މި ސަރުކާރުން އާސަންދަ ޚިދުމަތުގެ ތެރެއިން ގެންނަން އުޅެނީ ރަގަޅު ބަދަލެއް ނޫން ކަމަށާ އެކަމުގައި ސަރުކާރުގެ ނިޔަތްވެސް ރަގަޅު ނޫން ކަމަށް ރައީސް އަބްދުﷲ ޔާމީން ވިދާޅުވެއްޖެއެެވެ.

ރައީސް ޔާމީން މިފަދައިން ވިދާޅުވީ، ރައީސް މުހައްމަދު މުއިއްޒުގެ ސަރުކާރަށް އެއް އަހަރު ފުރިފައިވާއިރު ސަރުޚާރުގެ ކަންކަމަށް އަލި އަޅުވާލައްވާ ޗެނަލް13 އަށް ދެއްވި ޚާއްސަ ބަސްދީގަތުމެއްގައެވެ.

އެގޮތުން ރައީސް ޔާމީން މިފަހަކަށް އައިސް ފްރޮންޓު އޮފީސް ޖަލްސާތަކުގައިވެސް އެންމެ ބޮޑަށް ފާހަގަކުރައްވާ އެއް ކަމަކީ ދިވެހީންނަށް ފޯރުކޮށްދޭ ގައުމީ ހެލްތު ސްކީމު، "އާސަންދަ" ރިފޯމުކުރުމުގެ ނަމުގައި ސަރުކާރުން ކުރަން އުޅޭ ކަންކަމުގެ ކަންބޮޑުވުމެވެ.

އެކަމަށް އަލި އަޅުވާލައްވަމުން ރައީސް ޔާމީން ވިދާޅުވީ، އާސަންދައަކީ އެންމެ ނިކަމެތި ރައްޔިތުންނަށް ދައުލަތުން ދޭ އެހީ ކަމަށެވެ. ނަމަވެސް އާސަންދަ އަށް ވެސް ހަރަދު ކުޑަކުރުމުގެ ބަދަލުތަކެއް އައުމާއިއެކު ފަގީރުންގެ ފަގީރުކަން އިތުރަށް ފަގީރުވާނެ ކަމަށެވެ. އަދި މިހާރު އާސަންދަ އަށް ގެންނަން އުޅޭ ބަދަލުގައި ހިމެނެނީ ޖަރީމާކަމަށް ވިދާޅުވެ ރައީސް ޔާމީން ވިދާޅުވީ، އެއީ އެންސްޕާއާ އާސަންދައަކީ ދެ މަގްސަދެއްގައި އުފައްދާފައި އޮތް ދެ މުއައްސަސާކަމަށްވެފައި ދެތަން އެއްކޮލުމުން އެކަމުގެ އަސްލު ގެއްލޭތީވެސް މެއާއެކު ކަމަށެވެ.

ރައީސް ޔާމީން އިތުރަށް ވިދާޅުވީ ރައްޔިތުންގެ އާންމު ދިރިއުޅުމުގެ ހާލަތާއި ގުޅޭ ކަންކަމާއި ދައުލަތުގެ އެންމެ މުހިއްމު އެންމެ ބޮޑެތި ކަންކަމާއި ބެހޭ ގޮތުން ސިޔާސީ ޕޯޑިއަމްގައި ވާހަކަ ދައްކާ ގޮތަށް ވާހަކަ ދެއްކެވީމާ ރައްޔިތުންނަށް އެހާ ފަސޭހައެއް ނުވާނެ ކަމަށެވެ. އަދި އެކަން ރައްޔިތުން ބަލައި ނުގަންނާނެ ކަމަށެވެ.