އައިޖީއެމްއެޗުގައި މަސައްކަތް ކުރި ފިލިޕީންސްގެ ނަރުހެއް ކަމަށްވާ މޭރީ ގްރޭސް އޮނެޑް ޕިނެޑާގެ މަރުގެ މައްސަލާގައި ޝަރީއަތް ނިމެންދެން ބަންދުކޮށްފައިވާ ހަލީމަތު ލަމްހާ އަބްދުއްރަހްމާނު ބަންދުން ދޫކޮށްލަން ކްރިމިނަލް ކޯޓުން އަމުރުކުރި ކުރުން ދައުލަތުން ހައި ކޯޓުގައި އިސްތިއުނާފުކޮށްފި އެވެ.

މޭރީގެ މަރުގެ މައްސަލާގައި ޝަރީއަތް ނިމެންދެން ބަންދުކޮށްފައި ހުރި ލަމްހާ، ބަންދުން ދޫކޮށްލަން ކްރިމިނަލް ކޯޓުން ނިންމީ މިދިޔަ ހަފްތާ ގައެވެ.

ހައި ކޯޓުގެ ރަޖިސްޓްރީން ދައްކާ ގޮތުގައި ކްރިމިނަލް ކޯޓުގެ އަމުރު އިސްތިއުނާފުކުރީ މިދިޔަ ބުރާސްފަތި ދުވަހުގަ އެވެ.

ލަމްހާ ދޫކޮށްލާފައި ވަނީ ހަ ޝަރުތަކާ އެކުގައެވެ. އެއީ އޭނާ ރާއްޖެއިން ފުރައިގެން ނުދިއުމާއި، ގާނޫނާ ހިލާފު އަމަލެއް ނުކުރުމާއި، ކޯޓަށް ގަޑިއަށް ހާޒިރުވުމާއި، ޒަރޫރީ ބޭނުމެއްގައި ނޫނީ ގެއިން ބޭރަށް ނުދިއުމާއި، މައްސަލައިގެ ހެކިންނާއި މޭރީގެ އާއިލާއާ ބައްދަލު ނުކުރުމާއި، ވަކި ގަޑިތަކެއްގައި ގޭގައި ހުރުމެވެ.

ދައުލަތުން މި މައްސަލާގައި ލަމްހާގެ މައްޗަށް ތިން ދައުވާއެއް އުފުލާފައި ވެއެވެ. އޭގެ ތެރޭގައި މޭރީގެ މަރުގައި އެހީތެރިވެދިނުމުގެ ދައުވާ ހިމެނެއެވެ. މި މައްސަލާގައި މޭރީގެ ފިރިމީހާ މާވިންގެ މައްޗަށް ގަސްތުގައި މީހަކު މަރާލުމުގެ ދައުވާ ކޮށްފައި ވެއެވެ.

މީގެ ކުރިން މިދިޔަ އަހަރު ވެސް ކުއްލި ގޮތަކަށް ކްރިމިނަލް ކޯޓުން ލަމްހާ ދޫކޮށްލި އެވެ. އޭރު ހައި ކޯޓުން ނިންމީ ލަމްހާ ދޫކޮށްލީ ގާނޫނާ ހިލާފަށް ކަމަށާއި އެހެންވެ، އޭނާ އަލުން ޝަރީއަތް ނިމެންދެން ބަންދުކުރަން ހައި ކޯޓުން އެންގި އެވެ.

ލަމްހާ ދެ ފަހަރެއްގެ މަތިން ދޫކޮށްލިއިރު ވެސް، އެ މައްސަލާގައި ދައުވާލިބޭ މާވިން އަދިވެސް ހުރީ ބަންދުގަ އެވެ.