ގާނޫނު އަސާސީ އޮޅާލާ ހުރިހާ ބާރުތަކެއް ރައީސުލްޖުމްހޫރިއްޔާގެ މުށުތެރެއަށްލާ ބާރުކޮށްލައިފި ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ހޯމަ ދުވަހުގެރޭ ޕީއެންއެފް ޖަލްސާގައި ވާހަކަފުޅު ދައްކަވަމުންނެވެ.

ރައީސް ޔާމީން ވިދާޅުވީ، ގާނޫނު އަސާސީ އޮޅާލާފައި އޭގައި ހުރި އިސްތިލާހުތައް އެއްކޮށްލާ ހުރިހާ ބާރުތަކެއް ރައީސުލްޖުމްހޫރިއްޔާގެ އަތްޕުޅަށް މިހާރު ދީފައިވާ ކަމަށާ ދެން ސަރުކާރު ޖަވާބުދާރީ ކުރުވަން ރައްޔިތުންނަށް ފަސޭހަ ނުވާނެ ކަމަށެވެ.

މީގެ އިތުރުން މަޖިލިސް ތަޅުމުގައި ތިބި ރައްޔިތުންގެ ޚާދިމުން މިއަދު އެ މެމްބަރުން އިންތިޚާބުކުރި ރައްޔިތުންނަށް ހަރާންކޯރުވެއްޖެކަން ދޭހަވާ މޭރުމަކުން ވާހަކަފުޅު ދައްކަވަމުން ރައީސް ޔާމީން ވިދާޅުވީ، ޑިމޮކްރެސީގެ މަގުގައި ދިވެހީން ކުރި ޖިހާދުގައި އެންމެ ބޮޑަށް ވަކާލާތު ކުރި މީހުން މިއަދު މަންމަން ވެއްޖެ ކަމަށެވެ.

ރައީސް ޔާމީން މިފަދައިން ވާހަކަފުޅު ދައްކަވާ އިޝާރާތްކުރައްވާފައި އެވަނީ ބެލެވޭ ގޮތުގައި، ނިމިިޔަ ހަފްތާގެ ބުދަ ދުވަހު އަވަސް އަރުވާލައިގެން ގާނޫނޫ އަސާސީއަށް ގެނައި ހަ ވަނަ އިސްލާހަށެވެ.

މަޖިލިސް ތަޅުމަށް އަންގާރަ ދުވަހު ހުށަހަޅާ ބުދަ ކޮމިޓީ މަރުހަލާ ނިންމާ ދުވަހުން ދުވަހަށް އިތުރު ޖަލްސާއެއް ބާއްވާ އިސްލާހު ފާސްކޮށް ހަމަ އެދުވަހުގެ އޮއްސުނު އިރާއެކު ރައީސް މުހައްމަދު މުއިއްޒު އެ އިސްލާހު ތަސްދީގުކޯށް އެރޭ ސަރުކާރުން ގެޒެޓުކޮށް އެ ވަގުތުން ފެށިގެން އެ އިސްލާހަށް އަމަލު ކުރަން ވަނީ ފަށާފައެވެ.

ގެނައި އިސްލާހަކީ ސިޔާސީ ޕާޓީއެއްގެ ފަރާތުން މަޖިލިސް އިންތިހާބުގައި ވާދަ ކޮށްގެން އިންތިހާބުވުމަށް ފަހު އެ ދައުރުގެ ތެރޭގައި އެ ޕާޓީއަކުން ވަކިވެއްޖެ ނަމަ ނުވަތަ ޕާޓީން ވަކިކޮށްފިނަމަ ނުވަތަ އެހެން ޕާޓީއެއްގެ މެންބަރަކަށް ވެއްޖެނަމަ އެ މީހަކު މަޖިލިހުގެ މެންބަރުކަމުން ވަކިވާނެ ކަމަށެވެ.

މަޖިލިހުގެ މެންބަރަކު މިހާރު ތަމްސީލް ކުރާ ސިޔާސީ ޕާޓީން އަމިއްލަ އަށް ވަކިވެއްޖެ ނަމަ ނުވަތަ ވަކިކޮށްފި ނަމަ ނުވަތަ އެހެން ޕާޓީއަކާ ގުޅިއްޖެ ނަމަވެސް ގޮނޑި ގެއްލޭނެ ކަމަށް އިސްލާހުގައިވެ އެވެ.

މީގެ އިތުރުން ގާނޫނުއަސާސީގެ މުހިންމު މާއްދާތަކަށް އިސްލާހު ގެންނަން ރައްޔިތުންގެ ރުހުން ހޯދަން ޖެހޭ ކަމަށް ބުނާ މާއްދާ އިސްލާހުކުރަން ވެސް ރައްޔިތުންގެ ހިޔާލު ހޯދަންޖެހޭނެ ކަމަށް އިސްލާހުގައިވެއެވެ.