ޑރ މުހައްމަދު މުއިއްޒުގެ ސަރުކާރުން ރައްޔިތުން ފޭރެމުން އަންނަނީ ޓާޝިއަރީ ފެންވަރުގައި ކަމަށް ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.

އެމަނިކުފާނު ސަރުކާރަށް މިފަދައިން ފާޑުވިދާޅުވެފައިވަނީ ފޮރޮންޓް އޮފީހުގައި ރޭ ކުރިއަށް ދިޔަ ޖަލްސާގައި ވާހަކަފުޅު ދައްކަވަމުންނެވެ.

ރައީސް ޔާމީން ވަނީ ސަރުކާރުން ތެޔޮ އަގު ބޮޑުކޮށް ވިއްކާ މައްސަލަ ފާހަގަކޮށް އެކަމަށް ވަރަށް ބޮޑަށް ފާޑު ވިދާޅުވެ ސަރުކާރުން އަމަލުކުރަމުން އަންނަ ގޮތް ރައްޔިތުންނަށް ވަރަށް ސާފުކޮށް ހާމަކޮށްދެއްވާފައެވެ.

މިގޮތުން، ތެޔޮ ލީޓަރެއް އެސްޓީއޯ އަށް ޖެހޭ އަގަކީ 9ރ ކަމަށާއި ނަމަވެސް އެސްޓީއޯ އިން ސްޓެލްކޯއަށް ލީޓަރެއް ވިއްކަނީ 11ރ އަށް ކަމަށް އެމަނިކުފާނު ވިދާޅުވިއެވެ. 9ރ 30ލ އަށް ވިއްކެން އޮތް އިރުގައި 2ރ މާކްއަޕް އަކާއި އެކުގައި ސަރުކާރުން އަންނަނީ ރައްޔިތުން ޓާޝިއަރީ ފެންވަރުގައި ފޭރެމުން ކަމަށް އެމަނިކުފާނު ވަނީ ސިފަކުރައްވާފައެވެ.

މީގެއިތުރުން، ގަލްފް ހަނގުރާމައިގެ ދުވަސްވަރު ރާއްޖެއަށް އެންމެ ތެލުގެ މައްސަލަ ބޮޑުވި ދުވަސްވަރުގައިވެސް ތެޔޮ ވިއްކާފައިވަނީ ލީޓަރަކަށް މާކް އަޕްގެ ގޮތުގައި އެންމެ ލާރިއެއް ކަމަށް ރައީސް ޔާމީން ވިދާޅުވިއެވެ.

އެހެންކަމުން ސަރުކާރުން އަންނަނީ ދައުލަތުގެ ބަޖެޓް އަދި އިގްތިސާދު ރަނގަޅު ކުރުމުގެ ނަމުގައި ރައްޔިތުން ފެލަމުން ކަމަށް ރައީސް ޔާމީން ސިފަކުރައްވާފައިވެއެވެ.