އަންނަ އަހަރަށް ލަފާކޮށް ރައްޔިތުންގެ މަޖިލީހަށް ހުށަހަޅާފައިވާ ދައުލަތުގެ ބަޖެޓުގައި އެއްވެސް ތަފުސީލެއް ނެތުމުން "ތަފްސީލު ނެތް ވާނުވާއެއް ނޭނގޭ" ކަމަށް ވިދާޅުވެ، ބަޖެޓު އަނބުރާ ފޮނުވާލަން މީދޫ ދާއިރާގެ މެމްބަރު އަހުމަދު ސިޔާމް މުހައްމަދު މިއަދު ގޮވާލައްވައިފި އެވެ.

ބަޖެޓަށް މިއަދު ބަހުސް ކުރައްވަމުން ސަރުކާރު ހިންގާ ކޯލިޝަންގައި ހިމެނޭ ސިޔާމް ވިދާޅުވީ މިއީ އޭނާގެ މަޖިލީހުގެ ހަޔާތުގައި ވެސް ތަފްސީލެއް ނެތް ގޮތަކަށް ބަޖެޓެއް ހުށަހެޅި ފުރަތަމަ ފަހަރު ކަމަށެވެ. ސިޔާމް އެންމެ ބޮޑަށް ކަންބޮޑުވުން ފާޅުކުރެއްވީ ރަށްރަށަށް ގެންނަ ތަރައްގީގެ ތަފްސީލުތައް ނެތުމުންނެވެ.

އެ މަނިކުފާނު ވިދާޅުވީ، މިހާރު ހުށަހަޅާފައި އޮތް ބަޖެޓަކީ ވިޔަފާރިއާ، ޓްރާންސްޕޭރެންސީ އަދި ޑިމޮކްރަސީއާ ވަރަށް ދުރު ވިސްނުމެއްގެ ބަޖެޓެއް ކަމަށެވެ. ރައްޔިތުން ހޮއްވަވާފައިވާ މެންބަރެއްގެ ހައިސިއްޔަތުން އެ ރައްޔިތުންނަށް މިއަދު ޖަވާބުދާރީވާންވީ ކިހިނެއްތޯ ސިޔާމް ސުވާލުއުފެއްދެވިއެވެ.

ވިދާޅުވީ މިހާރު ބަޖެޓް އޮތް ގޮތުން އެއީ ސައްތައިން ސައްތަ ރަނގަޅު ބަޖެޓެއް ކަމަށް ބުނަން ހެޔޮ ނުވާނެ ކަމަށެވެ. އަދި އެއަށް ވޯޓް ދީފިނަމަ ނޭނގެެ ކަމަކަށް ވޯޓު ދެވޫނީ ކަމަށާއި އެއީ ދީނީ ގޮތުން ނުރައްކަލަކަށް ވެދާބެ ކަމަށް ވެސް ނުރައްކާކަން ސިޔާމު ވިދާޅުވި އެވެ.

ސިޔާ އިތުރަށް ވިދާޅުވީ އަޅުގަނޑުމެންނަށް ނޭނގި ހުރެ އެއްޗަކަށް ވޯޓު ދެވުނީމާ ގިޔާމަތް ދުވަހުން ވެސް އެކަމުގެ އަޒާބު އަޅުގަނޑުމެންނަށް ﷲ ސުބްހާނަހޫ ވަތައާލާ ދެއްވާނެ ކަމަށެވެ.

ބަޖެޓުގައި ހިމަނާފައިވާ ބައެއް ނަންބަރުތަކަށް އަލިއަޅުއްވާލަމުން ވިދާޅުވީ 2024 ވަނަ އަހަރު ފޮރިން މިނިސްޓްރީއަށް ކަނޑައެޅި ބަޖެޓަށްވުރެ 40 ޕަސެންޓް މިފަހަރު މަތިކޮށްފައިވާ ކަމަށެވެ. އެމްބަސީތަކަށް އެތައް ސަތޭކަ މިލިއަނެއް ހަރަދުކުރާއިރު އެތަންތަނުން ދޭ ހިދުމަތެއް ނެތް ކަމަށެވެ.

އެ މަނިކުފާނު ތަކުރާރުކޮށް ގޮވާލެއްވީ ބަޖެޓު އަނބުރާ ގެންދިޔުމަށެވެ. އަދި، ތަފުސީލުތައް ހިމަނުއްވާ ބަޖެޓު އިސްލާހު ކުރުމަށް ފަހު އަލުން ހުށަހެޅުމަށެވެ. އެހެން ނޫންނަމަ، ބަޖެޓު ފާސްކުރަން ވޯޓު ނުދެއްވާނެ ކަމަށް އެ މަނިކުފާނު ވިދާޅުވި އެވެ.

އަންނަ އަހަރަށް ލަފާކޮށް ސަރުކާރުން ހުށަހަޅާފައި ވަނީ ޖުމްލަ 56.6 ބިލިއަން ޑޮލަރުގެ ބަޖެޓެކެވެ.

މި ބަޖެޓްގައި ތަފުސީލުތައް ނެތް ކަމަށް ބުނެ އިދިކޮޅު ޕާޓީ، އެމްޑީޕީން ވެސް އަންނަނީ ތަކުރާރުކޮށް ކަންބޮޑުވުން ފާޅުކުރަމުންނެވެ.