ރައީސް މުއިއްޒުގެ ކިބައިން ފެންނަނީ ހަރުކަށިކަމާއި ގޮތް ދޫ ނުކުރުން ކަމަށް ރައީސް އަބްދުﷲ ޔާމީން އަބްދުލް ގައްޔޫމް ވިދާޅުވެއްޖެ އެވެ.

ޕީއެންއެފުން ބުރާސްފަތި ދުވަހުގެރޭ ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ ކަންކަމުގައި ތަޖުރިބާ ހުރި މީހުންގެ ބަސް ނުހޯދާ ރައީސް މުއިއްޒު އަށް ވިސްނިވަޑައިގަންނަވާ ގޮތަށް އެކަނި ކަންކަން ކުރުމަކީ ގައުމުގެ ކަންކަން ގޯސްކޮށް ދާ އެއް ސަބަބު ކަމަށެވެ.

ރައީސް ޔާމީން ވިދާޅުވީ ރައީސުލްޖުމްހޫރިއްޔާ ވެރިކަން ކުރައްވަން ވާނީ ލަފަޔާއި މަޝްވަރާގެ މަތިން ކަމަށާއި ގާނޫނުއަސާސީގެ ރޫހަކީ އެއީ ކަމަށެވެ. ކެބިނެޓެއް އޮތުމުގެ މައިގަނޑު ސަބަބަކީ ވެސް އެއީ ކަމަށާއި ކެބިނެޓަކީ ރައީސަށް ލަފާ އަރުވާ ތަނެއް ކަމަށް އެ މަނިކުފާނު ވިދާޅުވި އެވެ.

އެހެންކަމުން ވުޒާރާތަކާއި އިދާރާތަކަށް ލާ މީހުންނަކީ ފަހު ބަސް އެ މަނިކުފާނަށް ބުނެވޭނެ ފަދަ މީހުން ކަމަށް ރައީސް ހާމަކަން ބޮޑުކޮށް ވިދާޅުވުމަކީ އެއްވެސް ސިފައެއްގައި މޮޅުކަމެއް ނޫންކަމަށް ރައީސް ޔާމީން ވިދާޅުވި އެވެ.

ރައީސް ޔާމީން މިފަދައިން ވިދާޅުވިއިރު ރައީސް މުއިއްޒު މިފަހުން ވަނީ އެމަނިކުފާނު ވަޒީފާ ދޭ މީހުނަށް އިންޒާރެއް ދެއްވައިފަ އެވެ،

އެގޮތުން އެމަނިކުފާނު ވިދާޅުވީ ކޮންމެ މީހަކު މަސައްކަތް ކުރައްވަން ޖެހޭނީ ސީދާ އެމަނިކުފާނު ބުނާ ގޮތަށް ކަމަށާއި އަދި ފަހު ބަސް ބުނާނީ ވެސް އެމަނިކުފާނު ކަމަށެވެ. އަދި ވިދާޅުވީ ކޮންމެ މަގާމަކަށް ވެސް ލާނީ ބުނާގޮތް ހަދާ މީހުން ކަމަށާއި ބުނާ ގޮތް ނުހަދާ މީހުން ވަޒީފާއިން ވަކިކުރައްވާނެ ކަމަށެވެ.

ރައީސް ޔާމީން ވިދާޅުވީ މުއިއްޒުގެ ކިބައިން ފެންނަނީ ހަރުކަށިކަމާއި ގޮތް ދޫ ނުކުރުން ކަމަށާއި ކަންކަމުގައި ތަޖުރިބާ ހުރި މީހުންގެ ބަސް ނުހޯދާ ރައީސް މުއިއްޒު އަށް ވިސްނިވަޑައިގަންނަވާ ގޮތަށް އެކަނި ކަންކަން ކުރުމަކީ ގައުމުގެ ކަންކަން ގޯސްކޮށް ދާ އެއް ސަބަބު ކަމަށެވެ.

ރައީސް ޔާމީން އިތުރަށް ވިދާޅުވީ ރައީސް މުއިއްޒުގެ މައްޗަށް ތުހުމަތު ކުރެވިފައި ހުރި އެތަކެއް މައްސަލަތަކެއް މިހާރުވެސް އޭސީސީގައި އެބަހުރި ކަމަށާއި ރައީސް ޑރ. މުހައްމަދު މުއިއްޒު ވެރިކަމުން އިސްތިއުފާ ދެއްވުމަށްވުރެ، ރައްޔިތުން ބޮޑަށް މިއަދު އެދޭނެ ކަމެއް ނެތް ކަމަށެވެ.