ރައީސް ޑރ. މުހައްމަދު މުއިއްޒު ވެރިކަމަށް އިންތިހާބު ވީ ދުވަހުން ފެށިގެން ހޮޅުއަށިތަކުން އިވެނީ ރައީސް މުއިއްޒު، ކުރީގެ ރައީސް އިބްރާހިމު މުހައްމަދު ސޯލިހަށް ވުރެ ޗޯރުކަން ބޮޑު ވާހަކައެވެ. މުއިއްޒު ސޯލިހަށް ވުރެ ނުބައިވެފައި ދޮގު ހަދާ ވާހަކަ އެވެ. ތެދެކެވެ. ވެރިކަމަށް އައުމުގެ ކުރިންވެސް އަދި ވެރިކަމަށް އައުމަށް ފަހުގައިވެސް ހަމަ އެންމެ ތެދެއްވެސް ނަހަދަނީ އެވެ. ތެދު ހެދުމަކީ މުއިއްޒު އެންމެ ކުރާ ހިތް ނުވާ ކަމެވެ. އަދި މުއިއްޒު އެންމެ ރުޅި އަންނަނީ ދޮގުގެ އިދިކޮޅު "ތެދު" ބުނާ މީހުން ދެކެ އެވެ.

މުއިއްޒުގެ ވެރިކަމަށް އަހަރު ފުރުމުގެ މުނާސަބަތުގަ ލިޔުނު ރިޕޯޓެއްގައި އަޅުގަނޑު ވާނީ ތިޔަބޭފުޅުންނާއި ހަމައަށް "މުއިއްޒުގެ ވެރިކަމަށް އަހަރެއް: ދޮގު ޖާޑިން ނެގި 100 ދޮގު" މި ނަމުގައި ރިޕޯޓެއް ގެނެސްދީފައި އެވެ. އެ ރިޕޯޓުގައި ވާނީ މުއިއްޒުގެ ދޮގު ޖާޑިން ސޯޝަލް މީޑިއާ ގުގުމާލީ "100" ދޮގަވެ.

ނަމަވެސް މިއަދު މި އުޅެނީ އެ ދޮގުތަކުގެ ހިފާ އިތުރަށް ދަމާކަށް ނޫނެވެ. މިއަދު ބޮޑަށް މި އުޅެނީ ރައީސް ޑރ. މުއިއްޒު ދޮގުހެދުމުން ދުރަށް ޖެހޭނެ ނަސޭހަތެއް ދޭށެވެ.

ނަސޭހަތެއް ވެސް ދޭންވާނީ އަޑު އެހިއްޔާތާ އެވެ. މިހާރު ވެސް ރައީސް މުއިއްޒު "ޗެނަލް 13" ބައްލަވާ ކަމަށްވެ އެވެ. އެހެން ކަމުން އަޑު އަހާނެ ކަމަށް ބަލަމާ ތޯ އެވެ.

ކޮންމެއަކަސް ރައީސް ޑރ. މުއިއްޒު އަކީ ދޮގުވެރިއެއްގެ ގޮތުގައި މުޅި ދުނިޔެ އަށް މިހާރު ވަނީ ލޭބަލްވެފައި އެވެ. މި ކަން ހާމަ ކުރެއްވީ ދަ ޑިމޮކްރެޓުން މިފަހުން ބޭއްވި ކަންމަތީ ޖަލްސާގައި ވާހަކަދައްކަމުން އެ ޕާޓީގެ ރައީސް ހަސަން ލަތީފް އެވެ.

