މަންމަ އާއި ކޮއްކޮއަށް ވަޅިން ހަމަލާދޭނެ ކަމުގެ އިންޒާރު ދިން މީހަކު ހައްޔަރުކޮށްފި އެވެ.

މި މައްސަލައާ ގުޅިގެން ހައްޔަރުކޮށްފައިވަނީ މާލެއަށް ނިސްބަތްވާ މުހައްމަދު ޝަފީގު ކިޔާ މީހެކެވެ. ތޫނު ހަތިޔާރު ބޭނުންކޮށްގެން ބިރު ދެއްކުމުގެ ކުށުގައި އޭނާ ހައްޔަރު ކުރުމުން އޭނާ ހަތް ދުވަހަށް ބަންދު ކުރަން ކްރިމިނަލް ކޯޓުން މިއަދު ވަނީ އަމުރުކޮށްފަ އެވެ.

ކޯޓު އަމުރުގައިވާ ގޮތުން ފައިސާ ނުދީގެން އޭނާގެ މަންމަ އާއި ކޮއްކޮއަށް ވަޅިން ހަމަލާ ދޭނެ ކަމުގެ އިންޒާރު ވަނީ ދީފަ އެވެ. އަދި އޭނާގެ ކޮޓަރި ތެރެއިން ދެ ވަޅި ވެސް ފެނިފައިވެ އެވެ.

އޭނާ ބަންދު ކުރަން ކޯޓުން އަމުރުކުރީ މުޖުތަމައުއަށް ނުރައްކަލެއް އޮތުމުން ކަމަށް އަމުރުގައިވެ އެވެ.

ފާހަގަކޮށްލެވޭ ގޮތުގައި، ފައިސާގެ ބޭނުމުގައި މީގެކުރިން ވެސް މަންމައަށް ހަމަލާ ދޭނެ ކަމަށް ބުނެފައި ހުރި މައްސަލަތައް ފެންމަތިވެފައިވެ އެވެ. އެގޮތުން، މިދިޔަ އޮކްޓޫބަރު މަހު 22ގައި މަންމައަށް ވަޅިން ހަމަލާދީ މަރާލާނެކަމުގެ އިންޒާރުދީ، އަނިޔާކުރުމަށް ފަހު، ފޭރުނުކަމުގެ ތުހުމަތުގައި މީހަކު ހައްޔަރުކުރިއެވެ.

އޭގެފަހުން، މިދިޔަ ބުރާސްފަތި ދުވަހު ވަނީ މަންމަ ގައިގައި ތަޅައި އަނިޔާކޮށް، މަންމަ އަތުން ގަދަކަމުން ފައިސާ ހޯދަން އުޅުމުގެ ތުހުމަތުގައި މާލެއިން ހައްޔަރުކޮށްފަ އެވެ.