ގެދޮރުވެރިކަމާއި ބިމާއި އުމްރާނީ ތަރައްގީއާބެހޭ ވުޒާރާއާ ތިމާވެއްޓާ ބެހޭ ވުޒާރާގެ އިތުރުން ބިނާކުރުމުގެ ވުޒާރާ ހުންނަ އިމާރާތުގައި ރޯވި އަލިފާންގަނޑު އަދިވެސް އެއްކޮށް ނިއްވާނުލެވޭ ނުލެވޭ ކަމަށް އެމްއެންޑީއެފުން ހާމަކޮށްފިއެވެ.
ހެނދުނު 6:30 ހާކަން އިރު ހައުސިން މިނިސްޓްރީގެ ސީލިންގ އެއްގައި ރޯވި ކަމަށް ލަފާކުރެވޭ އަލިފާންގަނޑު މިހާރު ކޮންޓްރޯލު ކުރެވިފައިވީ ނަމަވެސް އަދިވެސް އެ އަލިފާންގަނޑު އެއްކޮށް ނިއްވާނުލެވޭ ކަމަށާ އެއްކޮށް ނިއްވާލަން ވަގުތު ނަގާނެ ކަމަށް އެމްއެންޑީއެފުން ވަނީ ހާމަކޮށްފައެވެ.
އަލިފާނުގެ ހާދިސާގެ އަދާހަމައަކަށް އެދުމުން މީޑިޔާތަކާ ހިއްސާކުރި މެސެޖުގައި އެމްއެންޑީއެފްގެ އިންފޮމޭޝަން އޮފިސަރ ވިދާޅުވީ، އަލިފާނުގެ ހުޅު ފެންނަން ނެތްނަމަވެސް، އިމާރާތުގެ އެތެރެއިން އަނދާފައިވާ ބައިން އަލިފާނުގެ އަސަރު ފިލުވޭނީ އުނދަގުލުން ކަމަށެވެ. އަދި އެއްވެސްމީހަކަށް އަނިޔާއެއް ލިބިފައިވާ ކަމުގެ މައުލޫމާތު މިހާތަނަށް ލިބިފައި ނެތް ކަމަށްވެސް އެމްއެންޑީއެފުން ހާމަކޮށްފައިވެއެވެ.
މިއަދު ހިނގި އަލިފާނުގެ ހާދިސާގައި ރޯވި އަލިފާންގަނޑު ބޮޑުވަމުން ގޮސް، އެ އިމާރާތުގައި ހިންގާ ކޮންސްޓްރަކްޝަން މިނިސްޓްރީ އާއި ސިޓީ ކައުންސިލްގެ އޮފީހަށް ވެސް ބޮޑެތި ގެއްލުންތަކެއް ވަނީ ވެފައެވެ. އަދި ތިމާވެއްޓާ ބެހޭ ވުޒާރާގައިވެސް އަލިފާން ހިފާފައިވެއެވެ. އަލިފާންގަނޑު ކޮންޓްރޯލްކުރެވުނީ ރޯވިތާ ގާތްގަނޑަކަށް ހަތަރު ގަޑިއިރު ފަހުންނެވެ.
