މިދިޔަ ހަފުތާގެ ތެރޭގައި އައްޑޫން ފުރައިގެން މާލެ ދަތުރު ކުރަނިކޮށް ބޯޓުން ގެއްލުނު މީހާ ހޯދުން ހުއްޓާނުލާ ކަމަށާއި އެގޮތަށް ބުނެވުނީ އޮޅުމަކުން ކަމަށް އެމްއެންޑީއެފުން ބުނެފި އެވެ.

އެމްއެންޑީއެފުން ބުނީ، ފަޅުވެރިޔާ ހޯދުމުގެ މަސައްކަތް ހުއްޓައިލި ކަމަށް މައުލޫމާތު ދެވިފައިވަނީ ކުށަކުން ކަމަށާއި، އެ ކަމަށް މައާފަށް އެދޭ ކަމަށެވެ.

"ސީމެކްސް" ކިޔާ ބޯޓެއްގެ ފަޅުވެރިއަކަށް މަސައްކަތްކުރި ރާޖު ކުމާރު ގެއްލުނު ކަމުގެ ރިޕޯޓް މިދިޔަ ހޯމަ ދުވަހުގެ ރޭ ކޯސްޓް ގާޑަށް ލިބުމާ ގުޅިގެން އޭނާ ހޯދުމުގެ މަސައްކަތް އައީ ކުރަމުންނެވެ.

އެމްއެންޑީއެފުން ރޭ ބުނީ "ސީމެކްސް" ބޯޓުން ގެއްލުނު ފަޅުވެރިޔާ ހޯދުމަށް، އޮޔާ އެކު މީހާ ލައްގާނެ ކަމަށް ގަބޫލުކުރެވޭ ދިމާތަކުގައި ސާޗް އޮޕަރޭޝަން ހިންގާފައިވާ ކަމަށެވެ. އަދި ވައިގެމަގުން އެ ސަރަހައްދުން ދަތުރުކުރާ ބައިނަލްއަގުވާމީ އުޅަނދުފަހަރާ ގޯސްޓްގާޑުން މުއާމަލާތްތައް ކޮށްގެން ވެސް ގެއްލުނު މީހާ ހޯދުމުގެ މަސައްކަތް ކުރަމުން އަންނަ ކަމަށް އެމްއެންޑީއެފުން ބުންޏެވެ.

އޭނާ ހޯދުމުގެ މަސައްކަތް ކުރަނީ އަސްކަރީ ޑްރޯން ބޭނުންކުރުމުގެ ބަދަލުގައި ކަނޑުމަގުން ކޯސްޓްގާޑުގެ އުޅަނދުތަކުން ކަމަށް އެމްއެންޑީއެފުން ބުންޏެވެ. އެކަމަކު، މި އޮޕަރޭޝަންގައި ޑްރޯން ބޭނުން ނުކުރި ސަބަބެއް އެމްއެންޑީއެފުން އަދި ނުބުނެ އެވެ.

އެމްއެންޑީއެފުން ބުނެފައިވާ އެ މޫހާ ހޯދުމުގެ މަސައްކަތުގައި މި މަހުގެ 17 އަދި 18 ވަނަ ދުވަހު 304 ނޯޓިކަލް މޭލުގެ ސަރަހައްދެއް ވަނީ ބަލައިފަ އެވެ. އަދި ބުރާސްފަތި ދުވަހު، ފުވައްމުލައް ވަށައިގެން ވެސް ބަލާފައިވެ އެވެ.

މި ހާދިސާއާ ގުޅިގެން މީގެ ކުރިން ފުލުހުން ބުނެފައި ވަނީ "ސީމެކްސް" ގައި ފަޅުވެރިއެއްގެ ގޮތުގައި މަސައްކަތް ކުރަމުން އައި މީހާ ބޯޓުގައި ނެތްކަން އެނގިފައި ވަނީ ފުވައްމުލަކާ 8 މޭލަށް ކައިރިވެފައި ވަނިކޮށް ކަމަށެވެ. އަދި އެ މީހާ ގެއްލުނު ރޭގެ 01:15 ހާއިރު ބޯޓުގެ ކެޕްޓަނާ އޭނަ ވާހަކަ ދެއްކި ކަމަށް ވެސް ފުލުހުން ބޯޓާ ހަވާލާދީ ބުނެފައިވެ އެވެ.