މި މަހު 16 އިން ފެށިގެން މި މަހުގެ ނިޔަލަށް ރިސެސް އަށް ދިޔުމަށް ކްރިމިނަލް ކޯޓުން ނިންމައިފި އެވެ.

ޑިސެމްބަރު މަހަކީ ކޯޓުތައް އާންމުކޮށް ރިސެސްއަށް ދާ މަހެކެވެ. މި އަހަރު ވެސް ސުޕްރީމް ކޯޓާއި ހައި ކޯޓު ހިމެނޭހެން ގިނަ ކޯޓުތައް ވަނީ މިއަދުން ފެށިގެން ކުރިއަށް މި އޮތް އެއް މަހަށް ރިސެސްއަށް ގޮސްފަ އެވެ. ސިވިލް ކޯޓު ރިސެސްއަށް ދިޔައީ މި މަހު 20 އަށެވެ.

ނަމަވެސް ކްރިމިނަލް ކޯޓުން ވަނީ ރިސެސްއަށް ދިއުން ލަސްކޮށް، މުޅި މަސް އެއްކޮށް ރިސެސްއަށް ނުދާން ނިންމައިފި އެވެ.

ކްރިމިނަލް ކޯޓުން ބުނީ ރިސެސް އަށް ދިޔަ ނަމަވެސް ކޯޓުގެ އިމާރާތް ބަދަލުވުމަށްޓަކާ ކުރަންޖެހޭ މަސައްކަތްތައް ރާވައި ތަރުތީބުކޮށް، ބަންދާ މެދު ގޮތެއް ނިންމުމުގެ އަޑުއެހުންތައް ކުރިއަށް ގެންދިޔުމާއި، ތަފާތު އެކި ކޯޓު އަމުރު ދޫކުރުމުގެ މަސައްކަތްތައް ކުރިއަށްދާނެ ކަމަށެވެ.

މީގެއިތުރުން ޝަރީއަތް ނިމެންދެން ބަންދުކޮށްފައި ތިބި މީހުންގެ މައްސަލަތަކާއި، ގާނޫނުގައި ނުވަތަ ގަވާއިދުގައި ވަކި މުއްދަތެއްގެ ތެރޭގައި ނިންމަންޖެހޭނެ ކަމަށް ކަނޑައަޅާފައިވާ ކަންކަން ކުރިއަށް ގެންދާނެ ކަމަށްވެސް ކޯޓުން ބުނެ އެވެ.

ހައިކޯޓާއި ސުޕްރީމް ކޯޓުން ވަނީ މި މަހުގެ ނިޔަލަށް ރިސެސްއަށް ގޮސްފަ އެވެ.