އެންޓި ކޮރަޕްޝަން ކޮމިޝަން (އޭސީސީ)ގެ ނައިބު ރައީސް އަބްދުއްސަލާމާއި އެ ކޮމިޝަންގެ މެންބަރު ތޯހާ މުހައްމަދު މަގާމުން ވަކިކުރަން ރައްޔިތުންގެ މަޖިލީހުގެ ތަޅުމުގައި ވޯޓަށް އެހުމުގެ ކުރިން އެ ދެ ބޭފުޅުން ވެސް މިއަދު މަގާމުން އިސްތިއުފާދެއްވައިފި އެވެ.

އެ ދެ މެންބަރުން އޭސީސީން އިސްތިއުފާދެއްވީ އެ ދެ ބޭފުުޅުން މަގާމުން ވަކިކުރުމަށް މަޖިލީހުގައި މިއަދު ވޯޓު ނަގަން ތާވަލްކޮށްފައި ވަނިކޮށެވެ. ތޯހާ އާއި ސަލާމް މަގާމުން ވަކިކުރަން މިނިވަން މުއައްސަސާތަކާ ބެހޭ ކޮމިޓީގެ ސިއްރު ބައްދަލުވުމެއްގައި އިއްޔެ ވަނީ ފާސްކޮށްފަ އެވެ.

އެ މެންބަރުން މަގާމުގެ މަސްއޫލިއްޔަތު އަދާނުކުރާ ކަމަށާއި، މަގާމުގައި ހުރެ ގަވާއިދާ ހިލާފަށް އެތައް ކަމެއް ކޮށްފައިވާކަމަށް ވަނީ ތުހުމަތުކޮށްފައެވެ. އޭގެ ތެރޭގައި، ބައެއް މައްސަލަތަކުގައި އަމަލުކޮށްފައިވާ ގޮތާއި މުވައްޒަފުންނާ ދޭތެރޭ ގޯސްކޮށް އަމަލުކުރުމުގެ ތުހުމަތުތައް ވެސް ހިމެނެއެވެ.

މަގާމުން އިސްތިއުފާ ދެއްވައި ތޯހާ ރައީސް އޮފީހަށް ފޮނުއްވި ސިޓީގައި ވަނީ، ޒިންމާތައް މިނިވަންކަމާއި ނަޒާހަތްތެރިކަމާ އެކު ގާނޫނު އަސާސީ އަދި ގާނޫނުގައި ބުނާގޮތަށް ތެދުވެރިކަމާއި އިހްލާސްތެރިކަމާއެކު ކުރަމުން ދަނިކޮށް، އެއްވެސް އަސާސެއް ނެތް ތުހުމަތުތަކެއް ކޮށް، އިތުބާރު ނެތްކަމުގެ މައްސަލަ ބެލުމަކީ ގާނޫނުން އޭނާއަށް ހަވާލުކޮށްފައިވާ ޒިންމާތައް މިނިވަންކަމާ އެކު އަދާކުރަން ހުރަސް އެޅޭނެ ކަމެއް ކަމަށެވެ.

އޭގެ ސަބަބުން އޭސީސީގެ މެމްބަރުކަމުގެ ޒިންމާތައް މިނިވަންކަމާ އެކު އަދާކުރެވޭނެ މާހައުލެއް އޮތް ކަމަށް ފެންނަން ނެތުމުން ކޮމިޝަންގެ މެމްބަރުގެ މަގާމުން އިސްތިއުފާ ދެއްވީ ކަމަށް ވިދާޅުވި އެވެ.

ސަލާމް ވެސް ވިދާޅުވީ އޭނާގެ އިސްތިއުފާގެ ސިޓީ ރައީސް އޮފީހަށް މިއަދު ފޮނުވާފައިވާ ކަމަށެވެ.

ސަލާމް އާއި ތޯހާގެ އިސްތިއުފާއާ އެކު އޭސީސީގެ މެންބަރުންގެ ގޮތުގައި ދެން ތިއްބަވާނީ:

• އާދަމް ޝާމިލް - ރައީސް

• ޝިޔާމާ މުހައްމަދު

• ޝަޒްނާ ހާޝިމް

މުއިއްޒު ހިތާ ނުވާ މީހުން މަގާމުތަކުން ދުރުކުރަމުން އަންނައިރު، ސަރުކާރުން ވަނީ މިނިވަން މުއައްސަސަތައް ކަމަށްވާ، އީސީއާއި އޭސީސީ، އެ ދެ ކޮމިޝަންގެ ރައީސުން ސީދާ ރައީސުލްޖުމްހޫރިއްޔާއަށް އައްޔަންކުރެއްވޭ ގޮތަށް ގާނޫނު މި ފަހުން ވަނީ އިސްލާހުކޮށްފަ އެވެ. މިއީ މިނިވަން މުއައްސަސަތަކަށް ސަރުކާރުގެ ނުފޫޒު ވަންނާނެ ކަމެއް ކަމަށް ބުނެ މަދަނީ ޖަމިއްޔާތަކުން އަންނަނީ ކަންބޮޑުވުން ފާޅުކުރަމުން ނެވެ.