ގދ. ތިނަދޫގެ އާބާދީގައި 10،000 ހަމަނުވާތީ އެ ރަށުގެ ސިޓީގެ ދަރަޖަ ބާތިލުކުރަން އެދި ހައި ކޯޓަށް ދުސްތޫރީ މައްސަލައެއް ހުށަހަޅާފައިވަނިކޮށް، ތިނަދޫއަށް ސިޓީގެ ދަރަޖަ ހޯދީ އާބާދީ އޮޅުވާލައިގެން ކަމަށް ބުނެ އެ މައްސަލަ ބަލައިދޭން ރައްޔިތުންގެ މަޖިލީހަށް ވެސް މައްސަލައެއް ހުށަހަޅައިފި އެވެ.
މައްސަލަ މަޖިލީހަށް ހުށައެޅުއްވީ ތިނަދޫ އުތުރު ދާއިރާގެ މެންބަރު ސައުދުﷲ ހިލްމީ އެވެ. މަޖިލީހުގެ ރައީސް އަބްދުއްރަހީމް އަބްދުﷲ އަށް ފޮނުއްވި ސިޓީގައި މުހިންމު ދެތީން ކަަމެެއް ފާހަގަ ކުރައްވާފަ އެވެ.
އެ މައްސަލަ މަިޖިލީހަށް ހުށަހަޅާފައިވާކަން ހާމަކޮށް ފޭސްބުކް ޕޯސްޓެއްގަައި ސައުދު ވިދާޅުވެފައި ވަނީ، ގާނޫނުގައި ސިޓީގެ ދަރަޖަ ދެވޭ ރަށެއްގެ ރަޖިސްޓްރީ އާބާދީގައި މަދުވެގެން 10،000 މީހުން ހަމަވަންޖެހޭ ކަމަށް ލާޒިމް ކޮށްފައިވާ އިރު، ތިނަދޫގެ އާބާދީ އެ އަދަދަށް ނާރާ ކަމަށް ތުހުމަތު ކުރާ މައްސަލަ ބަލައިދޭން އެދި މަޖިލީހުގެ ރައީސް އަބްދުއްރަހީމް އަބްދުﷲ އަށް ސިޓީ ހުށަހަޅުއްވާފައިވާ ކަމަށެވެ.
އެސިޓީގައި މަޖިލީހުގެ ކަމާބެހޭ ކޮމިޓީއަކުން ނުވަތަ ކޮމިޓީޓަކުން އެ މައްސަލަ ބަލައިދިނުމަށް އެދިފައިވާނެ ކަމަށްވެސް ސައުދު ވިދާޅުވެފައިވެއެ ވެ.
ސިޓީއެއްގެ ދަރަޖަ ދިނުމަށް ގާނޫނާ ހިލާފު އެތައް ކަމެއް ހިންގި ކަމަށް ތުހުމަތުކޮށް، ތިނަދޫ ދެކުނު ދާއިރާގެ ގިނަ އަދަދެއްގެ ރައްޔިތުން އެދެމުންދާ ކަމަށްވެސް ސައުދު ވިދާޅުވި އެވެ.
ތިނަދޫ ރަށު ކައުންސިލަށް އިންތިހާބުވި ރައީސް އަދި މޭޔަރު ކަމުގައި ހުންނެވި ސައުދު އަލީއަށް ގިނަ ތުހުމަތުތަކެއް ކޮށް، އެހާވަރަކުން ސިޓީގެ ދަރަޖަ ހޯދީ ބޮޑު ބްލޮކް ގްރާންޓެއް ހޯދައިގެން ވަކި ބަޔަކަށް ވަޒީފާ ދޭން ކަމަށްވެސް އެ ސީޓީގައި ބުނެފައިވެ އެވެ.
ތިނަދޫއަށް ދީފައިވާ ސިޓީގެ ދަރަޖަ ބާތިލުކުރަން ހުށަހަޅާފައިވަނީ ވެސް މިހާރު ތިނަދޫގެ އަބާދީގައި ތިބީ 7,924 މީހުން ކަމަށް ބުނެފައެވެ. ހައިކޯޓު ރިސެސްގައި އޮތުމުގެ ސަބަބުން އެ މައްސަލަ މިހާތަނަށް ބަލަން ފަށާފައެއް ނުވެއެވެ.
