މާލޭގެ ގެއަކުން ވަގަށް ނެގި ދެ މިލިއަން ރުފިޔާގެ ތަކެތި ފުލުހުން ހޯދައިފި އެވެ.
ރޭ ހިނގި މިހާދިސާ އާއި ގުޅޭ ގޮތުން ފުލުހުން ބުނީ ގަލޮޅުގައި ހުންނަ ގެއަކުން ވަގަށް ނަގާފައިވާ ދެ މިލިއަނެއްހާ ރުފިޔާގެ އަގުހުރި ތަކެތި ހޯދާފައިވާ ކަމަށެވެ. އަދި އެތަކެތި އޭގެ ވެރިފަރާތާއި ހަވާލުކޮށްފައިވާ ކަމަަށެވެ.
ވަގަަށް ނަގާފައިވާ ތަކެތީގެ ތެރޭގައި ކެމެރާއާ ލެޕްޓޮޕާއި ފޯނާއި އެހެނިހެން ސާމާނު ހިމެނެ އެވެ. އަދި ފައިސާ ވެސް ވަގަށް ނަގާފައިވެ އެވެ.
މިތަކެތި ހޯދާފައިވަނީ މައްސަލަ ހުށަހެޅުމާއެކު ގަލޮޅު ޕޮލިސް އިންވެސްޓިގޭޝަނާއި ރެސްޕޮންސް އެންޑް ޕެޓްރޯލް ގުޅިގެން ކުރި މަސައްކަތުން ކަމަށް ފުލުހުން ބުނެ އެވެ.
ވައްކަމުގެ އެ މައްސަލައާ ގުޅިގެން އެއްވެސް މީހަކު ހައްޔަރު ކުރި ކަމެއް އަދި އެ ތަކެތި ހޯދި ގޮތެއް މިހާތަނަށް ފުލުހުން ހާމަކޮށްފައެއް ނުވެ އެވެ.
މާލޭގައި ވައްކަމުގެ މައްސަލަތައް އިންތިހާއަށް ދަނީ އިތުރުވަމުންނެވެ. އެގޮތުން ކޮންމެ ދުވަހަކުހެން ވައްކަމުގެ މައްސަލަތަކުގައި އެތައް ބަޔަކު ހައްޔަރުކޮށް ބަންދުކުރެ އެވެ.