ހަސަން ވިދާޅުވީ ރައީސް ޑރ. މުއިއްޒަކީ ދޮގުވެރިއެއްގެ ގޮތުގައި މުޅި ދުނިޔެ އަށާއި ރާއްޖެ އަށް މިހާރު ވަނީ ލޭބަލްވެފަ ވާ ކަމަށެވެ. އަދި ރައީސް މުއިއްޒު އަށް އެވަރަށް ދޮގު ހެއްދެވޭ ސަބަބު ވެސް ހަސަން ވިދާޅުވެ ދެއްވި އެވެ. ރައީސް މުއިއްޒު "ދޮގު" ވިދާޅުވަނީ ގަސްތުގައި އިތުރުފުޅުތައް ހެއްދެވުމުގެ ބޭނުމުގައި ނޫން ކަމަށާއި އެއީ އެމަނިކުފާނަށް ކުރިމަތިވެވަޑައިގެން ހުންނެވި އާލާސްކަންފުޅެއްގެ ސަބަބުން ދިމާވާ ކަމެއް ކަމަށް ހަސަން ވިދާޅުވެ އެވެ.

ހަސަން ވިދާޅުވީ މި ބަލިން ސަލާތް ވުމަށް ރައީސް ޑރ. މުއިއްޒު އަވަހަށް ސީރިއަސްކޮށް "ޕްރޮފެޝަނަލް އެހީތެރިކަން" ހޯއްދަވަން ޖެހި ވަޑައިގަންނަވާ ކަމަށެވެ. އެހެން ކަމުން ހަސަންގެ ލަފާ ފުޅަކީ ހޮސްޕިޓަލަށް ރައީސް ވަޑައިގެން ސިއްހީ ފަރުވާ އަވަހަށް ހޯއްދެވުމެވެ.

ނަމަވެސް މިކަމުގައި އަޅުގަނޑު މުޅިން ހަސަން އާއި އެއްބަހެއް ނޫނެވެ. އަޅުގަނޑުގެ ލަފައަކީ ހޮސްޕިޓަލުގެ ބަދަލުގައި ގިނަ ގިނައިން ރައީސް ޑރ. މުއިއްޒު ގަބުރަށް ޒިޔާރަތް ކުރެއްވުމެވެ.

ސަބަބަކީ ރައީސް ޑރ، މުއިއްޒުއަށް ދިމާ ވެގެން މި އުޅުއްވާ "ދޮގު ހެދުން" އެއީ ސިއްހީ މައްސަލައެއް ނަމަ މިހާރު ވާނީ ފަރުވާ ހޯއްދަވާފަ އެވެ. އެވަރަށް ފުރަ ފުރައިގެން ބޭރުގެ ކަރަކަރައަށް އެބަ ވަޑައިގަންނަވާ ތާ އެވެ. ރާއްޖެއިން ފަރުވާ ހޯއްދަވަން ބޭނުން ފުޅު ނޫންނަމަ ރައީސް ޑރ. މުއިއްޒު އެންމެ ގިނައިން ވަޑައިގަންނަވާ ސިންގަޕޫރު ހޮސްޕިޓަލްތައް ވެސް އެހުރީ ތާ އެވެ.

އަޅުގަނޑުގެ ބުއްދިން ވިސްނާ ލުމުން ރައީސް ޑރ. މުއިއްޒު އެފަދައިން ދޮގު އެ ހައްދަވަނީ ދުނިޔެވީ ބޭނުމަށް އެމަނިކުފާނު ބައެއް ފަހަރު އިސްލާމީ ޢަޤީދާ އާއި ފެއަށް ޖެހެވޭތީ އެވެ. މިހެން މިދެންނެވީ އެހާ ދީން ވެރި ހުލްގު ހެޔޮ ބޭފުޅެއްގެ ދަރިކަލުން މާގިނައިން "ދޮގު" ހައްދަވާތީ އެވެ. ދީން ސިޔާސީ ބޭނުމަށް "ޔޫސް" ކުރައްވާ އިސްލާމީ ލީޑަރުން ދުނިޔެ ވަނީ ދެކިފަ އެވެ. އަދި މިހާރު ވެސް ދީނީ ތާކިހާ އަޅުއްވައިގެން އުޅުއްވާ ސިޔާސީ ލީޑަރުން މަދުން ނަމަވެސް ފެނެ އެވެ. މިފަދަ މީހުންގެ ދޮގުން މުޖްތަމައުތައް ބައިބައިކޮށް ފަސާދަ އާންމުކުރެ އެވެ.

