"ބުނި ބަސް" ސެގްމެންޓްގައި މިއަދު މިބަލާލަނީ 23 ޖޫން 2024 ވަނަ ދުވަހުގެ ރޭ އަބްދުއްރަހީމް އަބްދުﷲ ދެއްކެވި ވާހަކަފުޅަކަށެވެ.

ސަރުކާރު ހިންގާ ޕާޓީ ޕީއެންސީގެ އާ ޖަގަ "ޕީއެންސީ ހައުސް" ހުޅުވުމަށް ބޭއްވި ޖަލްސާގައި އަބްދުއްރަހީމް ވިދާޅުވީ އެ މަނިކުފާނު، ރައީސް މުއިއްޒު ވެރިކަމަށް ގެނައުމަށް މާ ކުރިން ބައިއަތު ހިފައިގެން ޓިކެޓު ދިން ކަމަށް ރައީސް ޔާމީނާއި ސަޕޯޓަރުން ދައްކަވާ ވާހަކަތަކަކީ ތެދެއް ކަމަށެވެ.

އެއީ ރައްޔިތުންގެ ހައްގުގައި ނިންމެވި ނިންމެވުމެއް ކަމަށާއި އެ ރޭވުން ރާވަން ޖެހުނީ ރައީސް ޔާމީންގެ ގޮތް އެނގިވަޑައިގަންނަވާތީ ކަމަށް އަބްދުއްރަހީމް ވިދާޅުވި އެވެ.

އަބްދުއްރަހީމް މިފަހުން ފާހަގަވަނީ "ދެ އަނގަ" އިން ވާހަކަ ދައްކަވާ ބޭފުޅެއްގެ ގޮތުގައި އެވެ.

އެއް މިސާލެވެ.

15 މާޗް 2023ގައި ޕީޕީއެމް އޮފީހުގައި ބޭއްވި ޖަލްސާއެއްގައި އަބްދުއްރަހީމް ވިދާޅުވީ، ޕީޕީއެމް އޮންނާނީ ރައީސް އަބްދުﷲ ޔާމީނާއެކު ގަދަކޮށް ކަމަށެވެ. އެއާއެކު، އޭނާ ގޮވައިލެއްވީ ސެޕްޓެމްބަރު ގައި ބާއްވާ ރިޔާސީ އިންތިހާބުގައި އިދިކޮޅުޕީޕީއެމުން ވާދަނުކުރާނެ ކަމަށް ބުނާ މީހުން "ހުވަފެން" ބެލުން ހުއްޓާލުމަށެވެ.

އަބްދުއްރަހީމް ވިދާޅުވީ، ޕީޕީއެމްގެ ކެންޑިޑޭޓަކަށް ޔާމީން ހުންނަވާނެ ކަމަށާއި އެ މަނިކުފާނު ޖަލުން މިނިވަންވުމުގެ މަގު ފަހިވަމުން އަންނަ ކަމަށެވެ.

އަބްދުއްރަހީމް ވިދާޅުވީ ރައީސް ޔާމީން ޖަލަށް ލާފައި ވާތީ ބައެއް މީހުން ތިބީ ވަރަށް އުފަލުން ކަމަށެވެ. އޭނާ ވިދާޅުވީ ޕީޕީއެމްގެ މެމްބަރުންނަށް ބައެއް މީހުން ގުޅާ ކަމަށާއި ޕީޕީއެމްގެ ކެންޑިޑޭޓަކު ނުހުންނާނެ ކަމަށާއި ޕީޕީއެމުން އަރާނީ އެ ޕާޓީއެއްގެ ފަހަތަށް ކަމަށް އެ ބަޔަކު ބުނާ ކަމަށެވެ.

ރައީސް ޔާމީންގެ ލަފާ ހޯދައިގެން ނޫނީ ޕީއެންސީ/ޕީޕީއެމުން ފިޔަވަޅެއް ވެސް ނާޅާނެ ކަމަށް ވެސް އޭނާ ވިދާޅުވި އެވެ. އަދި މެމްބަރުންގެ ހިތްވަރާއެކު ލީޑަޝިޕުން ކުރަނީ ރައީސް ޔާމީން ވެރިކަމަށް ގެނައުމުގެ މަސައްކަތް ކަމަށާއި އެ މަނިކުފާނު މިނިވަން ކުރުމަށް ވުރެ މުހިއްމު ކަމެއް އެ ދެ ކޯލިޝަނަށް ނެތް ކަމަށް ވެސް އަބްދުއްރަހީމް އެދުވަހު ވިދާޅުވި އެވެ.

ނަމަވެސް ރާއްޖޭގެ ވެރިކަން ރައީސް ޔާމީންގެ "ހިޔަނީގައި" ކާމިޔާބު ކުރެއްވުމަށްފަހު މަޖިލީހުގެ ރިޔާސަތުގެ ދަހިވެތިކަމުގައި އަދި މުއިއްޒުގެ ސަރުކާރުން ލިބޭ ނުހައްގު މުއްސަދިކަމުގައި އަބްދުއްރަހީމް މިއަދު ކިޔޭ ނުކިޔޭއެއް ހުދު އަދުރޭ އަށް ވެސް ނޭގެ އެވެ.