އެޗްޑީސީގެ ކުރީގެ އެމްޑީ އިބްރާހިމު ފަޒުލް ރަޝީދުގެ ކޮރަޕްޝަންގެ ވާހަކަ ބަޔާންކޮށް އެ ކުންފުނީގެ ކުރީގެ ޗެއަރމަން އަހްމަދު ޒުހޫރު ރައީސް ޑރ މުހައްމަދު މުއިއްޒަށް ފޮނުއްވި ސިޓީ ނުލިބޭ ކަމަށް އެމަނިކުފާނު ވިދާޅުވެފައިވާއިރު އެ ސިޓީ ރައީސް އޮފީހުން ބަލައިގަތްކަން ހާމަވެއްޖެއެވެ.

ބިންވެރިޔާ ލިސްޓުގައި ނުހިމެނޭއިރުވެސް ފަޒުލްގެ ބޭބެއަކަށް ހުޅުމާލެއިން ގޯއްޗެއް ދިނުމާ އަދި ވެސް ހިޔާނާތުގެ ގިނަ ތުހުމަތުތަކެއް އަމާޒުވެ، ފުލުހުން މައްސަލަ ތަހުގީގު ކުރަން ފަށާފައިވާކަމަށް ހާމަކޮށްފައިވަނިކޮށް، ޒުހޫރު އެޗްޑީސީގެ ޗެަރމަންގެ މަގާމުގައި ހުރެ ފަޒުލްގެ ކޮރަޕްޝަންގެ މައްސަލަ ރައީސް މުއިއްޒުގެ ސަމާލުކަމަށް ގެނެސް ފޮނުވި ސިޓީއެއް މީސް މީޑިޔާގައި ދައުރުވާން ފެށިއެވެ.

އެކަމާ ގުޅިގެން ރާއްޖޭގެ ނޫސްވެރިއަކު މިއަދު ރައީސް މުއިއްޒުއާ ސުވާލުކުރުމުން ވިދާޅުވެފައިވަނީ އެ ސިޓީ އެމަނިކުފާނަށް ނުލިބޭ ކަމަށެވެ. އަދި ލިބުނު ނަމަ އެކަން ވަގުތުން ބަލާނެ ކަމަށްވެސް ވިދާޅުވިއެވެ.

ރައީސް މިފަދައިން ވިދާޅުވެފައިވަނިކޮށް، ޒުހޫރު ފޮނުވި ސިޓީ ރައީސް އޮފީހުން ބަލައިގެންފައިވާކަން މިވަނީ ހާމަވެފައެވެ. އެގޮތުން ސިޓީ ބަލައިގަތް ރަސީދުގެ ފޮޓޯއެއް ސޯޝަލް މީޑިޔާގައި ވަނީ ދައުރުކުރަން ފަށާފައެވެ. އެ ފޮޓޯއިން ހާމަވާ ގޮތުގައި ސިޓީ ހުށަހަޅާފައިވަނީ މިއަހަރުގެ ޖުލައި މަހުގެ 1 ވަނަ ދުވަހުއެވެ. ސިޓީއާ ރައީސް އޮފީހުން ހަވާލުވެ ރަސީދުގައި ސޮއިކޮށްފައިވަނީ ހަމަ އެދުވަހުގެ 13:23 ގައި ރައީސް އޮފީހުގެ މުވައްޒަފެއް ކަމަށްވާ އައިމިނަތު ނަފްޝާއެވެ.

ސިޓީ ގެންދިޔަ ފަރާތަކީ ޚުދު ޒުހޫރުކަން ލިޔެކިޔުމުން ފެންނަން އޮތެވެ.

މީގެ އިތުރުން އެ ސިޓީ ރައީސް މުއިއްޒުގެ ވަޓްސް އަޕް ނަމްބަރަށްވެސް ޒުހޫރު ފޮނުވިކަމަށް އެ މައުލޫމާތު އެނގި ހުރި މީހަކާ ހަވާލާދީ ބައެއް އޮންލައިންތަކުގައި ރިޕޯޓުކޮށްފައިވެއެވެ.

އެހެންކަމުން ރައީސް މުއިއްޒަށް ސިޓީ ލިބިވަޑައިނުގެންނެވި ސަބަބާ މެދު ގިނަ ބަޔަކު ސުވާލުއުފެދެއެވެ. އެގޮތުން ރައީސް އޮފީހަށް ފޮނުވާ ރަސްމީ ލިޔެކިޔުންތައް ރައީސްއާ ހަމައަށް ނުގޮސް ނައްތާލަނީތޯވެސް ގިނަ ބަޔަކު ސުވާލު އުފައްދައެވެ. ނުވަތަ ރައީސްއަށް އެމަނިކުފާނާ ވަކިވަރަކަށް ގާތް މީހުންގެ މައްސަލަަތަކުގައި ފޮނުވާ ސިޓީ ބިޓީ ފެނުމުގައި ދަތިކަމެއް އުޅޭ ކަމާ މެދު ވެސް އާންމު ރައްޔިތުން ސުވާލު އުފައްދާފައިވެއެވެ.

ރައީސް މުއިއްޒު މިއަދު ވަނީ އެންސްޕާގެ މައްސަލަވެސް އެމަނިކުފާނުގެ ސަމާލުކަމަށް އައިސްފައި ނުވާކަމަށް ވިދާޅުވެފައެވެ. އެމަނިކުފާނު މިފަދައިން ވިދާޅުވެފައިވާއިރު އެންސްޕާއިން އެމްއެމްޓީވީ ހިންގާ އިމާރާތުން ދެ ފަންގިފިލާ ކުއްޔަށް ނަގާފައިވަނި ވެސް އުސޫލާ ޚިލާފަށް ބިޑުކޮށްގެންކަމާ އަދި އެމްއެމްޓީވީގެ ވެރިންނާ އެކު އެންސްޕާއިން އެއްބަސްވުން ހަދާ އެއް ފަހަރާ 34 މިލިއަން ރުފިޔާ ދެއްކިކަންވެސް ހާމަވާ ލިޔެކިޔުންތައް މުޅި މީސް މީޑިޔާގައި ދައުރުވަމުންދާއިރު އެ އެކްސް ޕޯޓުތަކުގައި އެތައް ބަޔަކު ރައީސް މުއިއްޒުގެ އެކްސް ހެންޑްލް ޓެގްކޮށްފައިވާކަން ފާހަގަކޮށްލެވެއެވެ.