ދިވެހީންގެރާއްޖެ، މިއީ ނުހަނު ފޮނި އުއްމީދުތަކާ އެކު ދިވެހީން ގެނައި ވެރިކަމެއްގެ ސްލޯގަންއެކެވެ. މަގްސަދަކީ ރައްޔިތުންގެ ބާރުވެރިކަން ގާއިމުކޮށް ރައްޔިތުންގެ ވެރިކަމެއް ބޭރުގެ ނުފޫޒުން އެއްކިބާކޮށް މި ގައުމުގައި ހިންގުމެވެ. ދުނިޔެއަށް ލޯހުޅުވިފައިވާ،ވަކި ބަޔަކަށް ބަރޯސާނުވާ، ތަރައްޤީވެފައިވާ ފުދުންތެރި މިނިވަން ދިވެހިރާއްޖެއަކީ އަބަދުވެސް ގައުމު ދެކެ ލޯބިވާ ހުރިހާ ދިވެހީންގެވެސް ހުވަފެނެކެވެ.

އެހެންކަމުން އެ އުއްމީދާއެކު ގެނައި ވެރިކަމަށް އަހަރެއް ފުރިގެން ދިޔައިރު ފެންނަނީ އެ މަންޒަރުތޯ މިއީ ބަލާލަން މުހިއްމުކަމެކެވެ.

17 ނޮވެމްބަރު 2024 އަށް ރައީސް މުހައްމަދު މުއިއްޒު ރާއްޖޭގައި ޖުމްހޫރިއްޔަތެއްގެ ވެރިކަން ފެށީ މިއީ ޖުމްހޫރީ ވެރިކަމެއް އޮތް ގައުމެއްކަން އެނގިހުރެއެވެ. ބާރުތައް މުށުތެރެއަށްލާ މުޅި ގައުމު ކަސްތޮޅު އެޅުވުން ވިރާސީ ވެރިކަމާއެކު ނެތިގޮއްސިކަން އެނގިހުރެއެވެ.

ދިވެހިރާއްޖޭގައި މީހުން ވަޒަންވެރިވެ ދިރިއުޅޭން ފެށީ ވަކި މިވެނި ތާރީޚަކުންކަން ސާބިތު ގޮތެއްގައި ފެންނާކަށް ނެތެވެ. ނަމަވެސް އެނގޭ ހަގީގަތެއް އެބަ އޮތެވެ. ދިވެހިރާއްޖޭގައި މީހުން ވަޒަންވެރިވީއްސުރެ، ދިވެހީންގެ އަމިއްލަ ވެރިކަމެއް ކުރަމުން އައިކަމެވެ.

ދިވެހި ތާރީޚުން މިކަންކަން ހެކިދޭއިރު މިހާރުގެ ރައީސުލްޖުމްހޫރިއްޔާއަކީ ދިވެހިރާއްޖޭގެ ގާނޫނީ ހަމަތަކާ ނުހަނު ރައްޓެހި ބޭފުޅަކަށްވާނެއެވެ. ބައްޕާފުޅަކީ ރާއްޖެއަށް އެ ދާއިރާއިން ނުހަނު ގިނަ ހިދުމަތްތަކެއް ކޮށްދެއްވި ބޭފުޅަކަށް ވެސް ވުމުންނާ އެކުއެވެ. އެހެންކަމުން ރައްޔިތުންގެ ހައްގުތަކަށް ރައްކާތެރިވުމާއެކު ރައްޔިތުންގެ ވެރިކަމެއް ކޮށްދޭން ޖެހޭކަން ބައްޕާފުޅުގެ ފޮތުންވެސް އެނގެން އޮތުމުންނާވެސް އެކުއެވެ. ބާރުތައް މުށުތެރެއަށް ލުމަކީ މިހާރު ރާއްޖޭގައި އޮތް ޑިމޮކްރެޓިކު ވެރިކަމުގައި އައްޗިކަމެއްކަން އެނގެންވާނެތީއެވެ.

