ވޭތުވެދިޔަ 24 ގަޑިއިރުތެރޭގައި މާލެއަށް ވަރަށް ބޮޑަށް ވިއްސާރަކޮށް، 136.5 މިލިލީޓަރުގެ ވާރޭ ވެހިފައިވާ ކަމަށް ރެކޯޑް ކުރެވިފައިވާއިރު، ރާއްޖޭގެ ހުރިހާ ހިސާބަކަށް މެޓް އޮފީހުން ވައިޓް އެލާޓް ނެރެފި އެވެ.

އިއްޔެ ރާއްޖޭގެ އެކި ހިސާބުތަކަށް ވިއްސާރަކޮށްފައިވާއިރު މިއަދު ވެސް އެކި ހިސާބުތަކަށް ވިއްސާރަކުރާނެ ކަމަށް މެޓުން ވަނީ ލަފާކޮށްފަ އެވެ. މިއަދު ވެސް ބައެއް ހިސާބުތަކަށް ބޯކޮށް ވާރޭވެހި ގުރުރާނެ ކަމަށް ވެސް ލަފާކޮށްފައިވެ އެވެ.

ބޯކޮށް ވާރޭވެހި މޫސުން ގޯސްވާނެ ކަމަށް ލަފާކޮށް އެކި އެލާޓުތައް މެޓް އޮފީހުން ދަނީ ނެރެމުންނެވެ. މިވަގުތު ވެސް މުޅި ރާއްޖެއަށް ހެން އޮތީ ވައިޓް އެލާޓް ނެރެފަ އެވެ.

އެމްއެންޑިއެފުން ބުނީ މާލެގައި ފެންބޮޑުވުމާ ގުޅިގެން ފެން ހިންދުމުގެ މަސައްކަތް ކުރަމުން އަންނަ ކަމަށެވެ. އެގޮތުން ވަރަށް ހެނދުނުން ފެށިގެން މާލޭގެ ގެތަކަށް ފެން ވަންނާތީ ވެލި ބަސްތާ ޖެހުމުގެ މަސައްކަތް ވެސް ސިފައިން އަންނަނީ ކުރަމުންނެވެ.

އެމްއެންޑީއެފުން ބުނީ މާލޭގެ ފަސް ސަރަހައްދެއްގައި 16 ޕަމްޕު ބަހައްޓައިގެން، ފެން ހިންދުމުގެ މަސައްކަތް ކުރަމުން އަންނަ ކަމަށެވެ. އެ ސަރަހައްދުތަކުގެ ތެރޭގައި ވެސްޓްޕާކު ސަރަހައްދު، އައިޖީއެމްއެޗް ސަރަހައްދު، ވިލިނގިލީ ފެރީ ޓާމިނަލް ސަރަހައްދު، ދިރާގު ސަރަހައްދު، އަދި ޖެލީ ޕިއްޒާ ސަރަހައްދު ހިމެނޭ ކަމަށް ބުނެފައިވެ އެވެ.

މިދިޔަ ބުދަ ދުވަހުން ފެށިގެން ފަސް ދުވަހުގެ މުއްދަތަކަށް ރާއްޖޭގެ ހުރިހާ ހިސާބަކަށްހެން މޫސުން ގޯސްވާނެ ކަމަށް މެޓުން ވަނީ ބުނެފަ އެވެ. އަދި، މި ދުވަސްވަރު ހާއްސަކޮށް ކަނޑުދަތުރުކުރާ ފަރާތްތަކުން މޫސުމަށް ސަމާލުވެ ރައްކާތެރިވުމަށްވެސް މެޓުން އިލްތިމާސްކޮށްފައިވެ އެވެ.

ދެ މޫސުން ބެދޭ މި ދުވަސްވަރަކީ އާންމުކޮށްވެސް މޫސުން ގޯސްވާ ދުވަސްވަރެކެވެ. މެޓުން ލަފާކުރާ ގޮތުގައި މި ދުވަސްވަރު ވިލާގަނޑުގައި 55 މޭލާ ހަމައަށް ވައި ގަދަވާނެ އެވެ.