ރައީސް އޮފީހުގެ މިނިސްޓަރު އިބްރާހިމް ހަލީލްގެ މައްޗަށް މަނީ ލޯންޑަރިންގެ ދައުވާ އުފުލެން ޖެހޭ ކަމަށް ރައީސް ޔާމީން އަބްދުލް ގައްޔޫމް ވިދާޅުވެއްޖެ އެވެ.

އެމަނިކުފާނު މިހެން ވިދާޅުވީ ޕީޕަލްސް ނެޝަނަލް ފްރަންޓް (ޕީއެންއެފް) އޮފީހުގައި މިހާރު ކުރިއަށްދާ ޖަލްސާގައި އެވެ.

ރައީސް މުއިއްޒު ޕްރޮމޯޓްކުރުމަށް ސަރުކާރުގެ ބައެއް އިސްވެރިން ގެންދަވަނީ ދައުލަތުގެ އިދާރާތަކުގެ މުދަލާއި ފައިސާ ނަހަމަ ގޮތުގައި ބޭނުންކުރައްވަމުންނެވެ. އެގޮތުން މިހާރު މީޑިއާ ހައުސްގެ ނަމުގައި ކުންފުންޏެއް އުފައްދަވާ ރައީސްގެ އަމިއްލަ ގެކޮޅުގެ ކަންކަން ބަލަހައްޓަވަން އުޅޭ މީހެއްގެ ނަމުގައި ރަޖިސްޓްރީކޮށް ހިންގަން މިވަނީ ފައްޓަވާފަ އެވެ.

މޯލްޑިވްސް މީޑިއާ ހައުސް ރަޖިސްޓްރީކުރިއިރު ހިއްސާދާރުންގެ ގޮތުގައި އަދި ޑިރެކްޓަރުންގެ ބޯޑުގައި ތިބީ ތިން މީހެކެވެ.

އެއީ ރައީސްގެ އަމިއްލަގެ މ. ދިމްޔާތު ބެލެހެއްޓުމުގައި މިހާރު އިސްކޮށް ހުންނެވި، ހއ. ވަށަފަރު، ހުސްނުހީނާގޭ، އަބްދުﷲ ޒާހިރު އާއި ރައީސް އޮފީހުގެ މިނިސްޓަރު ހަލީލުގެ ދޮންދަރި، ގ. ދަނބުކޮކާ، އަހުމަދު ސައިފް ހަލީމް އަދި އައިޝަތު ޝީރީނާ ކިޔާ މީހެކެވެ. މީޑިއާ ހައުސް، ރަޖިސްޓްރީކޮށްފައި ވަނީ ހަލީލު ދިރިއުޅުއްވާ، ގ. ދަނބުކޮކާގަ އެވެ.

މޯލްޑިވްސް މީޑީއާ ހައުސްގެ ނަމުގައި އުފައްދާފައިވާ ކުންފުނިން ދާދި ފަހުން ފެށި "އެމްއެމް ޓީވީ" ޗެނަލް އަކީ ރައީސް މުހައްމަދު މުއިއްޒު ޕްރޮމޯޓްކުރުމަށް ރައީސް އޮފީހުގެ މިނިސްޓަރު އިބްރާހިމް ހަލީލް އިސްވެ ހުންނަވައި، ލޯންޗްކުރި ޓީވީ ޗެނެލް އެއް ކަމަށް ރާއްޖޭގެ ބައެއް މީޑީއާ ތަކުން ވަނީ މީގެ ކުރިން ރިޕޯޓު ކޮށްފަ އެވެ.

ރައީސް ޔާމީން ވިދާޅުވީ، އެމްއެމް ޓީވީގެ އެޑްރެސް އޮތީ ހަލީލުގެ ނަމުގައި ކަމަށާއި ހަލީލުއަކީ ކޮންތަނަވަސްކަމެއް ހުރި މީހެއް ކަމަށެވެ.

ރައީސް ޔާމީން އިތުރަށް ވިދާޅުވީ ވެރިއަކަށް ހުންނަ ސާހިބު މީހާ ބުންޏަސް ނުކުރާނެ ކަންކަން ހުންނަން ވާނެ ކަމަށެވެ. އެމަނިކުފާނު އިތުރަށް ވިދާޅުވި އެމްއެންޑީއެފްގެ ޗީފް އަށް ވެސް އަދި ޕޮލިސް ކޮމިޝަން އަށް ވެސް ދޭނެ ނަސޭހަތަކީ ގާނޫނާއި އެއްކޮޅުގައި ތިބުމަށެވެ. އަދި އެއީ ރައްޔިތުންގެ ފަޅި ކަމަށެވެ.

