ހުޅުމާލޭގައި މޫދަށް އެރި އުޅުނު ކުޑަކުއްޖަށް ޖިންސީ ގޯނާ ކުރި ކަމަށް ތުހުމަތުކުރެވޭ މައްސަލައެއް ފުލުހުން ބަލަން ފަށައިފި އެވެ.
ފުލުހުން މިއަދު ބުނީ ފިރިހެން ކުއްޖަކަށް ޖިންސީ ގޯނާކުރި ކަމަށް ތުހުމަތު ކުރެވޭ މައްސަލައެއް ތަހުގީގު ކުރަމުން އަންނަ ކަމަށެވެ.
ނަމަވެސް އިތުރު ތަފްސީލެއް ހާމައެއް ނުކުރެ އެވެ.
ފުލުހުން އެހެން ބުނެފައި މިވަނީ، ހުޅުމާލޭ ގޮނޑުދޮށުގައި ކުޑަކުދިންނަށް ޖިންސީ ގޯނާކުރާ ކަމަށް ތުހުމަތު ކުރެވޭ މީހަކު ފުލުހުންނާ ހަވާލުކުރި ކަމަށް ސޯޝަލް މީޑިއާގައި މީހަކު ބުނި ފަހުންނެވެ.
އެ ޕޯސްޓުގައިވަނީ އެ މީހާ ކުޑަކުދިންނާ ބެހި، އެ ކުދިން ކައިރީ އެކަހެރި ހިސާބުތަކަށް ދާން ބުނެ، އެ ކުދިންގެ ނުރުހުމުގައި ގައިގައި އަތްލާން އުޅުނު ކަމަށެވެ. އަދި އެ މީހާ ފުލުހުންނާ ހަވާލުކުރި ނަމަވެސް އެ މީހާ ދޫކޮށްފައިވާ ކަމަށް އެ ޕޯސްޓުގައިވެއެވެ.
އެނގިފައިވާ ގޮތުގައި ފިރިހެން ކުއްޖާއާ ބެހިފައި ވަނީ އުމުރުން ދުވަސްވީ ފިރިހެނެކެވެ.
