ރައީސް މުހައްމަދު މުއިއްޒާ ސަރުކާރުގެ ކިބައިންވެސް ފެންނަމުންދަނީ ޑަބަލް ސްޓެންޑަރޑްގެ އިންތިހާ ކަމަށް ކުރީގެ ނައިބު ރައީސް ޑރ މުހައްމަދު ޖަމީލު އަހުމަދު ވިދާޅުވެއްޖެއެވެ.

އެމަނިކުފާނު މިފަދައިން މީދު ދާއިރާގެ މެމްބަރު އަހުމަދު ސިޔާމް މިއަދުގެ މަޖިލީހުގައި ދެއްކެވި ވާހަކަތަކަށް އިޝާރާތްކުރައްވާ އެކްސްގައި ކުރެއްވި ޕޯސްޓެއްގައެވެ.

މިއަދުގެ މަޖިލީހުގައި ބަޖެޓަށް ބަހުސް ކުރައްވަމުން އެމްޑީއޭގެ ރައީސްކަން ވެސް ކުރައްވާ ސިޔާމް ވަނީ ރާއްޖެއިން ބޭރުގެ އެކި ގައުމުތަކުގައި ހިންގާ ގިނަ އެމްބަސީތަކުން ވާ ފައިދާއެއް ނެތް ކަމަށާއި، އެހެންވެ އެމްބަސީތަކުގެ 50 ޕަސެންޓް މަދުކުރަން ޖެހޭ ކަން ފާހަގަކޮށްފައެވެ.

އެ ވާހަކަތަކަސް އިޝާރާތްކުރައްވާ ޑރ ޖަމީލު ވިދާޅުވީ ސިޔާމް ދެއްކެވި އެ ވާހަކަތަކަީ އެމަނިކުފާނުވެސް ތަކުރާރު ކުރަމުން އަންނަ ވާހަކަތަކެއް ކަމަށެެ.

އެގޮތުން ނިކަމެތި ރައްޔިތުންނަށް ފޯރުކޮށްދޭ ޚިދުމަތްތައް އުނިކޮށް، އާސަންދަ ކަނޑާ، 65 އަހަރުވީ މީހުންނަށްދޭ 5000 ރުފިޔާ ކަނޑާފައި، ސަބްސިޑީޒް ކަޑާނފައި، ބަދަލުގައި ހެސް ކިޔާފައި ޓެކްސް ބޮޑުކޮށް ރަައްޔިތުންގެ އަތުން ނަގާ ފައިސާގައި ދުނިޔޭގެ ކޮންމެ ތަނެއްގައި އެމްބަސީތައް ގާއިމްކޮށް އެތަންތާ ތިބި މީހުންނަށް މުސާރަ އެމީހުންގެ ކުދިންނަށް ހިލޭ ކިޔަވައިދީ، އެ މީހުން ޗުއްޓީ ހޭދަކޮށް، ބާކީ ވަގުތު މަޖާކުރުންކަމަށެވެ.

ޔޫރަޕާ، ޔޫކޭ، ބްރެޒިލް، ޖަރުމަނު، ޖެނީވާ، މިފަދަ އެތައް ގައުމެއްގައި އެމްބަސީ ހުޅުވާ އަދި އިތުރު ތަންތަން ހުޅުވަން ނިންމަމުންދާއިރު މިއީ ތަޞައްވުރު ނުކުރެވޭވަރުގެ އިންތިހާ ޚަރަދު ބޮޑެތި ކަންކަން ކަމަށް ޑރ ޖަމީލުވަނީ ފާހަގަކުރައްވާފައެވެ. ހަމަ އެހެންމެ އެތަން ތަނުގެ ތިބޭ މީހުންގެ ޚަރަދު ގައުމުގެ ރައީސާ ބޮޑެތި ކުންފުނިތަކުގެ ވެރިންގެ މުސާރައަށްވުރެ ބޮޑުއިރު، އެމްބަސީތަކުގައި ތިބެނީ ކޮން މަސައްކަތެއްތޯ އައްސަވާ ޑރ ޖަމީލު ވަނީ ސުވާލެއް ވެސް އަމާޒުކުރައްވާފައެވެ. އަދި އެމީހުން އެ މަގާމުތަކުގައި ތިބެގެން ގައުމަށްވީ ކޮން ފައިދާއެއް ތޯއާ ރާއްޖެއަކީ މިހާ ބޭކާރު ކަންކަން ކުރަން އެހާ ފުދުންތެރި ގައުމެއްތޯ ވެސް ޑރ ޖަމީލު ވަނީ ސުވާލު އުފައްދަވާފައެވެ. ހަމައެހެންމެ އެތަންތާ ތިބި ގިނަ މީހުންނަކީ އެދާއިރާގެ ތައުލީމެއް، ތަޖްރިބާއެއް ނެތް، ރައީސް މުއިއްޒުއާ އާއިލީ ގޮތުންނާ އަދި އެހެން ގޮތް ގޮތުންވެސް ގާތް މީހުން ކަމަށް ޑރ ޖަމީލު ވަނީ ވިދާޅުވެފައެވެ.

ބަޔަކު އަޅެ މުއިއްޒުގެ މުނާފިގު ކަމާދޭތެރޭ މޮޔަނުވާނެތޯ އައްސަވާ ޑރ ޖަމީލު ވިދާޅުވީ ސަރުކާރާ ރައީސް މުއިއްޒުގެ ކިބައިން ވެސް ފެނިގެން ދަނީ ޑަބަލް ސްޑޭންޑަޑްގެ އިންތިހާ ކަމަށެވެ.

އެގޮތުން ރައްޔިތުން ފެލާފައި، ޓެކްސް ޕޭޔަރުންގެ ފައިސާގައި މި ސަކަރާތަށް ހުއްޓުމެެއް ނެތް ކަމަށާ މިހާ ފާޅުކަން ބޮޑުކޮށް މިފަދަ ޚިޔާނާތްތެރި ސަރުކާރަށް ވާގިވެރިވުމަކީ ހަގީގަތުގައިވެސް ފާފަވެރިވާނެކަމެއް ކަމަށްވެސް ޑރ ޖަމީލު ވަނީ ވިދާޅުވެފައެވެ.