ސަހްޔޫނީން ފަލަސްތީނުގެ ގާޒާ ސަރަހައްދުގައި ހިންގަމުންދާ ލާއިންސާނީ ހަނގުރާމަ އެއްވެސް ޝަރުތަކާ ނުލައި ދާއީމީކޮށް ހުއްޓައިލުމަށް ގޮވާލައި އދ.ގެ ސަލާމަތީ މަޖިލީހަށް އިއްޔެ ހުށަހެޅި ގަރާރު އެމެރިކާއިން އަނެއްކާ ވެސް ވީޓޯކޮށް ބޭރުކޮށްލައިފި އެވެ.

ސަލާމަތީ މަޖިލީހަށް، އެ ގަރާރު ހުށަ ހަޅާފައި ވަނީ އެ މަޖިލީހުގައި ހިމެނޭ ދާއިމީ ނޫން 10 މެންބަރު ގައުމުންނެވެ. އެ ގަރާރުގައި ވަނީ 13 މަސް ދުވަހަށްވުރެ ގިނަ ދުވަސްވެފައި ވަނީ ގާޒާ ހަނގުރާމަ ވަގުތުން ވަގުތައް، އިތުރު ޝަރުތަކާ ނުލައި ދާއިމީކޮށް އެކީ އެކައްޗަކަށް ހުއްޓާލަން ގޮވާލާފަ އެވެ.

އަދި ހަމާސުން ރަހީނުކޮށްފައިވާ މީހުން ދޫކޮށްލުމަށް އެ 10 ގައުމުން ވަނީ ވަކިން ގޮވާލާފަ އެވެ. އެމެރިކާއިން ގަރާރު ވީޓޯ ކުރުމާއެކު، ގަރާރު ހުށަހެޅި ގައުމުތައް ކަމަށްވާ އަލްޖީރިއާ، އިކުއެޑޯ، ގަޔާނާ، ޖަޕާން، މަލްޓާ، މޮޒެމްބިކް، ދެކުނު ކޮރެއާ، ސިއެރާ ލިއޯން، ސްލޮވޭނިއާ އަދި ސްވިޒަލޭންޑް އިން ވަނީ އެމެރިކާއަށް ފާޑުކިޔާފަ އެވެ.

ގަރާރު ފާސް ކުރުމަށް 14 ވޯޓް ލިބުނެވެ. އެކަމަކު އެ މަޖިލީހުގެ ދާއިމީ މެންބަރު އެމެރިކާއިން ގަރާރަށް "ނޯ" ޖެހުމުން ފާހެއް ނުވި އެވެ.

މިއީ މިދިޔަ އަހަރުގެ އޮކްޓޯބަރު މަހު ސަހްޔޫނީން ގާޒާއަށް ހަމަލާތައް ދޭން ފެށިފަހުން، ހަނގުރާމަ ހުއްޓާލުމަށް ގޮވާލާ ގަރާރު އެމެރިކާގެ ރައީސް ޖޯ ބައިޑަންގެ ވެރިކަމުގައި ވީޓޯ ކުރި ހަތަރުވަނަ ފަހަރެވެ.

ސަލާމަތީ މަޖިލީހުގެ ގަރާރެއް ތަސްދީގު ކުރުމަށް، އެކަމަށް ތާއީދުކުރާ މަދުވެގެން ނުވަ ވޯޓާއި ދާއިމީ ފަސް މެންބަރުން ކަމަށްވާ އެމެރިކާ، އިނގިރޭސިވިލާތް، ފަރަންސޭސިލާތް، ރަޝިޔާ ނުވަތަ ޗައިނާގެ ތެރެއިން އެއްވެސް މެންބަރު ގައުމަކުން ގަރާރު ވީޓޯކޮށްގެން ނުވާނެއެވެ. ދާއިމީ ފަސް މެންބަރު ގައުމަކީ ވީޓޯކުރުމުގެ ބާރުލިބިފައިވާ ފަސް ގައުމެވެ.

ސަހްޔޫނީނަށް ވަރަށް ބޮޑަށް ވާގިވެރިވެވަޑައިގަންނަވާ ބައިޑަންގެ އެ ސްޓޭންޑާ ގުޅިގެން ހައްގުތަކަށް ވަކާލާތުކުރާ ފަރާތްތަކުގެ ފާޑުކިޔުން އެމަނިކުފާނަށް ވަރަށް ބޮޑަށް ވަނީ އަމާޒުވެފަ އެވެ.

ގާޒާގައި ބަނޑުހައި ހޫނުކަމުގެ ހާލަތުގައި ތިބި ހާލުގައި ޖެހިފައިވާ މީހުންނަށް ކާނާ ފޯރުކޮށް ދިނުމުގެ ފުރުސަތު ވަގުތުން ފަހިކޮށް ދިނުމަށް ވެސް ގަރާރުގައިވެ އެވެ.

އެމެރިކާއިން އެ ގަރާރު ވީޓޯ ކުރުމުން ޣައްޒާ އަށް ކާނާ އާއި އިންސާނީ އެހީތެރިކަން ފޯރުކޮށް ދިނުމުގެ ދޮރު ހުޅުވޭނެ ގޮތެއް ނެތެވެ. ސަހްޔޫނީން ހުރަސް އަޅަމުންދާތީ މިހާރު ވެސް އެފަދަ އެހީތައް ގާޒާގެ އެތެރެއަށް ވެއްދޭނެ ގޮތެއް ނެތެވެ.

މިދިޔަ އަހަރުގެ އޮކްޓޫބަރުން މަހުން ފެށިގެން ސަހްޔޫނީން ގާޒާއަށް ދެމުންދާ ހަމަލާތަކުގައި 44،300 އަށް ވުރެ ގިނަ ރައްޔިތުން ވަނީ ޝަހީދުކޮށްލާފަ އެވެ. މުޅި ގާޒާހެން ފުނޑުފުނޑު ކޮށްލާފައިވާ އިރު، ގާޒާގެ ރައްޔިތުން ވަނީ ގެދޮރު ގެއްލި ދާނެ އިތުރު ތަނެއް ނެތި ތާށިވެފަ އެވެ.