ސަހްޔޫނީން ފަލަސްތީނުގައި ހިންގަމުންދާ ގަތުލްއާއްމާއި ދެކޮޅު ހެދުމުގެ ގޮތުން ސަހްޔޫނީންނަށް ރާއްޖެ ނާދެވޭގޮތަށް އެމީހުންގެ ޕާސްޕޯޓް މަނާނުކޮށް ލަސްކުރަމުންދާތީ އާންމުގެ ފާޑުކިޔުން ސަރުކާރަށް އަމާޒުވާތީ ޕްރެޝަރ ބޮޑުވެ މައްސަލައިގެ ކޮމިޓީ މަރުހަލާ އަވަސްކުރަން ފާސްކޮށްފިއެވެ.

މި ގޮތަށް ފާސްކޮށްފައިވަނީ މިއަދު ބޭއްވި މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީ އިންނެވެ.

އިދިކޮޅު އެމްޑީޕީގެ ފަރާތުން ގަލޮޅު ދެކުނު ދާއިރާގެ މެންބަރު މީކައިލް އަހުމަދު ނަސީމް ހުށަހެޅި މައްސަލަ ކުރިއަށް ނުގެންގޮސް ފަސް މަހަށްވުރެ ވެސް ގިނަ ދުވަސް ބޭއްވުމަށްފަހު މިދިޔަ ހަފްތާގައި ކޮމިޓީން ވަނީ ޑިސެމްބަރުގެ ނިޔަލަށް ކަމާ ބެހޭ އިދާރާތަކަށް ސިޓީ ފޮނުވައި އެ ތަންތަނުން ލިބޭ ޖަވާބަކަށް ބެލުމަށްފަހު އެ ފަރާތްތައް ކޮމިޓީއަށް ހާޒިރުކުރުމަށެވެ. ނަމަވެސް ބިލުގެ މަސައްކަތް އަވަސް ކުރުމަށް ނިންމައި ކުރިން ނިންމި ނިންމުން ބަދަލުކުރުމަށް މިއަދު ވަނީ ކޮމިޓީން ފާސްކޮށްފައެވެ.

މިއަދު ބޭއްވި 241 ކޮމިޓީގެ އިއްތިފާގުން ފާސްވީ މާދަމާއިން ފެށިގެން ވެސް ކަމާބެހޭ ފަރާތްތައް ހާޒިރުކޮށް ސުވާލުކޮށް މައުލޫމާތު އެއްކުރުމަށެވެ. އެގޮތަށް ހުށަހެޅުއްވީ ހުޅުދޫ ދާއިރާގެ މެންބަރު މުހައްމަދު ޝާހިދެވެ.

މި ބިލުގެ ކޮމިޓީ މަސައްކަތް ނިންމުމަށް ފާސްކުރީ ފެބްރުއަރީ 2025 އަށެވެ.

ބިލު ހުށަހެޅީ މިދިޔަ މެއި 29 ވަނަ ދުވަހުއެވެ. އެ ބިލް ބަލައިގަނެ ސަލާމަތީ ހިދުމަތްތަކާ ބެހޭ ކޮމިޓީއަށް ފޮނުވީ މިދިޔަ ޖޫން މަހުގެ 10 ވަނަ ދުވަހު އެވެ.

ކޮމިޓީން ބިލުގެ މަސައްކަތް ކުރިއަށް ނުގެންގޮސް ގިނަ ދުވަސްތަކެއް ވަމުންދާތީ އިދިކޮޅުން އެކި ފަހަރު މަތިން ހުށަހެޅި ކުއްލި މައްސަލަތައްވެސް ޕީއެންސީގެ ސްޕަ މެޖޯރިޓީ އޮންނަ މަޖިލީހުން ވަނީ ބޭރުކޮށްލާފަ އެވެ.

ޕާސްޕޯޓް މަނާކުރުން އަވަސްނުކޮށް ސަރުކާރުގެ މެޖޯރިޓީ އޮތް މަޖިލީހުން ވަނީ ސަރުކާރުން ބޭނުންވާ ބިލުތައް އެއް ދުވަސްތެރޭވެސް ނިންމާ ފާސްކޮށްފައެވެ.