ރާއްޖޭގެ ފަތުރުވެރިކަމުގެ މާކެޓް ގެ އެއްވަނަ އަށް ޗައިނާ އަރައިފިއެވެ.

ޓުއަރިޒަމް މިނިސްޓްރީން ހާމަ ކޮށްފައިވާ ގޮތުގައި ފަތުރުވެރިކަމުގެ ޑެއިލީ ރިޕޯޓް ގައި މިދިޔަ އަހަރުގެ މި މުއްދަތުގައި 3 ވަނައިގައި އޮތް ޗައިނާ މި އަހަރު ވަނީ 23,972 ފަތުރުވެރިންނާއި އެކު މާކެޓްގެ އެއްވަނަ ހޯދާފައެވެ. އަދި ރާއްޖޭގެ ފަތުރުވެރިކަމުގެ މާކެޓްގައި ޗައިނާ ފަތުރުވެރިންގެ މާކެޓް ޝެއާ އަކީ 11.2 އިންސައްތައެވެ.

މި ބަދަލާއި އެކު މިއަހަރު ރާއްޖޭގެ މާކެޓްގައި ކުރިން އެއްވަނައިގައި އޮތް ރަޝިއާ ވަނީ 21,898 ފަތުރުވެރިންނާއި އެކު ދެވަނަ އަށް ވެއްޓިފައެވެ. މާކެޓް ގެ ތިންވަނައިގައި އޮތީ އިޓަލީއެވެ. އެގައުމުން މި އަހަރުގެ މިހާތަނަށް 21,321 ފަތުރުވެރިން ވަނީ ރާއްޖެއަށް ޒިޔާރަތްކޮށްފައެވެ.

މިދިޔަ އަހަރުގެ މި މުއްދަތުގައި ރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރީ އިންޑިއާ އިން ނަމަވެސް މި އަހަރު އެ ގައުމުން ފަތުރުވެރިން ޒިޔާރަތް ކުރި އަދަދު ވަނީ މާކެޓް ގެ 5 ވަނަ އަށް ވެއްޓިފައެވެ. މި އަހަރު އެ ގައުމުން ރާއްޖެއަށް ޒިޔާރަތް ކުރީ 16,536 ފަތުރުވެރިންނެވެ.

މި މަހުގެ 3 ވަނަ ދުވަހާއި ހިސާބަށް ރާއްޖެ އަށް ޖުމްލަ 214,470 ފަތުރުވެރިން ވަނީ ޒިޔާރަތްކޮށްފައެވެ. މިއީ ފާއިތުވި ދެ އަހަރާއި އަޅާ ބަލާއިރު 13.3 އިންސައްތަ ކުރިއެރުމެކެވެ. 2023 ވަނަ އަހަރުގެ މި މުއްދަތުގައި ރާއްޖެ އަށް ޒިޔާރަތް ކުރީ 189,332 ފަތުރުވެރިން ކަމަށް ވާއިރު 2022 ވަނަ އަހަރު ރާއްޖެއަށް ޒިޔާރަތް ކުރީ 143,876 ފަތުރުވެރިންނެވެ.

މި އަހަރު އެންމެ ގިނަ ފަތުރުވެރިން ރާއްޖެ އަށް ޒިޔާރަތްކުރީ 3 ފެބްރުއަރީ ވީ ހޮނިހިރު ދުވަހުއެވެ. އެދުވަހު ރާއްޖެއަށް 8,900 ފަތުރުވެރިން ޒިޔާރަތްކޮށްފައިވެއެވެ.