"ބުނި ބަސް" ސެގްމެންޓްގައި މިއަދު މިބަލާލަނީ 16 ސެޕްޓެމްބަރ 2023 ވަނަ ދުވަހު ރައީސް ޑރ. މުހައްމަދު މުއިއްޒު ދެއްކެވި ވާހަކަފުޅަކަށެވެ.

ރާއްޖޭން އެކި ގައުމުތަކުންނާއި ބޭންކްތަކުން ނަގާފައިވާ ލޯނުތައް ރީފައިނޭންސްކުރުމަށް ރަހުމަތްތެރި ގައުމުތަކުން މިހާރު ވެސް ފެހި ސިގްނަލް ލިބިފައިވާ ކަމަށް އިދިކޮޅު ޕީއެންސީ/ޕީޕީއެމްގެ ރިޔާސީ ކެންޑިޑޭޓް މިހާރުގެ ރައީސް ޑރ. މުހައްމަދު މުއިއްޒު އެދުވަހު ވިދާޅުވި އެވެ.

ގިނަ ލޯނުތަކެއް ފަސް އަހަރު ތެރޭ އަނބުރާ ދައްކަންޖެހޭއިރު، އެކަމަށް މުއިއްޒު ގެންގުޅުއްވާ ހައްލަކީ ލޯނުތައް ރީފައިނޭންސްކުރުމެވެ. ހދ. ކުރިނބި އަށް ވަޑައިގެން ރައްޔިތުންނާ ވާހަކަ ދައްކަވަމުން މުއިއްޒު އެދުވަހު ވިދާޅުވީ، އިގުތިސޯދު އަލުން ކޮޅަށްޖަހައި ލޯނުތައް ދައްކާނެ ގޮތް އެނގޭ ކަމަށާއި އެކަމުގައި ހަމަ އެއްވެސް ކަންބޮޑުވުމެއް ނެތް ކަމަށެވެ.

މުއިއްޒު ވިދާޅުވީ ރަށްރަށުގައި ކުރަންހުރި ކަންކަމަކީ ދައުލަތަށް މަހުން މަހަށް ލިބޭ އާމްދަނީ ވެސް ހާސިލް ކުރެވޭނެ ކަންކަން ކަމަށާއި އެކަން މި ސަރުކާރަށް ނުވެގެން އުޅެނީ "މިސް މެނޭޖް" ކުރާތީ ކަމަށެވެ.

ނަމަވެސް ރާއްޖޭގެ ވެރިކަން ރައީސް ޔާމީންގެ "ހިޔަނީގައި" ކާމިޔާބު ކުރެއްވުމަށްފަހު މިއަދު މުއިއްޒު ވެރިކަމާއި ހަވާލު މިހާރު "ނޭވާ ހޮޅިއަށް" އެޅިގެން އުޅެނީ ދަރަނި ދައްކާނެ ފައިސާ ނުލިބިގެން ނެވެ. މުއިއްޒު ކުރިން ބުނި ފެހި ސިގްނަލް މިއަދު ވަނީ ރަތް ވެފަ އެވެ. ދަރަނި ނުދެއްކި މިއަދު ރާއްޖެވަނީ ޑީފޯލްޓް ވުމާއި ގާތުގައި ކަމަށް ދުނިޔޭގެ މާލީ އިދާރާތަކުން އަންނަނީ އިންޒާރު ދެމުން ނެވެ.