ސްޓޭޓު ޓްރޭޑިން އޯގަނައިޒޭޝަން (އެސްޓީއޯ)އިން މޯލްޑިވްސް ޕޯޓްސް ލިމިޓެޑަށް ދޭން ޖެހޭ ފައިސާ ނުދޭތީ އެސްޓީއޯގެ ސަބްސިޑަރީ ކުންފުނި، މޯލްޑިވްސް ސްޓޭޓު ޝިޕިންގެ ބޯޓުތަކަށް ފުރުން މަނާކޮށް މާލެ ބަނދަރުގައި ހިފަހައްޓައިފިއެވެ.

މިކަމުގެ މައުލޫމާތު އެނގޭ އެމްއެސްއެސްގެ މުވައްޒަފަކު ނަން ހާމަނުކުރުމަށް އެދި "ތޭރަ އޮންލައިން"އަށް މައުލޫމާތުދީފައިވާ ގޮތުގައި އެމްއެސްއެސް ގަލެނާ ރާއްޖެއިން ލަންކާއަށް ކުރަން އޮތް ދަތުރު އެމްޕީއެލްއިން ވަނީ ހުއްޓުވާ އެ ބޯޓު މާލެ ބަނދަރުގައި އަޅުވާފައެވެ. ގަލެނާ މާލެ ބަނދަރުގައި މިހާރު އެހެން އޮންނަތާ 3 ދުވަސް ވަނީވެފައެވެ.

މައުލޫމާތު ލިބިފައިވާ ގޮތުގައި ގަލެނާ މާލެ ބަނދަރުގައި ހިފެހެއްޓީ އެސްޓީއޯއިން އެމްޕީއެލަށް ދައްކަން ޖެހޭ ފައިސާއިން، ކްރެޑިޓު ލިމިޓު ފަހަނާއަޅާ ދިޔައިރުވެސް އެއްްވެސް މިންވަރެއް ދައްކާފައިނުވާތީއެވެ. އެގޮތުން މިހާރު އެސްޓީއޯއިން އެމްޕީއެލްއަށް ދައްކަން ޖެހޭ ފައިސާގެ އަދަދު ވަނީ 20 މިލިއަން ފަހަނައަޅާފައެވެ. މި ފައިސާއަކީ މާލެ އަށް ބޯޓު ބަނދަރުކުރުމަށް ފަހު އެމްޕީއެލްއިން ބޯޓު ހުސްކޮށް އަދި ކްލިއަރ ކުރަން ނަގާ އެކި އެކި ފީތަކަށްވާ ފައިސާއާ ބަނދަރު ފީ ކަމަށްވެސް މައުލޫމާތު ލިބިފައިވެއެވެ.

އެމްއެސްއެސްގެ ބޯޓުތަކަކީ މަހަކު ތިން ދަތުރު ރާއްޖެއާ ލަންކާއާ ދެމެދު އަޅަން ޝެޑިއުލްކޮށްފަިއވާ ބޯޓުތަކެއް ނަމަވެސް އެކަމަށް މަގު ފަހިކުރަން ބޭނުންވާ އާލާތްތައް ނެތުމުގެ ސަބަބުން މަހަކު އެންމެ ގިނަވެގެންވެސް އެ ޅެނީ ދެ ދަތުރުކަމަށްވެސް އެމީހާ ވަނީ ކިޔައިދީފައެވެ. އޭގެ ސަބަބުން ރާއްޖެ އެތެރެކުރަން ޖެހޭ މުދާ ގަވާއިދުން އެތެރެ ނުވެ މުދާ ލިބުމުގައި ރައްޔިތުންނަށް ދަތިތަކާ ކުރިމަތިވެއެވެ. އަދި އެމްއެސްއެސްއަށްވެސް އެކަމުގެ ގެއްލުން ވަމުން ދެއެވެ.

މީގެ ކުރިން ފައިސާގެ މައްސަލައެއްގައި އެމްއެމްއެސްގެ ބޯޓުތަކެއް ލަންކާ ބަނދަރުގައިވެސް ހިފަހައްޓާފައިވެއެވެ.

އެސްޓީއޯއިން އެމްޕީއެލަށް ގިނަ އަދަދެއްގެ ފައިސާ ދައްކަން ހުރިކަން ހާމަވެފައިމިވަނީ އެސްޓީއޯގެ އެމްޑީ ޝިމާދު އިބްރާހިމުއާ ގުޅުން ހުރި ކޮރަޕްޝަންގެ އަޑުތަކެއް ވެސް ގަދަވެފައިވާ ދަނޑިވަޅެއްގައެވެ.