މަސްތުވާތަކެތީގެ ގާނޫނަށް މިހާރު ހުށަހަޅާފައިވާ ބިލުގައި އެފަދަ މައްސަލަތަކުގައި ކުށް ސާބިތު ނުވިޔަސް މީހުންގެ މުދާ ދައުލަތަށް ނެގޭ ގޮތަށް އޮތުމުން އައްޑޫ މީދޫ ދާއިރާގެ މަޖިލިސް މެންބަރު އަބްދުއްރަހުމާން (އައްދު) ކަންބޮޑުވުން ފާޅުކުރައްވައިފި އެވެ.

މަޖިލީހުގެ މިއަދުގެ ޖަލްސާގައި އެ ބިލަށް ބަހުސް ކުރައްވަމުން އަބްދުއްރަހުމާން ވިދާޅުވީ ކުށް ސާބިތު ނުވާ މީހެއްގެ މުދާ ދައުލަތަށް ނެގޭނެ އެއްވެސް ހަމައެއް އޮންނާނެ ކަމަށް ގަބޫލު ނުކުރައްވާ ކަމަށެވެ.

އޭނަ އިތުރަށް ވިދާޅުވީ ގާނޫނުގައި މިހާރު އޮތް ގޮތުން ކޮންޓްރޯލްޑް ޑެލިވަރީ އޮޕަރޭޝަންތައް ހިންގައި ކުށް ސާބިތު ކުރުމަށް ވެސް ހުރަސްތަކެއް ހުރި ކަމަށެވެ. އެހެންވެ އެކަންކަމަށް ވެސް ހައްލު ހޯދައިދީ މިހާރަށް ވުރެ ފަސޭހައި ކޮންޓްރޯލްޑް ޑެލިވަރީ އޮޕަރޭޝަންތައް ހިންގޭނެ މަގެއް ގާނޫނުގެ ތެރެއިން ކޮށައިދޭން ޖެހޭ ކަމަށް ގަބޫލު ކުރައްވާ ކަމަށް ވިދާޅުވި އެވެ.

އައްދު ވިދާޅުވީ މި ބިލުން ހާސިލު ކުރަން ބޭނުންވާ މަގުސަދު ސާފު ނަމަވެސް އެ މަގުސަދު ހާސިލުވާނެކަމާ މެދު ސުވާލު އުފެދޭ ކަމަށެވެ. އޭނާ މެންބަރުންނަށް އިލްތިމާސްކުރެއްވީ އިސްލާހުކުރެވޭ ގާނޫނުތަކުގެ މަގުސަދު ހާސިލުކުރެވޭނެ މަގަށް  މިގާނޫނުތަކާއި ގަވާއިދުތައް ހެދުމަށެވެ.