އެމަނިކުފާނުގެ ވެރިކަމުގައި ހުޅުމާލޭ ދެވަނަ ފިޔަވަހި ހިއްކި ދުވަހުން ފެށިގެން ހުޅުމާލެއިން ބިންތައް ދޫކުރަމުން އައިސްފައިވާ ގޮތް މިނިވަން ކޮމިޝަނަކުން ތަހުގީގުކުރުމަށް ރައީސް އަބްދުﷲ ޔާމީން ގޮވާލައްވައިފި އެވެ.

ބުރާސްފަތި ދުވަހުގެރޭ ޕީއެންއެފުން ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ ހުރިހާ ސަރުކާރެއްގައި ވެސް ހުޅުމާލޭ "ބިމުން ވައްކަން ކޮށްފައި އެބަހުރި" ކަމަށެވެ.

ރައީސް ޔާމީން ވިދާޅުވީ މިހާރު ކުރިއަށްދާ ތަހުގީގަކީ ރައްޔިތުންގެ ލޮލުގައި އަޅުވާ އަނދުނެއް ކަމަށެވެ. މި މައްސަލައަކީ މިއަދަކު އިއްޔެއަކު ހިނގި ކަމެއް ނޫންކަން ފާހަގަކުރައްވަމުން ރައީސް ޔާމީން ވިދާޅުވީ މިއީ އެތައް ޒަމާނަކަށް ދިގުލައިގެން ގޮސްފައިވާކަމެއް ކަމަށާއި، އެކަން ހިނގަމުން އައިކަން ރައީސުލްޖުމްހޫރިއްޔާ ޑރ.މުހައްމަދު މުއިއްޒަށް އެނގިވަޑައިގަންނަވާނެ ކަމަށެވެ.

އިތުރަށް ރައީސް ޔާމީނު ވިދާޅުވީ ބިމުގެ ކޮރަޕްޝަނަކީ ކުރިއްސުރެ ހިނގަމުން އަންނަ ކަމެއް ކަމަށެވެ. އެގޮތުން ނިމުނު އިބްރާހީމް މުހައްމަދު ސޯލިހުގެ ސަރުކާރުގައިވެސް އަދި އޭގެ ކުރިންވެސް ހިނގާފައި އޮތް ކަމެއް ކަމަށް ވިދާޅުވެ ރައީސް ޔާމީން ހުށަހެޅުއްވީ ބިމާ ގުޅޭ ކޮރަޕްޝަނުގެ މައްސަލަތައް ވަކި މިނިވަން ކޮމިޝަނެއް މެދުވެރިކޮށް ތަހުގީގުކުރުމަށެވެ.

އެގޮތުން އެމަނިކުފާނުގެ ވެރިކަމުގައި ހުޅުމާލޭ ދެވަނަ ފިޔަވަހި ހިއްކި ދުވަހުން ފެށިގެން އަދި ބިން ދޫކުރަން ފެށީއްސުރެ ކަންކަަން ހިނގާފައި ހުރި ގޮތް ބަލަންޖެހޭކަން ފާހަަގަކުރައްވަމުން ޔާމީން ވިދާޅުވީ، އެމަނިކުފާނުގެ ވެރިކަމުގައި އެމަނިކުފާނަށް އެނގިވަޑައިނުގެން އެމަނިކުފާނުގެ ނަންފުޅު ބޭނުންކޮށްގެން އެއިރު ޕާޓީގެ އިސްވެރިންގެ ގޮތުގައި ތިއްބެވި ބައެއް ބޭފުޅުން ހުޅުމާލެއިން ބިން ހޯދައިގެން ބޮޑެތި ވިޔަފާރިވެރިންނަށް ބިންތައް ވިއްކައިގެން މަންފާ ހޯދާފައިވާ ކަމަށެވެ.

އެޗްޑީސީގެ ކޮރަޕްޝަންގެ މައްސަލަތައް މިދިޔަ ޖުލައި މަހުގެ ތެރޭގައި އެ ކުންފުނީގެ ކުރީގެ ޗެއާމަން އަހްމަދު ޒުހޫރު ވަނީ ރައީސް މުއިއްޒުގެ ސަމާލުކަމަށް ގެނެސްފަ އެވެ. އެކަމަކު އެ މައްސަލަ ތަހުގީގު ކުރަން އެމަނިކުފާނު އަންގަވާފައެއްނުވެ އެވެ.

ރައީސް ޔާމީން ވިދާޅުވީ، ފަޒުލްގެ ކޮރަޕްޝަންގެ ކަންކަން ރައީސް މުއިއްޒުގެ ސަމާލުކަމަށް އެޗްޑީސީގެ ޗެއަރ އަކަށް ޒުހޫރު ހުންނެވިއިރު ގެންނެވި ކަމަށަ ނަމަވެސް ދެން ފެނުނީ ޒުހޫރު އެތަނުން ފެޔަށް ޖެހެން ޖެހުނު މަންޒަރުކަމަށް ވެސް ރައީސް ޔާމީން ފާހަގަކުރެއްވިއެވެ. އެހެންކަމުން އެކަމުންވެސް ރައީސް މުއިއްޒުގެ ބައިވެރިވުން އެޗްޑީސީއާ ފަޒުލު ހިންގަމުންދާ ޖަރީމާތަކުގައި އޮތް މިންވަރު ހާމަވާ ކަމަށްވެސް ރައީސް ޔާމީން ވިދާޅުވި އެވެ.

ބިންވެރިޔާ ސްކީމުގެ ދަށުން ދޫކުރި ގޯތިތަކެއް ވަގަށް ވިއްކި މައްސަލަ ފުލުހުންނާއި އެންޓި ކޮރަޕްޝަން ކޮމިޝަން ގުޅިގެން ތަހުގީގު ކުރަމުން އަންނައިރު، އެ މައްސަލައިގައި 25 އަށް ވުރެ ގިނަ މީހުންގެ ޕާސްޕޯޓު މިހާރު ވަނީ ހިފަހައްޓާފަ އެވެ.