ސަރުކާރުން ޓެކްސީގެ ހިދުމަތް ދިނުމަށް ތައްޔާރުވަމުންދާތީ އެކަމާ ދެކޮޅަށް މުޒާހަރާކޮށްގެން ކޯޓު އަމުރެއްގެ ދަށުން ހައްޔަރުކުރި ޓެކްސީ ޑްރައިވަރު ފަސް ދުވަހުގެ މުއްދަތަށް ބަންދުގައި ބެހެއްޓުމަށް ހުޅުމާލޭ މެޖިސްޓްރޭޓް ކޯޓުން އަމުރުކޮށްފި އެވެ.

ފުލުހުން ރޭ ކޯޓު އަމުރެއްގެ ދަށުން ހައްޔަރުކުރީ ޑްރައިވާސް އެސޯސިއޭޝަންގެ އިންތިޒާމް ސެކްރެޓަރީ މިސްބާހު ޝަރީފު އެވެ. މިސްބާހު ހައްޔަރު ކުރީ ރޭ ވެސް މުޒާހަރާކުރަން އިއުލާނުކޮށްފައި ވަނިކޮށެވެ.

ޓެކްސީ ޑްރައިވަރުން ހައްޔަރު ކުރުމާއި 21 ޓެކްސީއެއް 30 ދުވަހަށް ހިފެހެއްޓުމުން، އެމްޑީޕީން ވަނީ ފުލުހުންގެ އެ އަމަލު ކުށްވެރިކޮށްފަ އެވެ.

މާބޮޑު ތަފްސީލެއް ނުދީ ފުލުހުން ބުނީ އެ މައްސަލަ ތަހްގީގްކުރަމުންދާ ކަމަށެވެ.

ޑްރައިވަރުން މިދިޔަ ބުދަ ދުވަހު ހުޅުމާލޭގައި ކުރިއަށް ގެންދިޔަ އިހްތިޖާޖު އާ ގުޅިގެން 3 ޑްރައިވަރުން ފުލުހުން ހައްޔަރު ކުރިއެވެ. އޭގެ ތެރެއިން އެކަކު ދޫކޮށްލައި، އަނެއް ދެ މީހުން އަދިވެސް ތިބީ ބަންދުގަ އެވެ.

މާލޭ ސަރަހައްދުގައި ޓެކްސީ ޑްރައިވަރުން އިހްތިޖާޖަށް ނުކުތީ ސަރުކާރުން ޓެކްސީގެ ހިދުމަތާ ގުޅޭ ގޮތުން ގެންގުޅޭ ސިޔާސަތުތަކާ މެދު ހިތްހަަމަ ނުޖެހި، އެކަމުގެ ކަންބޮޑުވުންތައް ސަރުކާރުގެ ސަމާލު ކަމަށް ގެނައި ނަމަވެސް އެދެވޭ ހައްލެއް ނުލިބުމުންނެވެ.

ޓެކްސީ ޑްރައިވަރުން ބުނާ ގޮތުގައި، ސަރުކާރުން މި ހިދުމަތުގެ ތެރެއަށް ވަނުމުން އެކަމުގެ ގެއްލުން ޑްރައިވަރުންގެ އިތުރުން ޓެކްސީ ސެންޓަރުތަކާއި ގަރާޖުތަކަށް ވެސް ކުރާނެ އެވެ. ޑްރައިވަރުން މި ވަގުތު ތިބީ ޓެކްސީ ފްލީޓާ އެކު، އެ މީހުންގެ މުސްތަގުބަލަށް ވާނެ ގޮތަކާ މެދު ސުވާލު އުފެދިފައި ކަމަށް ވެސް އެ މީހުން ބުނެ އެވެ.