އަންނަ އަހަރު ޙައްޖަށް ދިއުމަށް ޖާގަލިބިފައިވާ އެންމެންނަށް ހައްޖަށް ދެވޭނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
ހައްޖަށް ދާން ލިސްޓުގެ ކިޔޫގައި ތިބި ބައެއް މީހުން މިހާރު ކިޔޫގެ ފަހަތަށް ޖެހިފައިވާ ކަމަށް ބުނެ އާންމުންގެ ބައެއް މީހުން އަންނަނީ ސޯޝަލް މީޑިއާގައި ކަންބޮޑުވުން ފާޅު ކުރަމުންނެވެ.
އެ ކަންބޮޑުވުންތަކާ ގުޅިގެން ޝަހީމް އެކްސްގައި ކުރެއްވި ޕޯސްޓެއްގައި ވަނީ އަންނަ އަހަރު ހައްޖަށް ދިއުމުގެ ޖާގަ ހައްޖު ކޯޕަރޭޝަނުގެ ސިސްޓަމުގެ ތެރެއިން ލިބިފައިވާ އެންމެންނަށް ހައްޖުވުމުގެ ފުރުސަަތު ލިބޭނެކަމުގެ ޔަގީންކަން ދެއްވައިފަ އެވެ.
މި އަހަރުން ފެށިގެން ހައްޖަށް މީހުން ގެންދިއުމަށް ރާއްޖެއަށް ލިބޭ ހުރިހާ ކޯޓާއެއް ދިނުމަށް ނިންމާފައިވަނީ ހައްޖު ކޯޕަރޭޝަނަށެވެ. މި އަހަރު ސައުދީން ރާއްޖެއަށް ދިނީ 1،150 މީހުންގެ ޖާގަ އެވެ. ހައްޖު ކޯޓާ އިތުރުކުރުމަށް ސަރުކާރުން އަންނަނީ މަސައްކަތް ކުރަމުންނެވެ.
ހައްޖު ކޯޕަރޭޝަނަކީ ދިވެހިން ހައްޖާއި އުމްރާ އަށް ގެންދަން ސަރުކާރުން އުފައްދާފައިވާ ކުންފުންޏެކެވެ.
