ހުޅުމާލެ ސަހަރާ މިސްކިތު އިމާމަށް ތޫނު އެއްޗެއް ބޭނުންކޮށްގެން ހަމަލާ ދޭން އުޅުނު ދިވެހި ފިރިހެނަކު ހައްޔަރުކޮށްފި އެވެ.
ފުލުހުން ބުނީ، ހުޅުމާލެ ފޭސް އެކެއްގައި ތޫނު އެއްޗެއް ބޭނުން ކޮށްގެން މީހަކަށް ހަމަލާ ދޭން އުޅުނު ކަމުގެ ތުހުމަތުގައި 33 އަހަރުގެ ދިވެހި ފިރިހެނަކު މިއަދު 18:30 ހާއިރު ހައްޔަރުކޮށްފައިވާ ކަމަށެވެ.
އަދި އެވަގުތު އެ މީހާ ހުއްޓުވަން އުޅުނު ފުލުހަކަށްވެސް ތޫނު އެއްޗެއް ބޭނުންކޮށްގެން ހަމަލާ ދޭން މަސައްކަތް ކޮށްފައިވާ ކަމަށެވެ.
ފުލުހުން އެމީހާ ހަައްޔަރު ކުރި މަންޒަރު ފެންނަ ވީޑިއޯ ވަނީ އާންމު ކޮށްފަ އެވެ. އެމީހާ ހައްޔަރު ކުރުމުން ބުނީ އޭނާ އަކީ ނަފްސާނީ ބަލި މީހެއް ކަމަށެވެ.
ހުޅުމާލެ ސަހަރާ ސަރަހައްދުން "ތޭރަ އޮންލައިން" އަށް ވާހަކަ ދެއްކި މީހަކު ބުނީ އެމީހާ ފުރަތަމަ މަސައްކަތް ކުރީ މިސްކިތުގެ އިމާމަށް ހަމަލާ ދޭން ކަމަށެވެ. އަދި އޭނާ ހުއްޓުވަން އުޅުމުން އެތަނުގައި ތިބި މީހުނަށް ވެސް ވަޅިން ބިރު ދެއްކި ކަމަށެވެ.
