މަޖިލިސް މެންބަރުންގެ ގޮނޑި ގެއްލުވައިލުމުގެ ބާރު ސިޔާސީ ޕާޓީތަކަށް ލިބޭ ގޮތަށް ގާނޫނުއަސާސީއަށް މިފަހުން ގެނައި އިސްލާހަކީ ގާނޫނުއަސާސީގެ ހަތަރުވަނަ މާއްދާއިން ކަށަވަރުކޮށްދޭ ރައްޔިތުންގެ ބާރު ގެއްލޭގޮތަށް ފަރުމާ ކޮށްފައި އޮތް އިސްލާހެއް ކަަމަށް ވާތީ އެ އިސްލާހަށް ގާނޫނީ ބާރުވެރިކަން ނުލިބޭނެ ކަމަށް ކުރީގެ އުއްތަމަ ފަނޑިޔާރު، ޑރ. އަހުމަދު އަބްދުﷲ ދީދީ (ޑީޑީ) ވިދާޅުވެއްޖެ އެވެ.

މަޖިލީހުގެ މެންބަރުން ސިޔާސީ ޕާޓީއަކުން ވަކިވުމުން ގޮނޑި ގެއްލޭ ގޮތަށް ގާނޫނު އަސާސީ އިސްލާހުކުރުމަށް ސަރުކާރުގެ ފަރާތުން މަޖިލީހަށް ބިލެއް ހުށަހަޅައި، ނިމުނު ބުދަ ދުވަހު ވަނީ ފާސްކޮށްފަ އެވެ. އަދި ހަމަ އެދުވަހު ރައީސް އެ ބިލް ތަސްދީގު ކުރެއްވުމާއެކު އިސްލާހަށް އަމަލުވެސް ކުރަން ވަނީ ފަށައިފަ އެވެ.

އެ އިސްލާހާ ގުޅޭ ގޮތުން އެކްސްގައި ކުރެއްވި ޕޯސްޓެއްގައި އަބްދުﷲ ދީދީ ވިދާޅުވީ އެ އިސްލާހުގައި "އެންޓި ޑިފެކްޝަން"އާ ގުޅޭގޮތުން ހިމަނައިފައިވާ އިބާރާތަކީ ގާނޫނު އަސާސީގެ ހަތަރު ވަނަ މާއްދާގައި ކަށަވަރުކޮށްދީފައިވާ "ރައްޔިތުންގެ ބާރު" ނުވަތަ" ނުވަތަ "ރައްޔިތުންގެ ސިޔާދަތު" ގެއްލޭގޮތަށް ފަރުމާކޮށްފައިވާ ލިޔުމެއް ކަމަށެވެ.

އެއީ ރައްޔިތުންގެ ސިޔާދަތުގެ އުސޫލާ ހިލާފު ކަމެއްގެ ގޮތުގައި ސިފަކުރައްވައި އެ މަނިކުފާނު ވިދާޅުވީ، އެ އުސޫލާ ޚިލާފުވާ ގޮތަށް ގެންނަ ބަދަލެއް ގާނޫނީ ގޮތުން ބަލައި ނުގަނެވޭނެ ކަމަށެވެ.

އޭގެ އިތުރަށް އަހްމަދު ވިދާޅުވީ އާންމު އުސޫލުތަކާ ހިލާފަށް ގާނޫނުއަސާސީއަށް އިސްލާހު ގެނައުމަކީ ތަހުޒީބު މުޖުތަމައެއްގައި ކަންކަން ހިނގައިވާނެ ގޮތެއް ނޫންްކަމަށެވެ. އަދި އިއްޔެ އެ އިސްލާހުތައް ބެސްޓް ޕްރެކްޓިސްއާ ހިލާފަށް އަވަސް އަރުވާލައިގެން އެއް ދުވަސް ތެރޭ ބަހުސް ނިންމައި އިސްލާހު ގެނައުމަކީ "ނޭދެވޭ ނުފޫޒުފައި ޖެހުން ފިޔަަވައި އެހެން އެއްވެސް ޒަރޫރުތެއް އޮވެގެން ކަމަށް" ގަބޫލުނުކުރެއްވޭ ކަމަށެވެ.

ޑރ.އަހްމަދު އިތުރަށް ވިދާޅުވީ ރައްޔިތުންގެ ބާރުވެރިކަން އިތުރުކޮށް ޑައިރެކްޓް ޑިމޮކްރަސީގެ އުސޫލުތައް އިތުރުކުރުމަށް ރައްޔިތުންގެ ބާރު ކަށަވަރުކުރުމުގެ ގޮތުން "ރިކޯލް ރިފަރަންޑަމް" ދާއިރާތަކުގެ ރައްޔިތުންނަށް ލިބިދޭނެ އިސްލާހެއް ގާނޫނު އަސާސީއަށް ގެނައުން މުހިއްމު ކަމަށެވެ.

އެ އިސްލާހުތައް ފާސްކުރި ގޮތުން ޕީއެންސީގެ ބައެއް މެންބަރުން ހިމެނޭ ގޮތަށް، ސަރުކާރަށް ވަނީ ފާޑުކިޔައިފައެވެ. އެގޮތުން، އެމްޑީޕީން ވަނީ އެއީ ގާނޫނުއަސާސީގެ މައިގަނޑު އަސާސްތަކާ ފުށުއަރާ ގޮތަށް ފާސްކޮށްފައިވާ އިސްލާހުތަކެއް ކަމަށް ތުހުމަތުކޮށްފައެވެ. އަދި ކުރީގެ ބަންޑާރަނައިބު ފާތިމަތު ދިޔާނާ ސައީދު ވަނީ އެ މައްސަލަ ސުޕްރީމް ކޯޓަށް ހުށަހަޅަން ގޮވައިލައްވައިފަ އެވެ.

މީގެ އިތުރުން ކުރީގެ ރައީސް މައުމޫން ޢަބްދުލްގައްޔޫމް ވަނީ އެ އިސްލާހު ގެނައުމުގެ ބިލު އިއްޔެ ރައްޔިތުންގެ މަޖިލީހަށް ހުށަހަޅައި، ފާސްކޮށް ތަސްދީގުކުރެއްވީ ރިކޯޑު ސްޕީޑެއްގައިތޯ ސުވާލު އުފައްދަވައިފި އެވެ.