ހައުސިން މިނިސްޓްރީގައި އަލިފާން ރޯވެ ޑޭޓާ އަދި ސާރވަރ ސަލާމަތްނުވީ އެންސީއައިޓީގައި ޑޭޓާ ބެކަޕްކުރަން ދިން ލަފަޔާ އެއްގޮތަށް އަމަލުކޮށްފައި ނުވުމުން ކަމަށް ކުރިގެ ޓެކްނޮލޮޖީ މިނިސްޓަރު އަދި ޕީއެންއެފްގެ ސެކެރެޓަރީ ޖެނެރަލް މުހައްމަދު މަލީހު ޖަމާލު ވިދާޅުވެއްޖެއެވެ.

ބުރާސްފަތި ދުވަހު ގްރީން ބިލްޑިންގައި ރޯވި އަލިފާނުގެ ހާދިސާގައި ހައުސިން މިނިސްޓްރީގައި ހުރި ހުރިހާ ލިޔެކިޔުމަކާއި ޑޭޓާއެއް އަނދައިގެން ގޮސްފައިވާ ކަމަށް މިނިސްޓަރު އަލީ ހައިދަރު ވަނީ ވިދާޅުވެފައެވެ.

މިނިސްޓަރު ވިދާޅުވީ އަލިފާން ރޯވުމުގެ ސަބަބުން ސަލާމަތް ކުރެވުނީ ވަރަށް މަދު ލިޔުންތަކެއް ކަމަށެވެ. ޑިޖިޓަލް ގިނަ މައުލޫމާތު ހުންނާނީ ސާވާގައި ރައްކާ ކޮށްފައި ކަމަށާއި ޑިސްކު ނަގައިގެން ވެސް ރިކަވާ ކުރެވޭތޯ ބަލަމުން އަންނަ ކަމަށް އޭނާ ވިދާޅުވިއެވެ.

މި ކަމާ ގުޅިގެން މަލީހު އެކްސްގައި ކުރެއްވި ޕޯސްޓުތަކެއްގައި ވިދާޅުވީ، ޑޭޓާތައް ހަމައެކަނި ހައުސިން މިނިސްޓްރީގައި ހުރި ލޯކަލް ސާވާގައި ހުރި ލޯކަލް ސާވާގައި ބެކަޕްކުރުމަކީ ފަރުވާކުޑަކަމުގެ އަމަލެއް ކަމަށާއި އަދި ސަރުކާރުގެ ހުރިހާ އިދާރާއެއްގެ ބެކްއަޕް އެންސީއައިޓީގެ ޑޭޓާ ސެންޓަރުގައި ރައްކާކުރުން މުހިއްމުކަމަށެވެ.

ސަރުކާރުގެ ޑޭޓާ ރާއްޖޭގެ ޖުރިސްޑިކްޝަންތެރޭ ބެހެއްޓުމަށް ކުރި މުހިންމު މަސައްކަތްތައް ފާހަގަކުރަމުން މަލީހު ވިދާޅުވި ޓެކްނޮލޮޖީ މިނިސްޓަރު ކަމުގައި ހުންނެވި ދުވަސްވަރު މުޅީންއާ ސްޓޭޓް އޮފް ދި އާޓް ޑޭޓާ ސެންޓަރެއް އަޅަން 10 މިލިއަން ޑޮލަރު ސެކިއޯކޮށް ކުރެހުން ނިންމާ ހުށަހެޅުމުން ރައީސް އޮފީހުން އޭރު ކުރީ ރިޖެކްޓް ކަމަށެވެ. އަދި އެންސީއައިޓީގެ ޑީއާރު ސައިޓެއްގެ ގޮތުގައި ފުވައްމުލަކުގަ ހަދަންފެށި ޑޭޓާ ސެންޓަރު އެބަންޑަންކުރިކަމަސާއި އަދި ކުޅުދުށްފުށި މަޝްރޫއުކުރިއަށް ނުގެންދިޔަކަމަށް މަލީހު ވިދާޅުވިއެވެ.

މަލީހު ވިދާޅުވީ ސަރުކާރުގެ ހިންގުން އަދިވެސް ވަރަށް ބޯދާ ކަމަށާއި ސަރުކާރުގެ ހުރިހާ އިދާރާއަކުން ވެސް އެހާދިސާއިން އިބްރަތް ލިބިގަންނާނެ ކަމަށް އުއްމީދުކުރައްވާ ކަމަށެވެ.