ސަރުކާރު ނީލަގެރި އެތެއްވަރުވާއިރު ރައްޔިތުން އަނަރޫފުވެ ނިކަމެތިވަނީ ކަމަށް ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ އެކްސްގައި ކުރެއްވި ޕޯސްޓެއްގައެވެ.

ގައުމުތަކުގެ އިންފްލޭޝަން މައްޗަށް ދަނީ ސަރުކާރުތަކުން ޚަރަދުތައް ކުޑަނުކުރާތީކަމަށް ބުނެ "އެކްސް"ގެ ވެރިމީހާ އެލަން މަސްކު، ކޮށްފައިވާ ޕޯސްޓަކަށް އިޝާރާތް ކުރައްވާ ޑރ ޖަމީލު ވިދާޅުވީ ދުނިޔޭގެ މޮޅެތި މީހުން މިދައްކަނީ ސަރުކާރުގެ ޚަރަދު ކުޑަ ކުރަންޖެހޭ ސަބަބުތައް ކަމަށެވެ.

ނަމަވެސް ރައީސް މުހައްމަދު މުއިއްޒުމެން ފަދަ ކިޔަވައިގެން ތިބި ރޯނު އެދުރުންނަށް އެވަރު ނުވިސްނޭކަމަށް ވިދާޅުވެ ޑރ ޖަމީލު ވިދާޅުވީ އިހަކަށް ދުވަހު 200 އަށްވުރެ ގިނަ ސިޔާސީ މަގާމުން މީހުން ވަކިކުރާނަމޭ ބުނެފައިވެސް ރައީސް މުއިއްޒު އެންމެ މީހަކުވެސް ވަކިނުކޮށް އަނެއްކާ ވެސް ކުރީ މަގާމުތައް އިތުރު ކަމަށެވެ.

ސަރުކާރު ހިންގަވާ ބޭފުޅުންގެ މިފަދަ އަމަލުތަކުން އިންފްލޭޝަން ބޮޑުވެ، ރައްޔިތުން ސަލާން ޖަހަންޖެހޭކަން ފާހަގަކުރައްވާ ޑރ ޖަމީލު ވަނީ ސުވާލެއް ރައީސް މުއިއްޒަށް އަމާޒުކުރައްވާފައެވެ.

އެގޮތުން ހެސްކިޔާފައި ޓެކްސް ބޮޑުކޮށްފައި ޓެކްސްޕޭޔަރުންގެ ފައިސާގައި އިންތިހާ ޚަރަދުބޮޑުކޮށް އުޅޭއިރު ލަދު ނުގަނޭތޯ ޑރ ޖަމީލު ވަނީ އައްސަވާފައެވެ. އަދި ރައީސް މުއިއްޒު ގެންދަވަނީ ހަމަ ޓެކްސް ނަގާ، ނަގާ ރައްޔިތުން ލޭއަންނަވަރަށް ފެލުމުގައި މެކުހަށް ޖަހަމުން ކަމަށްވެސް ޑރ ޖަމީލު ވަނީ ވިދާޅުވެފައެވެ.

މީގެ އިތުރުން އާ އެމްބަސީތައް ހުޅުވަމުން ފައިސާ ޚަރަދުކުރަމުން ދާއިރު މިއީ 5 ލައްކަ ރައްޔިތުން ބަލަހައްޓަން ޖެހޭ ސަރުކާރެއް ކަމާ ނަމަވެސް މިހާރު ފެންނަމުން ދަނީ ސަރުކާރު ބިޔަވެ ބޮޑުވެ ނީލަގެރި އެތެއްވަރުވާއިރު ވެސް ރައްޔިތުން އަނަރޫފުވެ ނިކަމެތިވާ މަންޒަރުކަމަށް ޑރ ޖަމީލު ވަނީ ވިދާޅުވެފައެވެ.

ޑރ ޖަމީލު މިފަދައިން ވިދާޅުވެފައިވާއިރު ދައުލަތުގެ ހަރަދު ބޮޑުވެ އާމްދަނީއާއި ހަރަދުގެ ފަރަގުވެސް ކުރީ އަހަރަށްވުރެ ވަނީ މަތިވެފައެވެ. އަދި ސަރުކާރުން ވަނީ ދަތުރު ފަތުރަށް ކަނޑައެޅި މިންވަރަށް ވުރެ އިތުރަށް ޚަރަދު ކޮށްފައެވެ.