ބޭރުފައިސާއާ ބެހޭ ގަވާއިދަށް ގެނައި ބަދަލާ ގުޅިގެން އުފެދިފައިވާ ގޮންޖެހުންތަކަށް ހައްލު ހޯދުމަށް ޓަކައި ސަރުކާރުން އެ ވިޔަފާރިވެރިންނާއެކު މަޝްވަރާކޮށްގެން ކުރިޔަށް ދިއުމަށް ރައްޔިތުންގެ މަޖިލީހުގެ މަހިބަދޫ ދާއިރާގެ ޕީއެންސީ މެންބަރު އަހުމަދު ތޯރިގު (ޓޮމް) ގޮވާލައްވައިފި އެވެ.

ރިސޯޓުތަކަށް ލިބޭ ޑޮލަރު ރާއްޖޭގެ ބޭންކްތަކުން މާރުކުރަން ލާޒިމްކޮށް ހަދާފައިވާ ގަވާއިދަށް އަމަލުނުކުރާނެ ކަމަށް ބައެއް ވިޔަފާރިވެރިން ބުނަމުންދާއިރު، ސަރުކާރަށް ތާއީދުކުރާ ފަރާތްތަކުން އަންނަނީ ފާޑުކިޔުންތައް އަމާޒުކުރަމުންނެވެ.

ބަޖެޓް ބަހުސްގައި ވާހަކަދައްކަމުން ތޯރިގު ވިދާޅުވީ ރާއްޖޭގެ އިގްތިސާދު އޮތީ ރަނގަޅު ހިސާބެއްގައި ނޫން ކަމަށާއި ރާއްޖޭގައި ތިބި ފުންނާބު އިސް ވިޔަފާރިވެރިންނާއި ސިޔާސީ ގޮތުން ދިމާކުރުމަކީ އެންމެ ރަނގަޅު ކަމެއް ނޫން ކަމަށެވެ.

ފުރަތަމަ ކަމަކަށް، ގައުމުގެ ބޮޑެތި ވިޔަފާރިވެރިންނަށް ބަދުބަސް ބުނުން ހުއްޓާލަން ސަރުކާރާއި ޕީއެންސީގެ މަޖިލިސް މެންބަރުންނާއި ސިޔާސީ ފަރާތްތަކާއި އެކްޓިވިސްޓުންނަށް ގޮވާލާ ކަމަށް ޓޮމް ވިދާޅުވި އެވެ.

އެންމެ ރަނގަޅު ގޮތަކީ މަޝްވަރާ ކޮށްގެން ކަންކަން ހައްލުކުރުން ކަމަށާއި ސަރުކާރާއި ވިޔަފާރިވެރިން މަޝްވަރާ ކޮށްގެން ޑޮލަރު މައްސަލާގައި މެދު މިނުގެ ހައްލަކަށް އަންނާނެ ކަމަށް އުންމީދު ކުރައްވާ ކަމަށް އޭނާ ވިދާޅުވި އެވެ.

ބޭރުފައިސާއާބެހޭ ގަވާއިދު އޮތް ގޮތުން ޓޫރިސްޓު ރިސޯޓުތަކުން ކޮންމެ މަހެއްގެ ތެރޭ އަންނަ ކޮންމެ ޓޫރިސްޓަކަށް 500 އެމެރިކާ ޑޮލަރުގެ ރޭޓުން މާރުކުރަން މަޖުބޫރުވާނެއެވެ. އަދި ގެސްޓު ހައުސްތަކަށް އަންނަ ކޮންމެ ފަތުރުވެރިއަަކަށް 25 ޑޮލަރު މާރުކުރަން މަޖުބޫރުވާނެ އެވެ.

އެމްއެމްއޭގެ އުސޫލު ބަދަލުކުރަން ވިޔަފާރިވެރިން އެދިފައިވަނިކޮށް، ސަރުކާރަށް އެއް އަހަރު ފުރުން ފާހަގަކުރަން ސޯޝަލް ސެންޓަރުގައި މިދިޔަ އާދީއްތަ ދުވަހުގެ ރޭ ބޭއްވި ޖަލްސާގައި، ރައީސް މުހައްމަދު މުއިއްޒު ވަނީ އެ ގަވާއިދު ބަދަލު ނުކުރާނެ ކަމަށް ވިދާޅުވެފަ ޓޫރިޒަމް ދާއިރާގެ ވިޔަފާރިވެރިންނަށް އިންޒާރު ކުރައްވާފަ އެވެ.