މާލެ ސަރަހައްދުގެ މަގުތަކުގައި އުޅޭ ބުޅާތައް ބަލަހައްޓަން ހެދި "އޮޅުހިޔާ" އަށް ބުޅާތައް ގެންދާނެ ކަމަށް ސަރުކާރުން ކުރިން ބުނި ނަމަވެސް މިހާރު ސަރުކާރުގެ ރާގު ވަނީ ބަދަލުވެފަ އެވެ.

މަގުތަކުގައި އުޅޭ ބުޅާތައް "އޮޅުހިޔާ"އަށް ބަދަލުކުރުމުގެ މަސައްކަތް މާލޭ ސިޓީ ކައުންސިލުން އިއްޔެ ފަށަން އުޅުމުން ދިރޭތަކެއްޗާ ބެހޭ މިނިސްޓްރީން ވަނީ އެ ފެސިލިޓީގައި ހުންނަން ޖެހޭ ހުރިހާ ހިދުމަތެއް ފުރިހަމަ ނުވާ ކަމަށް ބުނެ، އެ މަސައްކަތް މި ވަގުތަށް ހުއްޓާލަން އަންގައިފަ އެވެ.

އެގްރިކަލްޗާ މިނިސްޓްރީން ނެރުނު ބަޔާނެއްގައި ވަނީ އެ މިނިސްޓްރީން ފުރިހަމަ ކުރަން ބުނި ބައެއް މަސައްކަތްތައް ކައުންސިލުން ކޮށްފައި ނުވާތީ، ބުޅާތައް ފެސިލިޓީއަށް ނުގެންދިޔުމަށް އިލްތިމާސްކޮށްފަ އެވެ.

ނަމަވެސް އިއްޔެ ބޭއްވި މާލޭ ސިޓީ ކައުންސިލްގެ ބައްދަލުވުމުގައި މާލޭ މޭޔަރު އާދަމް އާޒިމް ވިދާޅުވީ އޮޅުހިޔާ އަކީ މާލޭގައި ބުޅާ ގިނަވެ ކުރިމަތިވެފައިވާ އާންމު އުދަނގުލަށް ހައްލެއް ހޯދުމަށް މާލެ ސިޓީ ކައުންސިލުގެ އިސްނެގުމުގެ މަތިން ގާއިމު ކުރި ތަނެއް ކަމަށެވެ.

އޮޅުހިޔާ އަތުލަން ސަރުކާރުން އުޅޭއިރު، އާޒިމް ވިދާޅުވީ އެއީ މާލެ ސިޓީ ކައުންސިލުގެ ބަޖެޓުން ހަރަދުކޮށްގެން، އެ ކައުންސިލުގެ މުވައްޒަފުން މަސައްކަތުން ނިންމާފައިވާ ތަނެއް ކަމަށެވެ.

އެނިމަލް އެންޑް ވެލްފެއާ މިނިސްޓްރީ އާއެކު އެންމެ ފުރަތަމަ އެއްބަސްވީ ބުޅާ ފެސިލިޓީގައި 10 ގޮޅި ހަދާފައި އެތަނުގައި ބުޅަލަށް ހާއްސަ ކްލިނިކެއް ވެސް ގާއިމުކުރުމަށް ކަމަށް އާޒިމް ވިދާޅުވި އެވެ. ނަމަވެސް އެކަމަށް ވަރަށް ދިގު މުއްދަތެއް ހޭދަވާނެތީވެ، މާލޭގައި އުޅޭ ބުޅާތައް ގެންގޮސް ބައިތިއްބަން 2000 އަކަފޫޓުގެ އިތުރު ތިން ގޮޅި ހަދަން ނިންމި ކަމަށް އޭނާ ވިދާޅުވި އެވެ.

ބުޅާ ފެސިލިޓީގެ މަސައްކަތް މިހާރު ނިންމާފައި އެހުރީ އެނިމަލް އެންޑް ވެލްފެއާ މިނިސްޓްރީ އާއެކު ކައުންސިލުން އެއްބަސްވި ގޮތަށް ކަމަށާއި ނަމަވެސް އިރުކޮޅުކޮޅުން އައު ބަދަލު ގެންނަން ބުނާ ކަމަށް އާޒިމް ވިދާޅުވި އެވެ.

އެތަނުގެ ހުރިހާ މަސައްކަތެއް މިހާރު ހުރީ ނިމި، މިވަގުތު ވެސް ބުޅާ ގެންދެވޭ ހާލަތުގައި ކަމަށް އާޒިމް ވިދާޅުވި އެވެ.

މާލޭގެ ޑެޕިއުޓީ މޭޔަރު އަހްމަދު ނަރީޝް ވެސް ވިދާޅުވީ ބުޅާ ފެސިލިޓީއަކީ މާލޭ ސިޓީ ކައުންސިލްގެ ބަޖެޓުން ހަރަދު ކޮށްގެން ހެދި ތަނެއް ކަމަށެވެ. އެކަމަކު، ސަރުކާރުން މި ފެސިލިޓީ ހިންގުން މިނިސްޓްރީގެ ދަށަށް ބަދަލުކުރަން އެދޭނެ ނަމަ، އެ ފެސިލިޓީ ހަދަން ދިޔަ ހަރަދު ސިޓީ ކައުންސިލަށް ދެނިކޮށް އެތަން ހަވާލުކުރުމަށް ދެކޮޅު ނުހަދާނެ ކަމަށް އޭނާ ވިދާޅުވި އެވެ.

އާޒިމް ވިދާޅުވީ ހުރިހާ ހަރަދެއް ކޮށްގެން ސިޓީ ކައުންސިލުން އެތަން ނިންމުމުން މިހާރު ސަރުކާރުން އެތަން އަތުލަން އުޅުމުން ދޭހަވަނީ މި ސަރުކާރުން އެއްބާރުލުން ނުލިބޭ މިންވަރު ކަމަށެވެ. އަދި މިގޮތަށް ކަންތައްތައް ކުރުމުން އެކަމުގެ ދެރަ ރައްޔިތުންނަށް ކުރާނޭ ކަމަށްވެސް އާޒިމް ވަނީ ވިދާޅުވެފަ އެވެ.

މާލޭގައި ބުޅާ ގިނަވެފައިވާއިރު އޭގެ ސަބަބުން ސިއްހީ އެތައް މައްސަލަތަކެއް ވެސް ކުރިމަތިވެއެވެ. ކައުންސިލުން މީގެ ކުރިން ވަނީ މާލޭގައި ބުޅަލުގެ އާބާދީ 3،000 އަށް އަރާނެ ކަމަށް ލަފާކުރެވޭ ކަމަށް ވިދާޅުވެފަ އެވެ.