ގާނޫނުއަސާސީއަށް ހަވަނަ އިސްލާހު ގެނައުމުގެ ބިލު އިއްޔެ ރައްޔިތުންގެ މަޖިލީހަށް ހުށަހަޅައި، އިއްޔެ ފާސްކޮށް ތަސްދީގުކުރެއްވީ ރިކޯޑު ސްޕީޑެއްގައިތޯ ކުރީގެ ރައީސް މައުމޫން އަބްދުލްގައްޔޫމް މިއަދު ސުވާލު އުފައްދަވައިފިއެވެ.

ސަރުކާރުގެ ފަރާތުން ގާނޫނު އަސާސީއަށް 3 އިސްލާހެއް އިއްޔެ ހުށައަޅާ އިއްޔެ އިން އިއްޔެ އަށް އިސްލާހު ފާސްކޮށްވަނީ ނިންމާފައެވެ. ހެނދުނު ހުށައެޅި އިސްލާހުގެ މަސައްކަތައް މެންދުރު މަޖިލީހުން ނިންމާ ހަވީރު 5:51 ގައި ވަނީ ފާސްކޮށްފައެވެ. އަދި ރޭ އިރާކޮޅު ރައީސް ޑރ. މުއިއްޒު ވަނީ އެ ބިލް ތަސްދީގު ކުރައްވާފަ އެވެ.

އެ ކަމާ ގުޅިގެން މައުމޫން މިއަދު އެކްސްގައި ކުރެއްވި ޕޯސްޓެއްގައި ވަނީ ގާނޫނުއަސާސީއަށް އިސްލާހު ހުށަހަޅައި ފާސްކުރީ ހަ ގަޑިއިރުން ކަމަށް ވިދާޅުވެފައެވެ. އެއީ، ދުނިޔޭގެ ރިކޯޑެއްތޯ އެ މަނިކުފާނު ސުވާލު އުފެއްދެވި އެވެ.

މިކަމާ ގުޅިގެން ގާނޫނީ ފަންނުގެ ބޭފުޅުންނާއި ސިޔާސީ ޕާޓީ ތަކާއި މަދަނީ ޖަމިއްޔާ ތަކުން އަންނަނީ ކަންބޮޑުވުން ފާޅުކުރަމުންނެވެ.

މަދަނީ 11 ޖަމްއިއްޔާއަކުން ގުޅިގެން ނެރުނު ބަޔާނެއްގައި ބުނީ މިދިޔަ އަންގާރަ ދުވަހު އިސްލާހު ހުށަހަޅައި އަދި އިއްޔެ ފާސްކޮށް ތަސްދީގުކުރި ގާނޫނު އަސާސީއަށް އިސްލާހު ގެނައުމުގެ ބިލަކީ އެއްވެސް ހާމަކަމެއް ނެތި އަވަސް އަރުވާލައިގެން އަދި ގާނޫނު ހެދުމުގައި ގެންގުޅެންޖެހޭ އިޖުރާއަތްތަކާއި އުސޫލުތަކަށް ބެލުމެއް ނެތި ފާސްކުރި ބިލެއް ކަމެއް ކަމަށް ގަބޫލުކުރާ ކަމަށެވެ.

ދައުލަތުގެ ހުރިހާ ބާރެއް ފެށިގެން އަންނަނީ ރައްޔިތުންގެ ކިބައިން ކަމަށާއި އަދި އެ ބާރުތައް ދެމި އޮންނާނީ ވެސް ރައްޔިތުންގެ ކިބައިން ކަމަށް ގާނޫނު އަސާސީގެ ހަތަރު ވަނަ މާއްދާގައި ބުނެފައިވާއިރު، އެ އިސްލާހުތަކަކީ އެ އުސޫލާ ހިލާފު ކަމެއް ކަމަށް އެ ބަޔާނުގައިވެ އެވެ.