Taxi Driverunge Ehves Haisiyatheh Oi Kamakah Sarukaarun Gabooleh Nukurey: Driverun

ޓެކްސީ ޑްރައިވަރުންނަކީ އެއްވެސް ހައިސިއްޔަތެއް އޮތް ބަޔެއް ކަމަށް ސަރުކާރުން ގަބޫލުނުކުރާ ކަމަށް ޓެކްސީ ޑްރައިވަރުން ބުނެފިއެވެ.

ޓެކްސީ ޑްރައިވަރުން މިފަދައިން ބުނެފައިވަނީ ޗެނަލް 13 އިން ކުރިއަށް ގެންދިޔަ ޓެކްސީ ޑްރައިވަރުންގެ ޚާއްސަ އިންޓަވިއުއެއްގައި ވާހަކަދައްކަމުންނެވެ.

ބޭންކް ތަކުން ދޫކުރާ ލޯނުތައް ޓެކްސީ ޑްރައިވަރުންނާއި މަސްވެރިންނަށް ލިބުމުގެ ދަތިކަމާއި ބެހޭ ގޮތުން ކުރެވުނު ސުވާލަށް ޖަވާބު ދެމުން ބުނެފައިވަނީ 06 މަސް ދުވަހުގެ މުސާރަ ސްލިޕެއް ނެތި ބޭންކްތަކުން ލޯނު ދޫނުކުރާ ކަމަށެވެ.

ޓެކްސީ ޑްރައިވަރުންނަކީ "ވަޒީފާ" އަދާކުރާ ބަޔެއްނޫން ކަމަށާއި ގަނޑުކޮށް އެއްފަހަރާ އެކައުންޓަށް ފައިސާ ވަންނަ ބަޔެއް ނޫން ކަން ޓެކްސީ ޑްރައިވަރުންގެ ފަރާތުން އިންޓަވިއުގައި ބައިވެރި ފަރާތުން ވަނީ ފާހަގަކޮށްފައެވެ.

އަޅުގަނޑުމެންނަކީ ގަނޑުކޮށް ފައިސާ ލިބޭ ބަޔެއް ނޫން. މާލެ ތެރޭގެ ދަތުރަކަށް 30 ރުފިޔާ ނުވަތަ އެއާޕޯޓް ދަތުރަކަށް 80 ރުފިޔާ. އެގޮތަށް އަޅުގަނޑުމެން އެކައުންޓަށް ފައިސާ ވަންނަނީ

- ޓެކްސީ ޑްރައިވަރުން

މީގެ އިތުރުން، މިފަދައިން މި އުސޫލު އޮންނަ ނަމަ ޓެކްސީ ޑްރައިވަރުންގެ އިތުރުން މަސްވެރިންނަށްވެސް ދުވަހަކުވެސް ލޯނު ނެގުމަށް މަގު ފަހިވެގެން ނުދާނެ ކަމަށް ބުނެ މި ފަރާތްތަކުން ވަނީ ކަންބޮޑުވުން ފާޅުކޮށްފައެވެ.

މިއާއި އެކު ސަރުކާރުން ވަނީ ޓެކްސީ ޑްރައިވަރުން ވަރަށް ބޮޑަށް ނިކަމެތިކޮށްފައިވާ ކަމަށް އިންޓަވިއުގައި ބުނެފައިވެއެވެ.

ޓެކްސީ ޑްރައިވަރުންގެ ދަފްތަރެއް މި ސަރުކާރުން އެކުލަވާލާފައިވީނަމަވެސް އެކަމުން ޓެކްސީ ޑްރައިވަރުންނަށް އެއްވެސް ފައިދާއެއް މިހާތަނަށް ކޮށްފައިނުވާ ކަމަށްވެސް ބުނެފައިވެއެވެ.

މިއާއި އެކު ގައުމީ އިނާމެއް ލިބުމުގެ މިންވަރެއްވެސް ޓެކްސީ ޑްރައިވަރުންނަށް ލިބިފައިވާ ނުވާ ކަމަށް މި ފަރާތްތަކުން ބުނެފައިވެއެވެ.