ފުލުހުންގެ އިކޮނޮމިކް ކްރައިމްގެ ހެޑް ސްޕްރިޑެންޓް ރަޖުނީ ޝުޢައިބު އަށާއި އޭނާގެ އަނބިމީހާ އަށް ވިނަރެސް ފްލެޓް ލިބުނު ކަމަށް ބުނާ "ޑޭޓާ" ތަކެއް ސޯޝަލް މީޑިއާ ގައި ދައުރުވާން ފަށައިފި އެވެ.

މިކަމާއި ގުޅިގެން ފުލުހުންގެ ތަރުޖަމާނު، އެސިސްޓެންޓް ކޮމިޝަނާ އޮފް ޕޮލިސް އަހްމަދު ޝިފާން މިއަދު "އެކްސް"ގައި ކުރެއްވި ޕޯސްޓެއްގައި ވިދާޅުވި ސުޕްރިންޓެންޑެންޓް އޮފް ޕޮލިސް ރަޖުނީ ޝުއައިބާ ގުޅޭގޮތުން ސޯޝަލް މީޑިއާގައި އާންމުކުރަމުންދާ މައުލޫމާތާ ގުޅިގެން ދިވެހި ފުލުހުންގެ ހިދުމަތުން ބަލަންޖެހޭ ކަންކަން ބަލަމުންދާ ކަމަށެވެ.

ނަމަވެސް ޝިފާން މިހާރު ވަނީ 'އެކްސް'ގައި ކުރެއްވި ޕޯސްޓެއްގައި ޑިލީޓް ކޮށްފަ އެވެ.

ރަޖުނީއާ ބެހޭ މައުލޫމާތު ސޯޝަލް މީޑިއާގައި އާންމުވާން ފެށީ މިދިޔަ ސަރުކާރުގެ ބިންވެރިޔާ ސްކީމުން ބިން ނުލިބޭ ބަޔަކަށް ވަގު ލިޔުންތަކެއް ހުށަހަޅައިގެން ބިން ލިބުނު ކަމަށް ބުނާ މައްސަލައެއް ފެންމަތިވި ފަހުންނެވެ.

އެ މައްސަލައިގެ ތަހުގީގެއް ފެށީ މިދިޔަ ބުދަ ދުވަހު އެވެ. އަދި ތަހުގީގާ ބެހޭގޮތުން ޖެހިގެން އައި ދުވަހު ފުލުހުން ވަނީ ނޫސްވެރިންގެ ބައްދަލުވުމެއް ބާއްވާފަ އެވެ. އެ ބައްދަލުވުމުގައި ރަޖުނީ ވެސް ވަނީ ބައިވެރިވެވަޑައިގެންފަ އެވެ. ރަޖުނީއާ ގުޅޭ މައްސަލައެއް ބަލަން ފެށިއިރު، ފުލުހުންގެ އިކޮނޮމިކް ކްރައިމް ޑިޕާޓްމަންޓުގެ ވެރިޔަކީ ވެސް އޭނާ އެވެ.

ރައީސް ސޯލިހުގެ ސަރުކާރުން ވިނަރެސް ފްލެޓް ވިއްކަން ހުޅުވާލުމުން ކުރި އިއުލާނާ ގުޅިގެން ކުރިމަތިލީ މީހުންގެ ތެރެއިން ވިނަރެސް ފްލެޓް ލިބޭ މީހުންގެ ހައްގުވެރިން ކަނޑައެޅުމަށްފަހު އެޗްޑީސީގެ ވެބްސައިޓްގައި ވެސް އެ ލިސްޓް އާންމުކުރި އެވެ. މި ސަރުކާރުން ވަނީ އެ ލިސްޓް ފަހުން ވެބްސައިޓުން ނަގާފަ އެވެ. އެކަމަކު އޭގެކުރިން އެ ލިސްޓް ބައެއް ފަރާތްތަކުން ވަނީ ޑައުންލޯޑްކޮށްފަ އެވެ.

