އަންނަ އަހަރަށް ލަފާކޮށް ފާސް ކޮށްފައިވާ ދައުލަތުގެ ބަޖެޓުން ސިޔާސީ ޕާޓީތަކަށް ދޫކުރާ ފައިސާ ލިބުމުގެ ޝަރުތު ހަމަވަނީ ފަސް ސިޔާސީ ޕާޓީއެއްގެ ކަމަށް އިލެކްޝަންސް ކޮމިޝަން (އީސީ) އިން މިއަދު ބުނެފި އެވެ.

އިލެކްޝަންސް ކޮމިޝަނުން ބުނީ 2025 ވަނަ އަހަރުގެ ބަޖެޓް ފާސްކުރި ދުވަހުގެ ނިޔަލަށް 10،000 މެންބަރުން ހަމަވަނީ ހަ ސިޔާސީ ޕާޓީއެއްގައި ކަމަށެވެ. ނަމަވެސް 34،000 ވުރެ ގިނަ މެންބަރުން ހިމެނޭ ޕީޕީއެމް އުވާލަން ހުށައަޅާފައިވާތީ ފައިސާ ލިބޭ ޕާޓީތަކުގެ ލިސްޓުން އެ ޕާޓީގެ ނަން ވަނީ އުނިކޮށްފަ އެވެ. އެ ޕާޓީ އުވާލުމުގެ މަރުހަލާ ވަނީ ފެށިފަ އެވެ.

އެހެން ކަމުން ދައުލަތުގެ ބަޖެޓުން ފައިސާ ލިބޭނީ؛

•  އެމްޑީޕީ

•  އަދާލަތު ޕާޓީ

•  ޖުމްހޫރީ ޕާޓީ

•  އެމްޑީއޭ

•  ކޮންގްރެސް ޕާޓީ

މި ޕާޓީތަކުގައި މިވަގުތު މެންބަރުން ތިބި އަދަދެއް ކޮމިޝަނުން ހާމައެއް ނުކުރެ އެވެ. މިވަގުތު ފެންނަ މައުލޫމާތުތަކުން އެންމެ މެންބަރުން ގިނައީ އެމްޑީޕީގަ އެވެ. އެޕާޓީގައި 50،851 މެންބަރުން އެބަ ތިއްބެވެ. ކޮންގްރެސް ޕާޓީގައި 28،983 މެންބަރުން ތިބިއިރު ޖުމްހޫރީ ޕާޓީގައި 17،379 މެންބަރުން އެބަތިއްބެވެ.

އީސީން ޕާޓީތަކަށް ދޭނެ ފައިސާގެ އަދަދު ކަނޑައަޅާނީ މި މަހުގެ ނިޔަލަށް ޕާޓީތަކުގައި މެންބަރުން ތިބި ޖުމްލަ އަދަދަށް ބަލައިގެންނެވެ.

މީގެ ކުރިން ސިޔާސީ ޕާޓީތަކަށް ފައިސާ ދޫކުރަނީ އެ އަހަރެއްގެ ދައުލަތުގެ ބަޖެޓުން 0.1 ޕަސެންޓާއި 0.2 ޕަސެންޓާ ދެމެދުގެ އަދަދެކެވެ. ނަމަވެސް މަޖިލީހުން ގާނޫނު އިސްލާހު ކުރުމަށް ފަހު މިހާރު ވަނީ ބަޖެޓުން އެ އަހަރަކު ލިބޭނެ ކަމަށް ލަފާކުރާ އާމްދަނީގެ 0.1 ޕަސެންޓާއި 0.2 ޕަސެންޓާ ދެމެދުގެ އަދަދެއް ޕާޓީތަކަށް ދޫކުރާ ގޮތަށް ކަނޑައަޅައިފަ އެވެ.

މި އަހަރަށް ކަނޑައެޅި ބަޖެޓުން ސިޔާސީ ހަ ޕާޓީއަކަށް ވަނީ 44 މިލިއަން ރުފިޔާ ދީފަ އެވެ.