ރައީސް ޔާމީން ވިދާޅުވީ ސަރުކާރުން ބަޖެޓު ގަނޑުކޮށް ފާސްކުރި ވައްކަންކުރަން ކަމަށް / ތޭރަ އޮންލައިން
ސިޔާސީ
ތަފްސީލަކާ ނުލާ ބަޖެޓު ފާސްކުރުމުން ރައީސް ޔާމީންގެ ތުހުމަތެއް ސަރުކާރަށް!
Mariyam Isaadha
މަރިޔަމް އިސާދާ
14 ފެބްރުއަރީ 2025
މާލެ ސިޓީ

ތަފުސީލަކައި ނުލާ މި ސަރުކާރުގެ ސުޕަރ މެޖޯރިޓި އޮތް ރައްޔިތުންގެ މަޖިލީހުން ބަޖެޓް ފާސްކުރުމުން ރައީސް އަބްދުﷲ ޔާމީންގެ ތުހުމަތެއް ސަރުކާރަށް އަމާޒުކުރައްވައިފިއެވެ.

ބުރާސްފަތި ދުވަހުގެރޭ ޕީއެންއެފްގެ ޖަލްސާގައި ވާހަކަ ފުޅު ދައްކަވަމުން ރައީސް ޔާމީން ވަނީ 2025 ވަނަ އަހަރަށް ލަފާކޮށް ފާސްކުރި ބަޖެޓުގެ އެއްވެސް ތަފްސީލެއް ޖަހާފައި ނުވަނީ ސަރުކާރުން ވައްކަން ކުރަންވެގެން ކަމަށް ވިދާޅުވެފައެވެ.

އެގޮތުން އެމަނިކުފާނު ވިދާޅުވީ، ސަރުކާރު ތެރެއިން މިހާރުވެސް ބޮޑެތި ވައްކަންތައް ރައްޔިތުންގެ ފައިސާއިން ކުރަމުންދާއިރު ވެރިން ޖަވާބުދާރީ ކުރުވޭނެ ގޮތެއް ނެތް ކަމަށާ އެގޮތުން މި އަހަރުގެ ބަޖެޓު ގަނޑުކޮށް ޖަހާ ފާސްކުރީ މިހާރުވެސް ސަރުކާރުން ކުރަމުންދާ ވައްކަންތައް އިތުރަށް ކުރުމަށް މަގު ފަހިކުރުމަށް ކަމަށް ރައީސް ޔާމީން ވިދާޅުވިއެވެ.

އަޅުގަޑަށް އެންމެ އުނދަގޫ ވާ ކަމަކީ، މިހާރު އަޅުގަޑުމެންނަށް މި ފެންނަނީ ގަނޑުކޮށް ބަޖެޓު ފަސްކުރީ އައިޓަމްތަކެއް ނުޖަހާ. މީ ވައްކަން ކުރަން ކުރި ކަމެއް. ބަޖެޓުގައި އައިޓަމެއް ނުޖަހާ ޚަލީފާއެއްގެ އަތްމައްޗަށް ދިނީމާ ކުރާނީ ބޮޑެތި ވައްކަން. ނެތޭ ޖަވާބުދާރީ ކުރުވޭނެ ގޮތެއްވެސް.

- ރައީސް ޔާމީން

ރައީސް ޔާމީން ވަނީ މީގެ ކުރިންވެސް ބަޖެޓާ ގުޅިގެން ކަންބޮޑުވުންތަކެއް ފާޅުކުރައްވާފައެވެ. އެގޮތުން އެމަނިކުފާނު ވަނީ އެއްވެސް މެމްބަރެއްގެ ދާއިރާއަށް ޕިއެސްއައިޕީ ޕްރޮޖެކްޓެއްވެސް ބަޖެޓުގައި ޖަހާފައި ނެތުމުން އެކަމުގެ ކަންބޮޑުވުން ފާޅުކުރައްވާފައެވެ.

މި އަހަރަށް ލަފާކޮށް ރައްޔިތުންގެ މަޖިލީހަށް ސަރުކާރުން ހުށަހަޅާ ފާސްކޮށްފައިވަނީ 56.6 ބިލިއަން ރުފިޔާގެ ރެކޯޑު ބަޖެޓެކެވެ. ބަޖެެޓުގައި ސަބްސިޑީތަކަށް ކަނޑައެޅި އަދަދު މަދުވުމާ އަދި ވަކިވަކި ރަށްރަށަށް މަޝްރޫއުތަކުން ހަރަދު ކުރާނެ މިންވަރު ނުޖަހާ އޮތުމުން އިދިކޮޅު މެމްބަރުން ކަންބޮޑުވުން ފާޅުކޮށްފައިވެއެވެ. އަދި މި އަހަރުގެ ބަޖެޓުގައި ކައުންސިލްތަކަށް ދިނުމަށް ކަނޑައަޅާފައި އޮތް އަދަދު ބޮޑުތަނުން މަދުކޮށްފައިވެސް ވެއެވެ.

ކޮމެންޓު
Copyright © 2013-2025 Media Ring Pvt Ltd.
All rights reserved