މިފަދަ ސިޔާސީ ވެރިން އިސްލާހުވުމަށް އެދޭ ނަމަ އިހްތިޔާރު ކުރަންވީ ޤުރުއާނާއި ސުއްނަތުން ދެއްކި ސަލަފުއް ޞާލިހުންގެ އަމަލުތަކެވެ. ދީނީ އިލްމުގެ އަހުލުވެރިން ވިދާޅުވާ ގޮތުގައި ދޮގު ހެދުން އިތުރު ވަނީ މަރު ހަދާން ނެތުމުން ނެވެ. ނުވަތަ މަރު މަތިން ގަސްތުގައި ހަދާން ނައްތާލުމުން ނެވެ.

މި ކަމުގެ ފަރުވާ ވެސް ޤުރުއާނާއި ސުއްނަތުގެ އަލީގައި ސަލަފުއް ޞާލިހުން ވަނީ ދެއްވާފަ އެވެ. އެއީ ގަބުރަށް ޒިޔާރަތްކުރުމެވެ. ގަބުރަށް ޒިޔާރަތް ކުރުމުން މަރުމަތީން ހަނދާންވެ އެވެ. މަރަކީ އަޅުގަނޑުމެން އެކަމާއިމެދު ޣާފިލްވެފައިވާ އެއްޗެއް ނަމަވެސް އަހަރެމެންނާއި އެންމެ ކައިރީގައިވާ އެކައްޗެވެ.

ބަދުނަސީބުވެރިންގެ ތެރޭގައި ނުވަނީސް އަހަރެމެންގެ އަމަލުތައް އިސްލާހުކުރަމާ ހިންގަވާށެވެ. އެހެނީ މަރު އަންނާނީ ކޮންއިރަކު، ކޮންތާކު ކަމެއް އަހަރެމެންނަށް ނޭނގޭނެ އެވެ. އެއީ ތިބާއަކީ ޒުވާނަކަށް ވީތީ ދޫދޭނެ މިތުރެއް ނޫނެވެ. މުއްސަންޖަކަށް ވީތީ ހެއްލޭނެ ފަޤީރެއް ނޫނެވެ. ލީޑަރަކަށް ރަސްކަލަކަށް ރައީސަކަށްވުމުން އިހްތިރާމް ކޮށް ބޯ ގުދު ކުރާނެ އިންސާނެއް ނޫނެވެ. މުސްކުޅިއަކަށް، ކުޑަކުއްޖަކަށް ވީތީ ރަޙުމްކުރާނެ އޯގާތެރިއެއް ނުމެ ނޫންމެއެވެ. އެއީ ﷲގެ އަމުރުފުޅަށް ހިލާފުވުމެއް ނުވާ މަލަކުލް-މައުތުގެ ވަޒީފާ އެވެ.

އިންސާނާ ދުނިޔެ މަތީގައި އުޅޭއިރު މަރުމަތީން ހަނދާންކުރަނީ މަދު ފަހަރަކު އެވެ. ދުނިޔެއަށް ހެއްލި ގެއްލި ވުމުގެ ސަބަބުން އަޅުގަނޑުމެންނަށް އެ މަރާމެދު ޢާފިލު ވެވެނީ އެވެ. ގަބުރަށް ޒިޔާރަތްކުރުމުން މަރަކީ ތިމާއާއި ކޮންމެވެސް ދުވަހަކުން ބައްދަލު ކުރާނެ ކަމެއްކަން ހިތް މައްޗަށް ގެނެވި އެކަމަށް ހުޝިޔާރެވެ ވެއެވެ.

އިންސާނާ މަރުވުމަށް ފަހު، ކަށްވަޅުގެ އަޒާބަކީ ހައްގު އެއްޗެކެވެ. ކަށްވަޅުގެ އަޒާބު ހައްގުވެގެންވާ ބައެއް ކަންތައްތަކަކީ ވައްކަން ކުރުމާއި ހިޔާނާތް ތެރިވުމާއި ޒަކާތް ނުދިނުމާއި މީސްތަކުންގެ މެދުގައި ފިތްނަ އުފެއްދުމާއި ދޮގު ހެދުމެވެ. އަދިވެސް މިނޫން ކަށްވަޅުގެ އަޒާބު ހައްގުވެގެންވާ ކަންތައްތައް ވެއެވެ.

