ރައީސް އަބްދުﷲ ޔާމީންގެ ގައުމީ ފިކުރު ފަކުރުކުރުމަށް ފަހު ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރަށް "ދިވެހީންގެ ރާއްޖެ" ޝިއާރު ބޭނުން ނުކުރެވޭނެ ކަމަށާއި ސަރުކާރުން މި ޝިއާރު ބޭނުން ކުރުން ހުއްޓާލުމަށް ރައީސް ޔާމީން އުފައްދަވާ ޕާޓީ، ޕީއެންއެފް އުފެއްދެވުމުގައި އިސްކޮށް ހަރަކާތްތެރިވާ މުހައްމަދު މަލީހު ޖަމާލް ގޮވަލައިފިއެވެ.

މަލީހު މިފަދައިން ވިދާޅުވެފައިވަނީ އާދިއްތަ ދުވަހު ޕީއެންއެފުން ބޭއްވި ފްރޮންޓް ޖަލްސާގައި ވާހަކަ ދައްކަވަމުންނެވެ.

"ދިވެހިންގެ ރާއްޖެ" އަކީ ވަތަނީ، ގައުމީ އަދި ދީނީ ފިކުރެއްގެ މައްޗަށް ބިނާ ވެގެން ރައީސް ޔާމީން އުފައްދަވާފައިވާ އެއްޗެއް ކަމަށާއި އަދި ޑރ މުއިއްޒުއަކަށް ވެސް އަދި އަބްދުއްރަހީމް އަކަށް ވެސް އެ ޝިއާރެއް ބޭނުން ނުކުރެވޭނެ ކަމަށް މަލީހު ވަނީ ވިދާޅުވެފައެވެ.

މީގެ އިތުރުން މަލީހު ވިދާޅުވީ ދިވެހި ރައްޔިތުން ވޯޓު ދެއްވީ ރައީސް ޔާމީންގެ ފިކުރަށާ އެމަނިކުފާނު މިނިވަންކުރުމަށް ކަމަށެވެ. އަދި އެ ހަގީގަތެއް އޮޅުވާ ނުލެވޭނެ ކަމަށް ވެސް މަލީހު ވަނީ ވިދާޅުވެފައެވެ.

މީގެ އިތުރުން މަލީހު ވަނީ ރައީސް ޔާމީން ވަގުތުން ވަގުތަށް މިނިވަން ކުރުމަށް ގޮވާލާފައެވެ.