ކޮންމެ އަކަސް ރައީސް މުހައްމަދު މުއިއްޒުގެ ވެރިކަމަށް އަހަރެއް ވެގެން ދިޔައިރު، ރައްޔިތުން ބުނަނީ މިއީ ހަމަ ނުމޮށޭ ގުރައެއްގެ ވެރިކަމެއް ކަމަށެވެ. އެހެން ބުނާ ސަބަބަށް ބަލާއިރު އެއީ ރައީސް މުއިއްޒުއަކީ ނުހަނު މަޑުން ހުންނަވާ ބޭފުޅަކަށްވެމެ ނަމަވެސް އެމަނިކުފާނު އަމަލުފުޅުން ފެންނަނީ ނިންމާ ނިންމުންތަކުގެ މަކަރުވެރިކަން ކަމަށް ވުމުންނެވެ.

އެގޮތުން ތިން ބާރު ވަކިވެފައި އޮތް މި ވެރިކަމުގެ ނިޒާމުގެ ތެރެއިން ވެރިކަން ކުރަން ހުވާކުރައްވައިގެން ހުންނަވާ ރައީސް މުއިއްޒު ގެންދަވަނީ ހުވަޔާ ޚިލާފުވެވަޑައިގެން މަޑު މަޑުން ހިޔަޅުވެރި ރޭވުމުގެ ތެރެއިން، މަޖިލީހުގެ ސުޕަރ މެޖޯރިޓީގެ ބޭނުން ނަހަމަ ގޮތުގައި ހިފާ ބޭނުން ގޮތަގޮތަށް ގާނޫނާ ގަވާއިދުތައް ބަދަލުކޮށް އުފަންކޮށް ހުރިހާ ބާރުތަކެއް މުށުތެރެއަށްލާ ބާރުކުރަން މަޅި ޖަހަމުންނެވެ.

މެމްބަރުންނަށް ރިޝްވަތުދީ މެމްބަރުން ގަނެ ހިންގަމުން ދަނީ ހުތުރު ޖަރީމާއެކެވެ. މިނިވަން މުއައްސަސާތަކުގެ މިނިވަންކަން ކަނޑުވާލަން މަޅި ޖަހަނީއެވެ. މިހުރިހާ ކަމެއް މި ކުރަނީ އަހަރެއްވީއިރު ރައްޔިތުންގެ އިތުބާރު ވެރިކަމާ މެދު ގެއްލި ރައީސް މުއިއްޒަށް ވެރިކަމުގައި ދެމިހުރުމުގެ ބިރު އޮތުމުން ކަމަށް ރަށު ތެރޭ އަޑު ގަދަވެފައިވެއެވެ.

ރައްޔިތުންގެ ވެރިކަމުގެ ފުރިހަމަ ލާބައާއި މަންފާ ދިވެހިންނަށް ހޯދުމަށް ގެނައި ވެރިކަމަށް އަހަރެއް ފުރިގެން ރައީސް މުއިއްޒު ދެއްވި ޚިތޯބުގައިވެސް ފެނިގެން ދިޔައީ ޖައްބާރުކަމާ ބޮޑާކަންކަމަށް ގިނަ ބަޔަކު އިއްތިފާގުވެއެވެ.

ދައްކާލީ "އަންނި" ބުނާހެން ނުލާފާކަމެވެ. ވިޔަފާރިވެރިންނަށް ބިރު ދައްކާލީއިރު ބުނާހެން ހިވީ "ފެނި މިހުރީ އާނޯލްޑޭއޭއެވެ" ހަރު އަޑުން ވާހަކަ ދައްކަމުން ދިޔައިރު މޫނުމަތިން ތަރުޖަމާ ފެންނަމުން ދިޔައީ" ބާކީ ހަތަރު އަހަރުވެސް ކަލޭމެން ޖެހޭނީ ހަމަތިހެން ތިބެންށޭ ބުނާ އުސޫލުންނެވެ.

ކޮންެމެ އަކަސް އަހަރެއްގެ ބައެއް ސަފުހާތައް އުކާލާ ޒައްރެއްގެ މިންވަރު ބަލާލިއިރުވެސް ފެންނަން އޮތީ ބޮޑާކަމާ ކިބުރުވެރިކަމާ ޚުދުމުހުތާރުކަމެވެ. ވަކި އާއިލާތަކެއްގެ ތަރކި މުދަލަކަށް ގައުމުގެ ވަޒީފާތަކާ މުއައްސަސާތަކާވެ ނިމިއްޖެއެވެ.