ޕެނަމާ ކެނަލް ހުރަސްކުރާ އެމެރިކާގެ އުޅަނދުތަކުން ފީ ނަގާ ކަމަށް ބުނެ އެ މަގު އަލުން އަތުލަން ޖެހިދާނެ ކަމަށް އެމެރިކާގެ އިންތިހާބީ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

އެމެރިކާގެ އެރިޒޯނާގައި އިއްޔެ ސަޕޯޓަރުންނާ ވާހަކަ ދައްކަވަމުން ޓްރަމްޕު ވިދާޅުވީ އެޓްލާންޓިކް ކަނޑާއި ޕެސިފިކް ކަނޑު ގުޅުވައިދޭ މުހިއްމު އެ ކެނަލް ނުބައި ބައެއްގެ އަތްމަތީގައި ނުބާވާނެ ކަމަށެވެ.

އަދި ޕެނަމާއަށް ޗެނަލްގެ އޮޕަރޭޝަންތައް، އިތުބާރު ކުރެވޭ އަދި ގާބިލް އެއްޗަކަށް ނުހެދިއްޖެ ނަމަ، ޕެނަމާ ކެނަލް ފުރިހަމައަށް "އަދި އެއްވެސް ސުވާލެއް ނެތި އަނބުރާ އަޅުގަނޑުމެންނަށް ދޭން ގޮވާލާނަން" އޭނާ ވިދާޅުވި އެވެ.

މީގެ ގަރުނަކަށް ވުރެ ކުރިން 1900 އަހަރުތަކުގެ ކުރީކޮޅުގައި އެމެރިކާ އާއި ޕެނަމާއާ ދެމެދު ވެވުނު އެއްބަސްވުމެއްގެ ދަށުން އެމެރިކާއިން ކެނަލް ހެދި އެވެ. އެއަށް ފަހު 1999 އާ ހަމައަށް ކެނަލް ބަލަހައްޓަމުން ދިޔައީ އެމެރިކާ އާއި ޕަނަމާ ގުޅިގެންނެވެ. ނަމަަވެސް 31 ޑިސެންބަރު 1999 އިން ފެށިގެން އެ ކެނަލް ހިންގުމުގެ ހުރިހާ ބާރެއް އެމެރިކާއިން ޕެނަމާއަށް ދިނެވެ.

ޓްރަމްޕްގެ ވާހަކަތަކާއި ގުޅިގެން ޕެނަމާގެ ރައީސް މުލީނޯ އާންމުކުރި ރެކޯޑް މެސެޖެއްގައި ވިދާޅުވީ ޕެނަމާގެ މިނިވަންކަމަކީ މަޝްވަރާ ނުކުރެވޭނެ ކަމެއް ކަމަށާއި ޕެނަމާއިން ނަގާ ޕޭސޭޖް ރޭޓްތައް ވެސް ދިފާއު ކުރައްވައި ވިދާޅުވީ އެއީ އަވަސް އަރުވާލައިގެން ކަނޑައަޅާފައިވާ ރޭޓްތަކެއް ނޫން ކަމަށެވެ.

އަހަރަކު 14،000 ބޯޓު ހުރަސްކުރުމުގެ ފުރުސަތު ލިބޭ ޕެނަމާ ކެނަލް އަކީ ދުނިޔޭގެ ކަނޑުގެ ވިޔަފާރީގެ %2.5 ހިއްސާކުރާ އަދި އެމެރިކާއަށް ވަރަށް މުހިންމު މަގެކެވެ. އެ ކެނަލް އެންމެ ގިނައިން ބޭނުން ކުރަނީ އެމެރިކާގެ އާގުބޯޓު ފަހަރެވެ. ކެނަލް ހުރަސްކުރާ އުޅަނދުގެ ބޮޑުމިނާއި، ދަތުރުގެ ބޭނުމަށް ބަލައި ނަގާއިރުތައް 0.50 ޑޮލަރުން 300،000 ޑޮލަރަށް އަރަ އެވެ.