ވިނަރެސް ފްލެޓް ލިބޭ ކަމަށް އެޗްޑީސީން އާންމުކޮށް އިއުލާންކުރި މީހުންގެ ލިސްޓްގައި ރަޖްނީ އާއި ޒުހުދާގެ ނަމެއް ނެތެވެ. ދެން ވިނަރެސް ފްލެޓް ދިނީ ސީލައިފް ކުންފުނީގެ ސަބަބުން ފްލެޓް ނުލިބި ތިބި މީހުންގެ ތެރެއިން ސިވިލް ކޯޓުން ކުރި ހުކުމްގައި ކަނޑައަޅާފައިވާ މީހުންނަށެވެ. އެ މީހުންގެ ތެރޭގައި ރަޖްނީ ނުހިމެނެ އެވެ. އުސޫލުގެ ތެރެއިން ވިނަރެސް ފްލެޓް ލިބޭނެ އިތުރު ގޮތެއް ނޯވެ އެވެ. މީގެ އިތުރުން ރަޖްނީއަށް ކ. މާފުށިން ވެސް ގޯއްޗެއް ލިބިފައިވެ އެވެ.

އެހެނިހެން ގޮތްގޮތުން ވިނަރެސް ފްލެޓް ދިން މީހުންގެ ލިސްޓް ހަސަން ކުރުސީގެ ނަމުގައި ހިންގާ އެކްސް އެކައުންޓުން ވަނީ ފަޅާއަރުވާލާފަ އެވެ. އެއީ ކޮރަޕްޝަންގެ ތެރެއިން ފްލެޓް ލިބުނު މީހުންނެވެ.

ރަޖްނީއަށް ފްލެޓް ލިބުނުގޮތާ ބެހޭގޮތުން ރައްޔިތުންނަށް ޖަވާބުދާރީވުމަށް ހަސަން ކުރުސީގެ އެކައުންޓުން ވަނީ އޭނާގެ ކިބައިން އެދި ޕޯސްޓްތަކެއްކޮށްފަ އެވެ. ރަޖުނީގެ ދެމަފިރިންނަށް ވިނަރެސް ފްލެޓް ލިބުނު ކަމަށްހަސަން ކުރުސީގެ ޑޭޓާތަކުން ދެއްކި ނަމަވެސް އެއްވެސް ޖަވާބެއް ނުދީ ރަޖްނީ ވަނީ އެ އެކައުންޓް އަންފޮލޯކޮށްފަ އެވެ.

މައުލޫމާތު އެނގޭ ބައެއް ފަރާތްތަކުންނާއި އެޗްޑީސީގެ އެތެރޭގެ މަސްދަރުތަކުން ބުނާ ގޮތުން ސިޔާސީ ގޮތުން ބާރުގަދަ ފަރާތްތަކާއި އެފަދަ ފަރާތްތަކާ ގުޅުން އޮތް މީހުންނަށް ވިނަރެސްއިން ފްލެޓު ވިއްކި އެވެ. ބައެއް ފްލެޓުތައް ވިއްކީ ކަޓުގެ ގޮތުގައި އެތައް ލައްކަ ރުފިޔާއެއް ނަގައިގެންކަން ބައެއް ބައެއް މީހުން ބުނެ އެވެ.

ބިންވެރިޔާ ސްކީމުން ދޫކުރި ގޯތިތައް ގޮތުގައި ހަދައި، ވިއްކި ގޯތިތަކުގެ މައްސަލައ އިއްޔެ ފަޅައިއެރުމުން، ފުލުހުންނާއި އޭސީސީން ވަނީ މައްސަލައިގެ ތަހުގީގު ފަށައިފަ އެވެ. އަދި އެޗްޑީސީގެ ޗެއާމަން ފިޔަވައި ބޯޑުގެ އެންމެން އަދި ކުންފުނީގެ ބައެއް އިސްވެރިން ވަނީ ސަސްޕެންޑުކޮށްފަ އެވެ.