ރައީސް ޑރ. މުއިއްޒުގެ ސަރުކާރުން ކޮންޓްރޯލް ކުރާ ރައްޔިތުންގެ މަޖިލީހުން ސަރުކާރުން ބޭނުންވި ގޮތަށް ގިނަ ބިލުތަކެއް މާ ބޮޑު ބަހުސް ކުރުމެއް ދިރާސާ ކުރުމެއްނެތި މަޖިލީހުން މިއަދު ފާސްކޮށްދީފި އެވެ.

އެގޮތުން މަޖިލީހުން މިއަދު ފާސްކޮށްދިން ބިލުތަކުގެ ތެރޭގައި ރާއްޖޭގެ އާބަން ސަރަހައްދުތަކެއް ކަނޑައެޅުމާއި ތަރައްގީކުރުމާ ގުޅޭ އުސޫލުތައް ހިމަނައި ސަރުކާރުން މަޖިލީހަށް ހުށަހެޅި އާބަން ޑިވެލޮޕްމެންޓު ބިލު ހިމެނެ އެވެ.

ބިލު ފާސްކުރީ 70 މެންބަރުންގެ ވޯޓާއެކު އެވެ. އެ ބިލު ފާސްކުރަން ނުފެންނަ ކަމަށް 11 މެންބަރުން ވޯޓު ދެއްވި އެވެ.

އާބަން ޑިވެލޮޕްމެންޓުގެ ބިލު ސަރުކާރުގެ ފަރާތުން މަޖިލީހަށް ހުށަހެޅުއްވީ ގއ. ވިލިނގިލި ދާއިރާގެ ޕީއެންސީ މެންބަރު އާޒިމް އަބްދުލްއަޒީޒެވެ.

މީގެ އިތުރުން ރައްޔިތުންގެ މަޖިލީހަށް ސަރުކާރުގެ ފަރާތުން ހުށަހަޅާފައިވާ ދައުލަތުގެ ދަރަންޏާ ބެހޭ ބިލާއި ފިސްކަލް ޒިންމާގެ ބިލު މާލިއްޔަތު ކޮމިޓީން ދިރާސާކޮށް ނިންމި ގޮތަށް މަޖިލީހުގެ ތަޅުމުން މިއަދު ފާސްކޮށްފަ އެވެ.

ފިސްކަލް ޒިންމާގެ ބިލު ހުށަހެޅުއްވީ ތުލުސްދޫ ދާއިރާގެ މެންބަރު އިބްރާހިމް ނަސީމެވެ. ދަރަންޏާ ބެހޭ ބިލު ހުށަހެޅުއްވީ ފުނަދޫ ދާއިރާގެ މެންބަރު މުހައްމަދު މަމްދޫހު އެވެ.

ފިސްކަލް ޒިންމާގެ ބިލުގައިވާ ގޮތުން އެ ބިލުގެ ބޭނުމަކީ، ދައުލަތުގެ ފިސްކަލް އެންމެހައި ކަންކަން ހިންގަނީ ފިސްކަލް ޑިސިޕްލިން ހާސިލު ކުރެވޭނެ ގޮތަށް، ދެފުށް ފެންނަ ޒިންމާދާރު ގޮތެއްގައިކަން ކަށަވަރު ކުރުމެވެ.

މިއަދު އޮތް މަޖިލީހުގެ ޖަލްސާގައި މި ދެ ބިލު ވެސް ފާސްކުރީ 81 މެންބަރުންގެ ވޯޓާއެކު އެވެ. ދެ ބިލާ ދެކޮޅަށް އެއްވެސް މެންބަރަކު ވޯޓު ނުދެއްވަ އެވެ.

މިފަހުން މަޖިލީހުން ފާސްކުރަމުން އަންނަ ބިލުތަކާއި އިސްލާހުތަކުގެ ސަބަބުން ރާއްޖޭގެ ޑިމޮކްރަސީގެ ހަޔާތައް އަދި ދިވެހި ރައްޔިތުންގެ އަސާސީ ހައްގުތަކަށް އުނިކަން އަންނަ ކަން ފާހަގަކޮށް ސިޔާސީ ޕާޓީތަކާއި މަދަނީ ޖަމިއްޔާތަކުން އަންނަނީ ކަންބޮޑުވުން ފާޅުކުތަމުން ނެވެ.