ޑޮލަރު ބޭންކަށް މާރު ކުރަން މަޖުބޫރު ކުރުން ގާނޫނާ ހިލާފު ކަމަށް ގާނޫނީ ވަކީލް، އަދި މަޖިލީހުގެ ކެންދޫ ދާއިރާގެ ކުރީގެ މެމްބަރު އަލީ ހުސެއިން ވިދާޅުވެއްޖެއެވެ.

މުއިއްޒުގެ އޯޑަރަށް އެމްއެމްއޭއިން ނެރެފައިވާ ގަވާއިދުގައި ބުނަނީ ރިސޯޓުތަކާއި އިންޓަގްރޭޓެޑް ރިސޯޓާއި ފަތުރުވެރިކަމުގެ އުޅަނދުފަހަރާއި ރިސޯޓު ހޮޓަލާއި ސިޓީ ހޮޓާ ފަދަ ތަންތަނުން އެ ތަންތަނަށް އަންނަ ކޮންމެ ފަތުރުވެރިއެއްގެ ބޮލަަކަށް 500 ޑޮލަރު މާރުކުރަންޖެހޭނެ ކަމަށެވެ. އަދި 50 އެނދަށްވުރެ މަދު އެނދު ހުންނަ ގެސްޓުހައުސްތަކުން ޓޫރިސްޓެއްގެ ބޮލަކަށް 25 ޑޮލަރު މާރުކުރަންޖެހޭނެ ކަމަށެވެ.

ކުރީގެ މަޖިލިސް މެންބަރު، އަލީ ހުސެއިން އެކްސްގައި ކުރެއްވި ޕޯސްޓެއްގައި ވިދާޅުވީ އެ ގަވާއިދަކީ ދުސްތޫރީ ގަވާއިދެއް ކަމަށެވެ.

ޓޫރިސްޓު ފެސިލިޓީތަކުން ބޭންކުތަކަށް ޑޮލަރު މާރުކުރުން މަޖުބޫރު ކުރުން ގާނޫނާ ހިލާފު ކަމަށް، ގާނޫނީ ބޭފުޅުން ވިދާޅުވަމުންދާއިރު، ޓޫރިޒަމް ވިޔަފާރިވެރިން ވަނީ އެ ގަވާއިދަށް އަމަލު ނުކުރެވޭނެ ކަމަށް އެމްއެމްއޭއަށް އަންގައިފަ އެވެ.

އޭގެ ތެރޭގައި ރައީސް ޑރ. މުހައްމަދު މުއިއްޒުގެ ޓޫރިޒަމް އެޑްވައިޒަރު މުހައްމަދު ހަލީލު މެނޭޖިން ޑިރެކްޓަރުކަން ކުރައްވާ ޕަލްސް ކުންފުންޏާއި، އެމްޔޫ މުހައްމަދު އުމަރު މަނިކުގެ ޔުނިވާސަލް އަދި މުހައްމަދު މޫސާ (އުއްޗު)ގެ ރިސޯޓުތައް ހިމެނެ އެވެ. ނަމަވެސް އެ ނިންމުން ބަދަލު ނުކުރައްވާނެ ކަމަށް ރައީސް މުއިއްޒު ރޭ ވަނީ ތަކުރާރުކޮށް ވިދާޅުވެފަ އެވެ.

ނަމަވެސް މި ސަރުކާރަށް އެއް އަހަރު ފުރުން ފާހަގަކުރަން ސޯޝަލް ސެންޓަރުގައި މިހާރު ކުރިއަށް ގެންދާ ރަސްމިއްޔާތުގައި ރައީސް ވަނީ ޑޮލަރު މާރުކުރުމުގެ ގަވައިދު ބަދަލުކުރެވެން ނެތް ކަމަށް ތަކުރާރުކޮށް ވިދާޅުވެފަ އެވެ.