ރާއްޖެއިން ތައިލެންޑަށް ކަނޑައަޅާފައި ހުންނަ ސަފީރުކަމުގެ މަގާމަށް އިލެކްޝަން ކޮމިޝަނުގެ ކުރީގެ ރައީސް ފުއާދު ތައުފީގް އައްޔަނުކުރުމަށް މަޖިލީހުގެ ހާރިޖީ ގުޅުންތަކުގެ ކޮމިޓީން މިއަދު ފާސްކޮށްފިއެވެ.

ހާރިޖީ ކޮމިޓީން މިގޮތަށް ފާސްކުރީ މިއަދު ބޭއްވި އެ ކޮމިޓީގެ ބައްދަލުވުމުގައި ކޮމިޓީގެ އިއްތިފާގުންނެވެ.

މިއަދު އޮތް ކޮމެޓީގައި ވިލިނގިލި ދާއިރާގެ މެންބަރު އާޒިމް އަބްދުލް އަޒީޒް ވިދާޅުވީ، ރާއްޖޭގެ ފޮރިން ސާވިސް ގާނޫނުގެ 15 ވަނަ މާއްދާގައި ބަޔާން ކުރާ ސަފީރުންގެ ގޮތުގައި އައްޔަން ކުރާ މީހުންގެ ފުރިހަމަވާން ޖެހޭ ޝަރުތުތައް ފުއާދުގެ ކިބައިގައި ހަމަވާ ކަމަށެވެ. އަދި އެއީ މި މަގާމަށް އެކަށީގެންވާ މީހެއް ކަމަށް ހުށަހަޅާ ކަމަށް ވިދާޅުވިއެވެ.

އެ ހުށަހެޅުމަށް ތާއިދު ކުރެއްވީ މާފަންނު ދެކުނު ދާއިރާގެ މެންބަރު އަބްދުﷲ ރިފާއުއެވެ.

މި ބައްދަލުވުމުގައި ފުއާދު އެ މަގާމަށް އައްޔަނުކުރުމަށް 9 މެމްބަރުން ވަނީ އޭނާގެ ޝަރުތު ހަމަވާކަމަށް ނިންމައި ވޯޓުދެއްވާފައެވެ. ތައިލެންޑުގައި ހުންނަވާ ސަފީރަކަށް ފުއާދު އައްޔަނުކުރުމަށް ނަން ހުށަހަޅާފައިވަނީ މިދިޔަ ނޮވެމްބަރުމަހުގެ 25 ވަނަ ދުވަހުއެވެ.

ފުއާދު ތައުފީގު އެންމެފަހުން ހުންނެވީ އިލެކްޝަން ކޮމިޝަނުގެ ރައީސްކަމުގެ މަގާމުގައެވެ. ފުއާދު ވަނީ އެ މަގާމު ދެ ދައުރު ފުރިހަމަ ކުރައްވާފައެވެ.