ދިވެހިރާއްޖެ މިއަދު ވަނީ މީގެ 20 އަހަރު ކުރިން ދިވެހީން ދެއްކި ނަމޫނާއަށް ބޭނުން ޖެހިފައިކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ، މިއަދު ފާހަގަކުރަމުްނދާ އެއްބައިވަންތަކަމުގެ ދުވަހުގައި ދިވެހި ރައްޔިތުންނަށް ފޮނުވި ޚާއްސަ މެސެޖުގައެވެ. އެގޮތުން ރައީސް ޔާމީން ވަނީ ރައްޔިތުންގެ މެދުގައި އުފެދިފައިވާ އެއްބައިވަންތަކަމާއި އަހްވަންތަކަމުގެ ގުޅުމަށް ބުރޫއަރާ، ގައުމުގެ މަސްލަހަތު ގެއްލޭފަދަ އަމަލުތައް ހިންގުމަށް، އެއްވެސް ފަރާތަކަށް ޖާގަ ނުދެއްވުމަށް އިލްތިމާސް ކުރައްވާފައެވެ.

އެގޮތުން ގައުމުގެ މިނިވަންކަމާ ސިޔާދަތު ގެއްލި ގައުމުގެ ހަމަޖެހުން ނަގާލަން ވަކި ގައުމަކަށް ފުރުސަތު ދެވިގެން ނުވާނެ ކަމަށާ ގައުމުގެ އިސްތިގުލާލު ޞޭރުބައެއްގެ އަތްމައްޗަށް ދޫކޮށްލިޔަ ނުދިނުމަށް ހުރިހާ ދިވެހިން އަތުގުޅާލާ ނުކުންނަން ޖެހޭ ކަމަށްވެސް އެމަނިކުފާނު ވިދާޅުވިއެވެ.


ރައީސް ޔާމީން ވިދާޅުވެފައިވަނީ ސުނާމީ ކާރިސާގައި ކުރިމަތިވި ދުވަހު ދިވެހި ރައްޔިތުން ދައްކަވައިދެއްވި އެއްބައިވަންތަކަމުގެ ވަރުގަދަ ގުޅުން، އަޅުގަނޑުމެން އެންމެންގެ ހިތްމައްޗަށް ގެނެސް، އެ ހާދިސާއިން މިއަދުވެސް އިބްރަތް ހާސިލު ކުރެއްވުމަށް އެދިވަޑައިގަންނަވާ ކަމަށެވެ.

މީގެ އިތުރުން ރައީސް ޔާމީން ވިދާޅުވީ 2004 ވަނަ އަހަރުގެ ޑިސެންބަރު މަހުގެ 26 ވަނަ ދުވަހު ރާއްޖެއަށް ކުރިމަތިވި ސުނާމީގެ ހިތާމަވެރި ކާރިސާއާ ގުޅިގެން ފާހަގަ ކުރާ "ރާއްޖޭގެ އެއްބައިވަންތަކަމުގެ ދުވަސް" ފާހަގަކުރަމުން ދަނީ، ރާއްޖޭގެ ލޮބުވެތި ރައްޔިތުން ދައްކަވައިދެއްވި އެކުވެރިކަމާއި އަހްވަންތަކަމާއި، ގައުމީ އެއްބައިވަންތަކަމުގެ މަތިވެރި ގުޅުމުގެ ހަނދާންތައް އާކުރުމަށްޓަކައި ކަމަށެވެ.

ދިވެހިންގެ މެދުގައި އޮތް އެކުވެރިކަމާއި އެއްބައިވަންތަކަމުގެ ގުޅުން އިތުރަށް ވަރުގަދަކޮށް، ހިޔާލު ތަފާތުވާ ކަންކަމުގައިވެސް ގައުމުގެ މަސަލަހަތު ކުރިއަށް ނެރުމުގެ ހިތްވަރު ދެއްވުމަށާއި ރާއްޖެއަށް އަމަންއަމާންކަމާއި ހެޔޮ ގޮތްތައް މިންވަރު ކުރެއްވުމަށް ރައީސް ޔާމީން ވަނީ ދުވާ ކުރައްވާފައެވެ. އަދި ސުނާމީ ކާރިސާގައި މިދުނިޔެ ދޫކުރި އުހްތުންނަށާއި އަހުންގެ ފުރާނައަށް، މާތްﷲ ސުވަރުގޭގެ މަތިވެރި ނިއުމަތް މިންވަރު ކުރެއްވުން އެދިވެސް ﷲގެ ހަޟްރަތުގައި ވަނީ ދަންނަވާފައެވެ.

ސުނާމީ ކާރިސާގެ ހިތި ހަނދާންތައް މިއަދުވެސް ސިފަވެގެން ދަނީ ހިތާމައިގެ އަސަރުގަދަ ޝުއޫރުތަކާ އެކުގައި ކަމަށާއި އެދުވަހު އަމިއްލަ ފުރާނައަށްވުރެ ބޮޑަށް އިސްކަންދިނީ އަނެކާގެ ފުރާނަ ސަލާމަތްކުރަން ކަމަށް ވެސް ރައީސް ޔާމީން ވިދާޅުވިއެވެ. އަދި އެފަދަ ހިތްދަތި އަދި ޚުޠޫރަތްތެރި ދަނޑިވަޅުގައިވެސް އަމިއްލަ ނަފްސުގެ މައްޗަށް ތިމާގެ ގައުމާއި މުޖްތަމައުގެ ސަލާމަތްތެރިކަން އިސްކުރި ކުރުމަކީ، ސުނާމީ ކާރިސާއިން ދިވެހިން ދަސްކުރި އެންމެ މުހިއްމު ފިލާވަޅު ކަމަށާއި އަދި އެއީ ގައުމީ އެއްބައިވަންތަކަމުގެ ދުވަސް ފާހަގަކުރުމުގެ މުހިންމު ޝިއާރު ކަމަށް ވެސް ރައީސް ޔާމީން ވަނީ ވިދާޅުވެފައެވެ.