެވެ.

މީޑިއާތައް މިހާރު ރެގިއުލޭޓް ކުރުމަށް އޮންނަ މޯލްޑިވްސް މީޑިއާ ކައުންސިލް (އެމްއެމްސީ) އާއި ބްރޯޑްކާސްޓިން ކޮމިޝަން (ބްރޯޑްކޮމް) އުވާލައި އުފައްދާ އެ ކޮމިޝަންގެ މެޖޯރިޓީ ވެސް ލިބެނީ ސަރުކާރަށެވެ.

އެ ކޮމިޝަނުގެ ރައީސާއި ނައިބު ރައީސް އައްޔަން ކުރުމުގެ ބާރު، ބިލުގައި ދީފައިވަނީ މަޖިލީހުގެ ރުހުމާ އެކު ރައީސުލްޖުމްހޫރިއްޔާއަށެވެ.

އައިއެފްޖޭއިން ބުނެފައި ވަނީ މިހާރު ހުށަހަޅާފައިވާ ބިލަކީ ރާއްޖޭގައި އޮތް ނޫސްވެރިކަމުގެ މިނިވަން ކަމަށް އޮތް ނުރައްކަލެއް ކަމަށެވެ.

މީޑިއާ ކޮމިޝަންގެ ބިލާ ދެކޮޅަށް މަދަނީ ޖަމިއްޔާތަކާއި ސިޔާސީ ޕާޓީތަކާއި ނޫސްވެރިން އަންނަނީ އަޑުއުފުލަމުން ނެވެ. މި ބިލްގެ މައްސަލަ ބޮޑުވެފައިވާއިރު ރައީސް ޑރ. މުޙައްމަދު މުއިއްޒު އިއްޔެ ވަނީ ނޫސްތައް ކޮންޓްރޯލް ކުރުމަކީ ގަބޫލުކުރައްވާ ކަމެއް ނޫން ކަމަށް ވިދާޅުވެފައެވެ.