މިކަމުން އިނގި ސާފުވެގެން ދަނީ ގަބުރުސްތާނަށް ޒިޔާރަތް ކުރުމުގެ ސަބަބުން ކަށްވަޅުގެ އަޒާބުގެ މަތީން ހަނދާންވެ އިސްވެ ބަޔާންވެ ދިޔަ ފާފަ ތަކުން ތިމާގެ ނަފްސު ރައްކާތެރިކުރަން މަސައްކަތްކުރުމުގެ ފުރުސަތު ބޮޑުވެގެންދާނެ ކަމެވެ. އެހެން ކަމުން ދޮގު ހެދުން މަދުކޮށް ތެދު ބުނުން އިތުރު ކުރުމަށް ދޮގުވެރިން ގަބުރަށް ޒިޔާރަތް ކުރުން އިތުރުކުރަން ވީ އެވެ.

އިސްލާމީ ރިވެތި އަދަބުތަކާއި ހިލާފުކަންތައްތައް މިސާލަކަށް ދޮގު ހެދުން، މަކަރު ހެދުންކަހަލަ ކަންކަން މީހެއްގެ ފުށުން ފެންނަކަމަށް ވާނަމަ އަވަސްވެ ގަންނަންވީ މަރު ހަދާން ކުރުމަށް ގަބުރަށް ޒިޔާރަތް ކުރާށެވެ. މަރުވުމުގެ ކުރިން ހަޔާތުގެ ފައިދާ (ހެޔޮ ގޮތުގައި ލިބިގަންނާށެވެ.)

ކީރިތި ގުރުއާނާއި ސުންނަތުން އަދި ދަންނަބޭކަލުންގެ އިޖުމާއުން ސާބިތުވާ ގޮތުގައި ދޮގު ހެދުމަކީ ހަރާމް ކަމެކެވެ. ނަޙުލު ސޫރަތުގެ 105 ވަނަ އާޔަތުގައި ﷲ ވަޙީކުރައްވާފައިވާ ބަސްފުޅުގެ މާނައިގައިވެ އެވެ. "ދޮގު ހަދާކަން ކަށަވަރީ، ﷲ ގެ އާޔަތްތަކަށް އީމާންނުވާ މީހުންނެވެ. އަދި އެއުރެންނީ ހަމަ ދޮގުވެރީންނެވެ."

ރައީސް ޑރ. މުއިއްޒު އެވެ. އަޅުގަނޑުގެ ނަސޭހަތަކީ މަނިކުފާނު ވެސް ދޮގު ހެދުން ހުއްޓާލައްވާ ގަބުރަށް ޒިޔާރަތްކުރުން ގިނަ ކުރައްވާށެވެ. ނަސީބުގެ ތަރިތައް އޮއްސޭހިނދު، އޭނާ ކުރި ރަނގަޅުކަންތައްތައް އޭނާގެ ދައުރާއެކު ވަޅުޖެހިގެންދެ އެވެ. ދިރިތިބީންގެ މެދުގައި ގިނަދުވަހަށް ދެމިހުންނަނީ އޭނާ ކުރި ނުބައި ކަންތައްތަކުގެ ހަނދާންތަކެވެ. ޖާހާއި މަގާމަކީ ސުންގަޑި ކަނޑައެޅިފައިވާ ކަންތައްތަކެކެވެ. އަދި ބާރުގެ ތަރަހައިގެ މައްޗަށް ބިނާކޮށް ލިބޭ ލޯތްބާއި އިހުތިރާމާއި ގަދަރަކީވެސް، ފެށުނީއްސުރެ ނިމުމުގެ ސިއްކަ ޖެހިފައިވާ ކަންތައްތަކެކެވެ.