ރައީސް ޔާމީން ވިދާޅުވީ ވައްކަމާއި ކޮރަޕްޝަނުގެ ފަޅީއަކީ ރައްޔިތުން ހަލާކުކުރާ އަދި ރައްޔިތުން ނަފްރަތުކުރާ ފަޅި ކަމަށެވެ. ރައީސް ޔާމީން މީގެ ކުރިންވަނީ ނޭޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ) އިން މަނީ ލޯންޑަރިންގެ ކަންތައްތަކެއް ހިންގާފައިވާ ކަމަށާއި އެންސްޕާގެ ސީއީއޯގެ މަގާމުގައި ހުންނެވި ހީނާ ވަލީދު މައްޗަށް ވެސް މަނީ ލޯންޑަރިންގެ ދައުވާ އުފުލެންޖެހޭ ކަމަށް ވިދާޅުވެފަ އެވެ.

ފިނޭންސް މިނިސްޓްރީގެ ވެބްސައިޓުގައި ހުރި މައުލޫމާތުން އެނގޭ ގޮތުގައި އެންސްޕާގެ އޮފީސް އިމާރާތް ބަދަލުކުރަން، 12،000 އަކަފޫޓުގެ ތަނެއް، ހޯދަން ކުރި އިއުލާނުކުރީ ޓެންޑަ ބޯޑު މެދުވެރިކޮށެވެ. އެ އިއުލާނާ ގުޅިގެން އިމާރާތް ކުއްޔަށް ދޭން ހުށަހެޅީ ވެސް ހަމައެކަނި މޯލްޑިވްސް މީޑިއާ ހައުސިންނެވެ.

ފަނަރަ ބުރިއަށް ހަދާފައިވާ މއ. ސީރާޒީގެއިން ހަތަރު ފަންގިފިލާއެއް އެމްއެމްޓީވީ އަށް ކުއްޔަށް ނަގާފައިވާ ކަމަށް މައުލޫމާތު ލިބެ އެވެ. އޭގެތެރެއިން އެންސްޕާއަށް ކުއްޔަށް ދިނީ ދެ ފަންގިފިލާ ކަމަށް އިތުބާރުކުރެވޭ މަސްދަރުތަކުން މައުލޫމާތު ދީފައިވެ އެވެ. ސީރާޒީގޭގެ ޖުމުލަ ބޮޑުމިނަކީ 4365 އަކަފޫޓެވެ.

އެންސްޕާއިން ބޭނުންވާ 12،000 އަކަފޫޓުގެ ޖާގަ ލިބޭނީ ސީރާޒީގޭގެ ތިން ފަންގިފިލާއިންނެވެ. ދެ ފަންގިފިލާ ކުއްޔަށް ނަގާފައި ވާނަމަ އެއީ 8730 އަކަފޫޓެވެ.

އެންސްޕާގެ އޮފީސް ހިންގަން، މޯލްޑިވްސް މީޑިއާ ހައުސިން އޮފީސް އިމާރާތެއް ކުއްޔަށް ދީފައި ވަނީ މަހަކަށް 580،000ރ. އަށެވެ. އެއީ ފަސް އަހަރަށް 34.8 މިލިއަން ރުފިޔާ އެވެ.

އެހެންކަމުން މިއީ ބޮޑު އަގުގައި ރައީސް މުއިއްޒުގެ ޓީވީ ހިންގާ ކުންފުންޏަށް މަންފާވާ ގޮތަށް ވަނީ ރައްޔިތުންގެ އާސަންދަ ފައިސާ އިސްރާފުކޮށް ކޮށްފައިވާ ވައްކަމެކެވެ.

މި ޓީވީ ޗެނަލް ހެދުމަށް ބޭނުންވާ ސާމާނު ހޯދައިދިނީ އެސްޓީއޯއިން ކަމަށް ނަން ހާމަނުކުރަން އެދި އެސްޓީއޯގެ އިސް އޮފިޝަލަކު ވިދާޅުވިއެވެ. އެ ތަކެތި ދުބާއީން ގަތުމަށް ގާތްގަނޑަކަށް 21 މިލިއަން ރުފިޔާ އެސްޓީއޯ އިން ހަރަދުކުރި ކަމަށް މައުލޫމާތު ލިބިފައިވެއެވެ. އަދި އެ ތަކެތި ގަތީ ޕީއެސްއެމްއަށް ގެންނަ ތަކެތީގެ ގޮތުގައިކަމާ ނަމަވެސް ގެނައި ތަކެތީގެ ދެބައިކުޅަ އެއްބައި ގެންދިޔައީ އެމްއެމް ޓީވީއަށް ކަން ވަނީ މުއުތަބަރުކޮށް މައުލޫމާތު ލިބިފަ އެވެ.

އެހެންކަމުން ސަރުކާރުން މިވަނީ ބޮޑުތަނުން ރައްޔިތުންގެ ފައިސާއަށް ޚިޔާނާތްތެރިވެފައިކަން ފާހަގަކޮށްލެވެ އެވެ.