ހައުސިން މިނިސްޓްރީގައި ހިނގި އަލިފާނުގެ ބޮޑު ހާދިސާ ތަހުގީގުކުރަން ބޭރުގެ ފޮރެންސިކް ޓީމަކާ އެކު މަސައްކަތްކުރަން ތައްޔާރުވަމުން އަންނަ ކަމަށް ކޮމިޝަނާ އޮފް ޕޮލިސް އަލީ ޝުޖާއު ވިދާޅުވުމާއި ގުޅިގެން ރައީސް އަބްދުﷲ ޔާމީން އަބްދުލްގައްޔޫމް ކަންބޮޑުވުން ފާޅުކުރައްވައިފި އެވެ.

ރޭ ޕީޕަލްސް ނޭޝަނަލް ފްރަންޓް (ޕީއެންއެފް) އިން ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ ޔާމީން މިހާތަނަށް އަލިފާން ހިނގަން މެދުވެރިވި ސަބަބެއް ކަމާއި ގުޅުންހުރި އިދާރާތަކުން ސާފުކޮށްދެވެންޖެހޭނެ ކަމަށާއި ހާއްސަކޮށް އެވަރުގެ އަލިފާނުގެ ހާދިސާއެއް ހިނގައިފިކަމަށް ވާނަމަ ފުލުހުންނާއި ސިފައިންނަށް މިހާރު އެއީ ކިހިނެއް ހިނގި އަލިފާނެއްކަން ބުނެދޭން އެނގެންވާނެ ކަމަށް އެމަނިކުފާނު ވިދާޅުވި އެވެ.

ރައީސް ޔާމީން ތުހުމަތުކުރެއްވި ގޮތުގައި ގެއްލުނު ލިޔެކިޔުންތަކުގެ ތެރޭގައި ސިޓީ ކައުންސިލްގެ ލިޔެކިޔުންތަކެއް ވެސް ހިމެނޭއިރު، އޭގެ ތެރޭގައި ކައުންސިލްގެ މައްޗަށް ކޮރަޕްޝަންގެ ތުހުމަތު ކުރެވޭ ފަދަ ލިޔެކިޔުންތައް ހިމެނޭނެ އެވެ.

އެ ހާދިސާއާ ގޮތުން މައުލޫމާތު ދިނުމަށް ދަރުބާރުގޭގައި ބޭއްވި ނޫސްވެރިންގެ ބައްދަލުވުމެއްގައި ޝުޖާއު ވިދާޅުވީ، މައްސަލައިގެ ތަހުގީގުގައި ބޭރުގެ ތަޖުރިބާކާރުން ހިމެނޭ ޓީމެއް ވީހާވެސް އަވަހަށް ބައިވެރިކުރުމަށް މަސައްކަތް ކުރަމުން އަންނަ ކަމަށެވެ. އޭނާ ވިދާޅުވީ އުއްމީދަކީ ކުރިއަށް އޮތް ދެތިން ދުވަހެއްގެ ތެރޭގައި އެ ޓީމާ ގުޅިގެން މަސައްކަތް ކުރެވޭނެ ގޮތް ވުން ކަމަށެވެ.

އޭނާ ވިދާޅުވީ މައްސަލައިގެ ތަހުގީގަށް ފުލުހުންގެ ފޮރެންސިކް ޓީމުން މިހާރު އިމާރާތް ހުރި ތަނުގައި ހަރަކާތްތެރިވަމުން އަންނަ ކަމަށެވެ. އެގޮތުން އެ ސަރަހައްދުގައި ހުރި ސީސީޓީވީ ފުޓެޖް މިހާރު ނަގައި، އެނެލިސިސް ހެދުމުގެ މަސައްކަތާއި އިމާރާތުން ސާމްޕަލްތައް ނެގުމުގެ މަސައްކަތްކުރާކަން އޭނާ ފާހަގަކުރެއްވި އެވެ.

ސުޖާއު މިހެން ވިދާޅުވިއިރު އަލިފާނުގެ ހާދިސާގެ ތަހުގީގަށް ބޭރުގެ ޓީމު އައުމުގެ ކުރިން އަލިފާން ރޯވި ސަރަހައްދު ފޮޅާ ސާފުކޮށްފައިވާތީ ގިނަ ބަޔަކު އައްނަނީ ސުވާލު އުފައްދަމުން ނެވެ. ސަބަބަކީ ފޮޅާ ސާފުކުރުމުން ހެކި ގެއްލިފައިވާ ކަމަށެވެ.

އަލިފާނުގެ ހާދިސާއާ ގުޅިގެން ސިޓީ ކައުންސިލުން ބުނީ، އެ ކައުންސިލްގެ ލޭންޑް ޑިޕާޓްމަންޓުގެ 90 އިންސައްތަ ލިޔެކިޔުން ސަލާމަތް ކުރެވުނު ކަމަށެވެ. އަދި ބޯހިޔާވަހިކަމާއި ގެދޮރުވެރިކަމާ ގުޅުންހުރި އެއްވެސް ލިޔެކިޔުމެއް ނުގެއްލޭކަމަށް އިންފްރާންސްޓްރަކްޗާ މިނިސްޓަރު، ޑރ. އަބްދުﷲ މުއްތަލިބު ވަނީ ވިދާޅުވެފަ އެވެ. ނަމަވެސް ރަށްރަށުގެ ލޭންޑް ޔޫސް ޕްލޭނާ ގުޅުން ހުރި ބައެއް ލިޔެކިޔުންތައް ގެއްލިފައިވާ ކަމަށް ހައުސިން މިނިސްޓަރު ޑރ. އަލީ ހައިދަރު ވިދާޅުވި އެވެ. އަދި އެ ތަނުގެ ސާވާތައް ސަލާމަތްވާނެ ކަމަށް ނުބެލެވޭ ކަމަށް ހައިދަރު ވަނީ ވިދާޅުވެފަ އެވެ.

އެމްއެންޑީއެފުން ބުނެފައިވާ ގޮތުގައި، ބުރާސްފަތި ދުވަހު އަލިފާން ރޯވި ކަމުގެ ރިޕޯޓް ލިބުނީ 06:27 ހާއިރެވެ. އަދި އަލިފާންގަނޑު މެންދުރު ކޮންޓްރޯލް ކުރެވި، ހަވީރު އެއްކޮށް ނިއްވާލެވުނު ކަމަށް ބުނެފައިވެ އެވެ. އަލިފާންގަނޑު ނިއްވާލެވުނު ލެއް ލަސްކަމުން ގިނަބައެއްގެ ފާނޑުކިޔުން ވަނީ އަމާޒުވެފަ އެވެ.

އެ ހާދިސާގެ ސަބަބުން ތިން މިނިސްޓްރީގެ މަސައްކަތްތައް ހުއްޓިފައިވާއިރު، ދަރުބާރުގޭގައި މަސައްކަތްތައް ފެށުމުގެ ތައްޔާރީތައް އަންނަނީ ވަމުންނެވެ.