ޓެކްސީ ޑްރައިވަރުން ހުޅުމާލޭގައި ރޭ ބޭއްވި ސުލްހަވެރި އިހުތިޖާޖުން ތިން މީހަކު ހައްޔަރުކޮށް، 22 ކާރު ޓޯކޮށްފައިވާ ކަމަށް ފުލުހުން ބުނެފި އެވެ.

މި މުޒާހަރާ ހުއްޓުވުމަށްޓަކައި ހައްޔަރުކުރި ޑްރައިވަރުންގެ ބަންދާ މެދު ގޮތެއް ނިންމަން ކޯޓަށް ގެންދިއުމުން ހުޅުމާލޭ މެޖިސްޓްރޭޓް ކޯޓުން ވަނީ ދެ ޑްރައިވަރަކު ފަސް ދުވަހުގެ މުއްދަތަށް ބަންދުގައި ބޭތިއްބުމަށް ނިންމާފައެވެ. ފުލުހުން ބުނި ގޮތުގައި މި ޑްރައިވަރުންނަކީ ރާވައިގެން މުޒާހަރާކޮށްފައިވާ ބަޔަކަށްވާތީ، އެ މީހުންނަކީ މުޖުތަމައުގެ ސަލާމަތަށް ނުރައްކާތެރި ބައެކެވެ.

ޓެކްސީ ޑްރައިވަރުން އިހުތިޖާޖުކުރީ ސަރުކާރުން ޓެކްސީ ލައިނެއް ތައާރަފުކުރަން އުޅޭތީ އެކަމާ ދެކޮޅަށެވެ. ނަމަވެސް، ސަރުކާރުގެ ޓެކްސީ ލައިނާ ގުޅޭ އެއްވެސް މަސައްކަތެއް އަދި ނުފަށާ ކަމަށް ޓްރާންސްޕޯޓް މިނިސްޓްރީން އިއްޔެ ވަނީ ބުނެފަ އެވެ.

ޓެކްސީ ޑްރައިވަރުން ބުނާ ގޮތުގައި، ސަރުކާރުން މި ހިދުމަތުގެ ތެރެއަށް ވަނުމުން އެކަމުގެ ގެއްލުން ޑްރައިވަރުންގެ އިތުރުން ޓެކްސީ ސެންޓަރުތަކާއި ގަރާޖުތަކަށް ވެސް ކުރާނެ އެވެ. ޑްރައިވަރުން މި ވަގުތު ތިބީ ޓެކްސީ ފްލީޓާ އެކު، އެ މީހުންގެ މުސްތަގުބަލަށް ވާނެ ގޮތަކާ މެދު ސުވާލު އުފެދިފައި ކަމަށް ވެސް އެ މީހުން ބުނެ އެވެ.

ރައްޔިތުންގެ މަޖިލީހުގެ އިގުތިސާދީ ކޮމިޓީގައި ޓްރާންސްޕޯޓް މިނިސްޓަރު މުހައްމަދު އަމީން މިދިޔަ އޮކްޓޯބަރު މަހުގެ 29 ވަނަ ދުވަހު ވިދާޅުވެފައި ވަނީ، ޓެކްސީ ހިދުމަތުގެ ތެރެއަށް ސަރުކާރުން ވަދެ، އުސޫލުތަކާއި ގާނޫނުތަކެއް ހަދައިގެން ކޮންޓްރޯލް ނަގަން ޖެހޭ ކަމަށެވެ.

ޓެކްސީކުރުމުގެ ވިޔަފާރީގެ ތެރެއަށް ސަރުކާރުން ވަނުމަކީ އެމްޑީީޕީން ކުށްވެރިކުރާ ކަމެއް ކަމަށާއި ޓެކްސީ ޑްރައިވަރުން ކުރާ އިހުތިޖާޖު ހުއްޓުވުމަށްޓަކައި ޓެކްސީ ޑްރައިވަރުން ހައްޔަރުކުރުމާއި މުދާ ހިފެހެއްޓުމަކީ މި ސަރުކާރުން ހިންގާފާއިވާ ނާތަހުޒީބު ނޭއްގާނީ އަމަލެއްކަމަށް ސިޔާސީ ޕާޓީތަކުން އަންނަނީ ބުނަމުން ނެވެ.

އެގޮތުން އެމްޑީޕީން ވަނީ ހައްޔަރުކޮށްފައިވާ ޓެކްސީ ޑްރައިވަރުން މިނިވަންކޮށް، ހިފަހައްޓާފައިވާ އުޅަނދުތައް ވަގުތުން ދޫކޮށްލަން ސަރުކާރަށް ގޮވާލައިފަ އެވެ.

ހައްޔަރު ކުރި ޓެކްސީ ޑްރައިވަރުންނަށް އެމްޑީޕީގެ ފަރާތުން ގާނޫނީ ވަކީލުންގެ އެހީތެރިކަން ފޯރުކޮށްދެމުންދާ ކަމާއި، ޓެކްސީ ޑްރައިވަރުންގެ އުޅަނދުތައް އަނބުރާ ހޯދުމަށް ކުރަންޖެހޭ ގާނޫނީ މަސައްކަތް ވެސް އެ ޕާޓީގެ ގާނޫނީ ވަކީލުންގެ ޓީމުން ކުރަމުންގެންދާ ކަމަށް އެ ޕާޓީން ވަނީ ބުނެފަ އެވެ.

ސަރުކާރުން ޓެކްސީގެ ހިދުމަތް ފަށަން ނިންމުމާއި، ޕާކު ކުރާނެ ޖާގަ ނުދައްކައި ވެހިކަލް ޓޯކުރާ މައްސަލައިގައި ވެސް މިދިޔަ އޮގަސްޓުގައި ޓެކްސީ ޑްރައިވަރުން އިހުތިޖާޖުކުރި އެވެ. އެ އިހުތިޖާޖު ނިންމައިލީ، ޑްރައިވަރުންނަށް ގެއްލުން ނުވާނެ ކަމުގެ ޔަގީންކަން އަމީން ދެއްވުމުންނެވެ.